Ɔfã 63
Nyikyerɛ a wɔnam Joseph Smith Nkɔnhyɛnyi no do dze mae, wɔ Kirtland, Ohio, Dzifuu 30, 1831. Nkɔnhyɛnyi no, Sidney Rigdon na Oliver Cowdery fi hɔn nsera wɔ Missouri ebodu Kirtland wɔ Dzifuu 27. Joseph Smith n’abakɔsɛm kyerɛ nyikyerɛ yi mu dɛ: “Ber a Asɔr yi ahyɛ ase yi, ɔwɔ dɛ yɛper dɛ yebenya Ewuradze n’asɛm ne beebiara a ohia ma hɛn nkwagye; na dɛ mbrɛ Zion asaase ayɛ adze a osi hɛn enyi do tsitsir no, mibisaa Ewuradze dɛ ɔmma munhu dza ɔwɔ dɛ yɛyɛ a, ɔfa mbrɛ yebesi yɛaboa Ahotseweefo no ano, na yɛatɔ asaase, na ndzɛmba binom so a ɔkekã ho.”
1–6, Ebufuhyew da no bɛba emumuyɛfo do; 7–12, Nsɛnkyerɛdze nam gyedzi do ba; 13–19, Hɔn a wɔtõ awar wɔ hɔn akoma mu no bɔpow gyedzi no na wɔbɔtow hɔn akyen ogya baka no mu; 20, Anokwafo no benya egyapadze wɔ asaase a wɔasakyer no no do; 21, Wɔnndaa Nsakyer a osii Bepɔw no do no mu nsɛm nyina edzi nnkyerɛe; 22–23, Hɔn a wɔyɛ setsie no hɔn nsa kã ahenman no mu esumadze no; 24–31, Ɔwɔ dɛ wɔtɔ egyapadze a ɔwɔ Zion no; 32–35, Ewuradze hyɛ akõkoekõ ho ɔmom, na emumuyɛfo ku emumuyɛfo; 36–48, Ahotseweefo no wɔdɛ wɔboa hɔn ano kɔ Zion na wɔma sika ma wɔdze kyekyer; 49–54, Wɔbɔ anokwafo anohoba dɛ wobehyira hɔn wɔ Mbae a Otsĩa Ebien, Owusoɛr na Mfe Apem no mu; 55–58, Iyi nye kɔkɔbɔ da no; 59–66, Hɔn a wɔmmaa hɔn tumdzi na wɔdze Ewuradze ne dzin dzi dwuma no bɔ no gyangyan.
1 Hom ntsie, O hom adasa, na hom mbue hom akoma mu, na hom nyɛ aso wɔ ekyirekyir; na hom ntsie, hom a hom frɛ homho Ewuradze no nkorɔfo, na hom ntsie Ewuradze n’asɛm nye ne pɛ a ɔfa homho.
2 Nyew, nokwar, mese hom dɛ hom ntsie nyia n’ebufuw adzɛw wɔ emumuyɛfo nye etuatsewfo do no n’asɛm;
3 Nyia ɔfa hɔn a ɔpɛ dɛ ɔfa hɔn, na hɔn a ɔpɛ dɛ ɔbɔ hɔn nkwa ho ban no ɔbɔ no;
4 Nyia ɔma do si hɔ wɔ nankasa ne pɛ na n’enyigye do; na ɔsɛɛ no wɔ ne pɛ do, na otum ma ɔkra kɔ hɛl.
5 Hwɛ, Emi, Ewuradze, mema me ndze do, na wobedzi do.
6 Dɛm ntsi, nokwar, mese dɛ, wɔmma emumuyɛfo nhwɛ yie, na wɔmma etuatsewfo nsuro na hɔn ho mpopo; na wɔmma ekyingyefo mmua hɔn ano, osiandɛ ebufuw da no bɛba hɔn do dɛ ekyinehyia-mframa, na honam nyina bohu dɛ Emi nye Nyame.
7 Na nyia ɔrohwehwɛ nsɛnkyerɛdze no bohu nsɛnkyerɛdze, mbom nnyɛ dza ɔdze kɔ nkwagye mu.
8 Nokwar, mese hom dɛ binom wɔ hom mu a wɔrohwehwɛ ehu nsɛnkyerɛdze, na binom fi ahyɛse no mpo;
9 Mbom, hwɛ, gyedzi nndua nsɛnkyerɛdze do ba, na mbom nsɛnkyerɛdze dzi hɔn a wɔgye dzi ekyir.
10 Nyew, nsɛnkyerɛdze nam gyedzi do ba, onndua nyimpa hɔn pɛ do, dɛ mbrɛ wɔrohwehwɛ, na mbom ɔnam Nyame ne pɛ do.
11 Nyew, nsɛnkyerɛdze nam gyedzi do, dze yɛ ndwuma akɛse mu, osiandɛ nyimpa biara a onnyi gyedzi no orunntum nnsɔ Nyame enyi; na nyia Nyame no bo efuw no no, n’enyi nngye no ho; dɛm ntsi, hɔn a wɔtsetse dɛm no, onnyi nsɛnkyerɛdze biara nnkyerɛ hɔn, na mbom n’ebufuw nko na ɔdze hɔn kɔ afɔbu mu.
12 Dɛm ntsi, emi, Ewuradze, m’enyi nngye hɔn a wɔwɔ hom mu a wɔpɛ dɛ wohu nsɛnkyerɛdze na anwanwadze ama woeenya gyedzi, na mbom wɔnnyɛ dza oye mmfa mma nyimpa nnhyɛ me enyimnyam.
13 Eso, mema mbrasɛm, na dodowara adan efi me mbrasɛm ho na wonndzi do.
14 Mbarimba na mbasiafo awartofo wɔ hom mu; binom efi hom mu kɔ, na binom so da ho wɔ hom mu na wɔbɛda hɔn edzi akyerɛ hom ekyir yi.
15 Hɔn a wɔtsetse dɛm no nhwɛ yie na wonnu hɔnho ntsɛm, amma atsɛmbu ammfa hɔn mprase, na hɔn nkwaseadze bɛda edzi, na hɔn ndwuma so bedzi hɔn ekyir ma nkorɔfo ehu.
16 Na nokwar, mese hom dɛ, dɛ mbrɛ makã akyerɛ hom dada no, nyia ɔhwɛ ɔbaa na no kɔn dɔ no, anaadɛ wɔbɔtõ awar wɔ hɔn akoma mu no, worinnya Sunsum no, na mbom wɔbɔpow gyedzi no na wobosuro.
17 Dɛm ntsi, emi, Ewuradze makã dɛ ehufo, nye ekyingyefo, nye atorfo nyina, nye obiara a ɔdɔ na odzi ator, nye edwamambɔnyi, nye nkaberkyernyi benya hɔn kyɛfa wɔ baka a ɔdzɛw ogya nye brimstone, dza ɔyɛ owu mprenu no mu.
18 Nokwar mese dɛ, worinnya kyɛfa wɔ owusoɛr a odzi kan no mu.
19 Na afei hwɛ, emi, Ewuradze, mese hom dɛ hom nndzi bem, osiandɛ ndzɛmba yinom wɔ hom mu.
20 Naaso, nyia otsim gyedzi mu kɔ ewiei na ɔyɛ m’apɛdze no, sɛ nsakyer da no ba a, dɛm nyimpa no bedzi konyim, na obenya egyapadze wɔ asaase yi do;
21 Ber a wɔbɛsakyer asaase yi, tse dɛ nhwɛdo a woyii kyerɛɛ m’asomafo no wɔ bepɔw no do no; dɛm asɛm no ne mãhyɛ no hom nsa nnyae nnkae.
22 Na afei, nokwar, mese hom dɛ, dɛ mbrɛ mekãa kyerɛɛ hom, dɛ mebɛda me pɛ edzi akyerɛ hom no, hwɛ, mebɛda no edzi akyerɛ hom, nnyɛ wɔ mbrasɛm kwan do, osiandɛ dodowara wɔ hɔ a wonndzi me mbrasɛm do.
23 Mbom nyia odzi me mbrasɛm do no, mibeyi m’ahenman mu esumadze akyerɛ no, na ɔbɛyɛ nkwa nsubura wɔ no mu, na ɔapem akɔ nkwa a ɔwɔ hɔ daapem mu.
24 Na afei, hwɛ, iyi nye Ewuradze hom Nyankopɔn ne pɛ a ɔfa n’ahotseweefo ho, dɛ wɔbɔboa hɔn ano na wɔakɔ Zion asaase do, mma wɔnnkɔ no ɔhardo, amma basabasayɛ ennsi, dza ɔdze yardɔm bɛba.
25 Hwɛ, Zion asaase no—Emi, Ewuradze na okitsa mankasa me nsamu;
26 Naaso, Emi, Ewuradze, medze ndzɛmba a ɔyɛ Cæsar dze no ma Cæsar.
27 Dɛm ntsi, Emi, Ewuradze mepɛ dɛ hom totɔ nsaase no, ama hom eedzi wiadze ewuramim, ama hom nsa aada wiadze do, amma wɔaanngyegye hɔn ebufuw.
28 Osiandɛ Satan dze ebufuw ahyɛ hɔn akoma mu dze etsia hom, dɛ wɔnkã hom bɔgya ngu.
29 Dɛm ntsi, mma hom nngye Zion asaase no kwa mbom wɔntɔ, anaadɛ wɔmmfa bɔgya nngye, annyɛ dɛm a ɔrennyɛ hom egyapadze.
30 Na sɛ hom tɔ a, hwɛ wobehyira hom.
31 Na sɛ hom kã bɔgya gu, wɔ ber a wɔabra hom dɛ mma hom nnkã bɔgya nngu a, hwɛ, hom atamfo bɔsoɛr hom do, na wɔahwe hom mbaa fi kurow do akɔ kurow do, fi nhyiamudan mu akɔ nhyiamudan mu, na kumaabi na wobegyina na hɔn nsa akã egyapadze.
32 Emi, Ewuradze, mo bo efuw emumuyɛfo; morotwe mo Sunsum efi nyimpa a wɔwɔ asaase do no do.
33 Makã ntam wɔ m’ebufuhyew mu, na mahyɛ mom dɛ akõkoekõ mbra asaase enyi do, na emumuyɛfo bokuku emumuyɛfo, na obiara bosuro;
34 Na ɔbɛyɛ dzen dɛ ahotseweefo so mpo befi nsa; naaso, emi, Ewuradze, menye hɔn wɔ hɔ, na mibefi m’Egya n’enyim wɔ sor esian aba na medze ogya a onndum da abɛhyew emumuyɛfo.
35 Na hwɛ, iyi nnyaa mmbae seseiara, na mbom ɔbɛba.
36 Dɛm ntsi, hom ehu dɛ Emi, Ewuradze na mahyɛ ndzɛmba yinom nyina ho mom wɔ asaase yi enyi do, mepɛ dɛ m’ahotseweefo hyia mu wɔ Zion asaase do;
37 Na ɔsɛ dɛ nyimpa biara fa tseneneeyɛ kitsa ne nsamu, na ɔfa nokwardzi bɔ n’asen do, na ɔma kɔkɔbɔ ndze do bɔ dawur kyerɛ nyimpa a wɔwɔ asaase do; hom nkã asɛm no nkyerɛ hɔn wɔ ber a hom ruguan so, dɛ amamfoyɛ bɛba emumuyɛfo do.
38 Dɛm ntsi, hom mma m’esuafo a wɔwɔ Kirtland no a wɔtse dɛm haban yi mu no mboaboa hɔn ndzɛmba ano.
39 Wɔmma m’akowaa Titus Billings a ɔhwɛ hɔn do no ntɔn asaase no, ama oeetum esiesie noho ama fefɛw ber a ɔreba yi na oeetu kwan akɔ Zion asaase do, ɔnye hɔn a wɔtse n’enyi hɔ nyina nkɔ ma ɔnka hɔn a meyi hɔn ama moho no nko, dɛ mma wɔnnkɔ nkesi ber a mebɛhyɛ hɔn dɛ wɔnkɔ.
40 Na sika nyina a hom botum dze ato hɔ no, dɛ osuar anaa ɔsõ no, ɔmmfa mo ho, wɔmfa nkɔ Zion asaase do nkɛma nkorɔfo a meyi hɔn dɛ wɔngyegye no.
41 Hwɛ, emi, Ewuradze, mebɛma m’akowaa Joseph Smith, Kakraba, tum a ɔbɛma oetum enya Sunsum mu nhumu akyerɛ hɔn a wɔbɔkɔ Zion asaase no do, nye m’esuafo hɔn mu binom so a wɔbɔtweɔn.
42 Wɔmma m’akowaa Newel K. Whitney nkɔ n’eguadzi no do, anaadɛ ɔnhwɛ efiadze no do mber kakra.
43 Mbom sika dodow biara a obotum eyi ama no, ɔmma wɔmfa nkɔ Zion asaase do.
44 Hwɛ, ndzɛmba yinom nyina wɔ nankasa ne nsamu, dɛm ntsi, ma ɔnyɛ dza ɔhwɛ a ɔyɛ enyansadze ma no.
45 Nokwar, mese dɛ, ma wɔnyɛ no ananmusinyi wɔ m’esuafo no a wɔbɔtweɔn no do, na ma wɔmfa tum no nhyɛ ne nsa;
46 Na afei enye m’akowaa Oliver Cowdery nyɛ ntsɛm nkɛsera nsɔr no, na hom nsiansian ndzɛmba yinom nyina mu nkyerɛ hɔn. Hwɛ, iyi nye me pɛ, dɛ hom ngyegye sika dɛ mbrɛ makyerɛ hom no.
47 Nyia obedzi nokwar na oetsim no, obedzi wiadze do konyim.
48 Nyia ɔbɛma egudze ma wɔdze akɔ Zion asaase do no benya egyapadze wɔ wiadze yi mu, na no ndwuma bedzi n’ekyir, na obenya akatua so wɔ wiadze a ɔbɛba no mu.
49 Nyew, na nhyira nkã ewufo a wowu wɔ Ewuradze mu, ofitsi aber yi dze kɔ aber a Ewuradze bɛba, ndzɛmba dadaw nyina botwa mu akɔ, na ndzɛmba nyina bɛyɛ fofor, na wɔbɔsoɛr efi owu mu, na worunnwu bio, na wobenya egyapadze wɔ Ewuradze enyim, wɔ kuropɔn krɔnkrɔn no mu.
50 Na nyia ɔtse ase ber a Ewuradze bɛba na oesie gyedzi no, wobehyira no; mbom wɔahyehyɛ ato hɔ dɛ sɛ onyin yɛ panyin a, otwar dɛ owu.
51 Dɛm ntsi, mbofra benyin ekodu dɛ wɔbɛyɛ nkɔdaa; nkɔdaa bowu; mbom wɔrennda huntuma mu, wɔbɛsakyer hɔn ntsɛmara.
52 Dɛm ntsi, na asomafo no kãa wusoɛr ho asɛm kyerɛɛ wiadze no.
53 Ndzɛmba yinom nye dza ɔsɛ dɛ hom hwehwɛ; na dɛ mbrɛ Ewuradze kãe no, ɔabɛn, na ɔnnkɛkyɛr na ɔaba, ɔbɛba mpo wɔ da a Nyimpa Ba no bɛba.
54 Na ansaana dɔn no bɔsõ no, mbaabun nkwaseafo bɔfora enyansafo no mu; na aber no wobeyi atseneneefo efi emumuyɛfo mu koraa; na da no mu mobɔsoma m’abɔfoe ma wɔabɛpa emumuyɛfo na wɔatow hɔn egu ogya a onndum da no mu.
55 Na afei, hwɛ, nokwar, mese hom dɛ, emi Ewuradze m’enyi nngye m’akowaa Sidney Rigdon ho, ɔmema noho do wɔ n’akoma mu na onntsie afotu, na mbom ɔhow Sunsum no werɛ;
56 Dɛm ntsi, dza ɔakyerɛw no nnsɔ Ewuradze n’enyi, na ɔwɔ dɛ ɔkyerɛw fofor; na sɛ Ewuradze anngye a, hwɛ orinngyina dzibew a emi medze no esi no bio.
57 Na bio, nokwar, mese hom dɛ, hɔn a woenya pɛ wɔ hɔn akoma mu, wɔ ɔdwe mu dɛ wɔbɔbɔ ndzɛbɔnyɛfo kɔkɔ ma woeenu hɔnho efi hɔn bɔn ho no, ma wɔnhyɛ hɔn asɔfo ma wonya dɛm tum yi.
58 Na dɛm da yi yɛ kɔkɔbɔ da, na nnyɛ da a wɔkasa pii wɔ mu. Na Emi, Ewuradze, onnyi dɛ wosi me atwetwe wɔ nda a odzi ekyir yi mu.
59 Hwɛ, mifi sor, na mo tum wɔ asaase do. Mobɔ adze nyina do, na mowɔ adze nyina mu, na mudua adze nyina mu, na da bi bɛba a ndzɛmba nyina bɛhyɛ m’ase.
60 Hwɛ, emi nye Alpha na Omega, Jesus Christ no mpo.
61 Dɛm ntsi, hom mma nyimpa nyina nhwɛ yie wɔ kwan a wɔfa do bɔ me dzin wɔ hɔn ano no ho—
62 Na hwɛ, nokwar, mese dɛ, dodowara wɔ hɔ a wɔhyɛ afɔbu yi ase, hɔn a wɔbɔ Ewuradze ne dzin egyangyan, na wonnyi tumdzi no.
63 Dɛm ntsi, ma asɔr no nnu hɔnho wɔ hɔn bɔn ho, na emi, Ewuradze, mebɛfa hɔn ayɛ medze, annyɛ dɛm a, wobotwa hɔn akyen.
64 Hom nkaa dɛ dza ofi sor no yɛ krɔnkrɔn, na ɔwɔ dɛ wɔdze ahwɛyie kã ho asɛm, na wɔma Sunsum no pem hɔn adze; na dɛm nnkɛma afɔdzi biara aba, na hom nam mpaabɔ do nya Sunsum no; dɛm ntsi, sɛ wɔannyɛ iyi a, nna afɔbu wɔ hɔ ma hom.
65 Ma mo nkowaa, Joseph Smith, Kakraba, nye Sidney Rigdon nhwehwɛ fie mma hɔn, na sɛ wɔbɔ mpaa a Sunsum no bɛkyerɛ hɔn dza wɔnyɛ.
66 Ndzɛmba yinom wɔ hɔ, na wɔdze abotar bedzi do konyim, na dɛm bɛma woenya onnyiewiei enyimnyam a ɔyɛ dur, sɛ annyɛ dɛm a, wobenya afɔdzi kɛsenara. Amen.