ພາກທີ 78
ການເປີດເຜີຍທີ່ມອບໃຫ້ຜ່ານໂຈເຊັບ ສະມິດ ຜູ້ເປັນສາດສະດາ, ທີ່ເມືອງເຄີດແລນ, ລັດໂອໄຮໂອ, ວັນທີ 1 ເດືອນມີນາ, 1832. ໃນມື້ນັ້ນ, ສາດສະດາ ແລະ ຜູ້ນຳຄົນອື່ນໆ ໄດ້ເຕົ້າໂຮມກັນ ເພື່ອສົນທະນາກ່ຽວກັບທຸລະກິດຂອງສາດສະໜາຈັກ. ສາເຫດຕົ້ນເດີມຂອງການເປີດເຜີຍນີ້ ແມ່ນເພື່ອແນະນຳສາດສະດາ, ຊິດນີ ຣິກດອນ, ແລະ ນິວເອັນ ເຄ ວິດນີ ໃຫ້ເດີນທາງໄປຫາລັດມີເຊີຣີ ແລະ ສ້າງຕັ້ງຮ້ານຄ້າ ແລະ ໂຮງພິມຂອງສາດສະໜາຈັກຂຶ້ນ ໂດຍການສ້າງ “ກຸ່ມທຸລະກິດ” ເພື່ອບໍລິຫານພາລະກິດເຫລົ່ານີ້, ເພື່ອຫາທຶນມາເສີມສ້າງຊີໂອນ ແລະ ເພື່ອຜົນປະໂຫຍດຂອງຄົນຍາກຈົນ. ກຸ່ມທຸລະກິດນີ້ເປັນທີ່ຮູ້ຈັກກັນວ່າ ກຸ່ມທຸລະກິດເອກະພາບ, ໄດ້ຖືກຈັດຕັ້ງຂຶ້ນໃນເດືອນເມສາ 1832 ແລະ ໄດ້ລົ້ມເລີກໄປໃນປີ 1834 (ເບິ່ງ ພາກທີ 82). ບໍ່ດົນຫລັງຈາກການລົ້ມເລີກນັ້ນ, ພາຍໃຕ້ການຊີ້ນຳຂອງໂຈເຊັບ ສະມິດ, ສຳນວນທີ່ວ່າ “ຄັງພາລະກິດສຳລັບຄົນຍາກຈົນ” ໄດ້ຖືກໃຊ້ແທນ “ຮ້ານຄ້າ ແລະ ໂຮງພິມ” ໃນການເປີດເຜີຍ, ແລະ ຄຳທີ່ວ່າ “ລະບົບ” ໄດ້ຖືກໃຊ້ແທນຄຳວ່າ “ກຸ່ມທຸລະກິດ.”
1–4, ໄພ່ພົນຂອງພຣະເຈົ້າຄວນຈັດຕັ້ງ ແລະ ສະຖາປະນາຄັງຂຶ້ນ; 5–12, ການໃຊ້ຊັບສິນຂອງພວກເຂົາຢ່າງສະຫລາດຈະນຳໄປສູ່ຄວາມລອດ; 13–14, ສາດສະໜາຈັກຄວນເປັນອິດສະລະຈາກອຳນາດຂອງແຜ່ນດິນໂລກ; 15–16, ມີຄາເອນ (ອາດາມ) ຮັບໃຊ້ພາຍໃຕ້ການຊີ້ນຳຂອງພຣະຜູ້ບໍລິສຸດ (ພຣະຄຣິດ); 17–22, ຄົນທີ່ຊື່ສັດເປັນສຸກແລ້ວ, ເພາະພວກເຂົາຈະໄດ້ຮັບທຸກສິ່ງທັງປວງເປັນມູນມໍລະດົກ.
1 ພຣະຜູ້ເປັນເຈົ້າໄດ້ກ່າວກັບໂຈເຊັບ ສະມິດ, ຜູ້ລູກ, ໂດຍກ່າວວ່າ: ຈົ່ງເຊື່ອຟັງເຮົາ, ພຣະຜູ້ເປັນເຈົ້າອົງເປັນພຣະເຈົ້າຂອງເຈົ້າໄດ້ກ່າວ, ຜູ້ໄດ້ຮັບການແຕ່ງຕັ້ງສູ່ ຖານະປະໂລຫິດສູງແຫ່ງສາດສະໜາຈັກຂອງເຮົາ, ຜູ້ໄດ້ມາຮ່ວມຊຸມນຸມກັນ;
2 ແລະ ຟັງ ຄຳແນະນຳຂອງພຣະອົງຜູ້ໄດ້ ແຕ່ງຕັ້ງເຈົ້າຈາກເບື້ອງບົນ, ຜູ້ຈະກ່າວຄຳແຫ່ງປັນຍາໃສ່ຫູຂອງເຈົ້າ, ເພື່ອຄວາມລອດຈະເກີດກັບເຈົ້າໃນສິ່ງນັ້ນຊຶ່ງເຈົ້າໄດ້ສະເໜີຕໍ່ເຮົາ, ອົງພຣະຜູ້ເປັນເຈົ້າໄດ້ກ່າວ.
3 ເພາະຕາມຄວາມຈິງແລ້ວ ເຮົາກ່າວກັບເຈົ້າວ່າ, ເວລາໄດ້ມາເຖິງແລ້ວ, ແລະ ບັດນີ້ຢູ່ພຽງແຄ່ເອື້ອມ; ແລະ ຈົ່ງເບິ່ງ, ແລະ ເບິ່ງແມ, ຈຳເປັນທີ່ຈະຕ້ອງ ຈັດລະບຽບຜູ້ຄົນຂອງເຮົາ, ໃນການດູແລ ແລະ ການຈັດຕັ້ງວຽກງານໃນ ຄັງສຳລັບ ຄົນຍາກຈົນຂອງຜູ້ຄົນຂອງເຮົາ, ທັງໃນສະຖານທີ່ນີ້ ແລະ ໃນແຜ່ນດິນ ຊີໂອນ—
4 ເພື່ອຈະມີການຈັດຕັ້ງ ແລະ ລະບົບອັນເປັນນິດ ແລະ ຖາວອນສຳລັບສາດສະໜາຈັກຂອງເຮົາ, ເພື່ອໃຫ້ອຸດົມການກ້າວໄປໜ້າ, ຊຶ່ງເຈົ້າໄດ້ສະໜັບສະໜູນ, ເພື່ອຄວາມລອດຂອງມະນຸດ, ແລະ ເພື່ອລັດສະໝີພາບຂອງພຣະບິດາຂອງເຈົ້າຜູ້ສະຖິດຢູ່ໃນສະຫວັນ;
5 ເພື່ອວ່າເຈົ້າຈະ ເທົ່າທຽມກັນໃນພັນທະການຂອງເລື່ອງແຫ່ງສະຫວັນ, ແທ້ຈິງແລ້ວ, ແລະ ເລື່ອງແຫ່ງແຜ່ນດິນໂລກນຳອີກ, ເພື່ອຈະໄດ້ຮັບເລື່ອງແຫ່ງສະຫວັນ.
6 ເພາະຖ້າຫາກເຈົ້າບໍ່ເທົ່າທຽມກັນໃນເລື່ອງແຫ່ງແຜ່ນດິນໂລກ ແລ້ວເຈົ້າຈະເທົ່າທຽມກັນໃນເລື່ອງແຫ່ງສະຫວັນບໍ່ໄດ້;
7 ເພາະຖ້າຫາກເຈົ້າຢາກໃຫ້ເຮົາປະທານສະຖານທີ່ໃນໂລກ ຊັ້ນສູງໃຫ້ເຈົ້າ, ແລ້ວເຈົ້າຕ້ອງ ຕຽມຕົວເອງ ໂດຍ ການເຮັດສິ່ງທີ່ເຮົາໄດ້ບັນຊາເຈົ້າ ແລະ ຮຽກຮ້ອງຈາກເຈົ້າ.
8 ແລະ ບັດນີ້, ຕາມຄວາມຈິງແລ້ວ ພຣະຜູ້ເປັນເຈົ້າໄດ້ກ່າວດັ່ງນີ້, ມັນຈຳເປັນທີ່ທຸກສິ່ງທັງປວງຖືກກະທຳໄປເພື່ອ ລັດສະໝີພາບຂອງເຮົາ, ໂດຍພວກເຈົ້າຜູ້ມາຮວມກັນຢູ່ໃນ ລະບົບນີ້;
9 ຫລື, ອີກຄຳໜຶ່ງ, ໃຫ້ຜູ້ຮັບໃຊ້ຂອງເຮົາ ນິວເອັນ ເຄ ວິດນີ ແລະ ຜູ້ຮັບໃຊ້ຂອງເຮົາ ໂຈເຊັບ ສະມິດ, ຜູ້ລູກ, ແລະ ຜູ້ຮັບໃຊ້ຂອງເຮົາ ຊິດນີ ຣິກດອນ ນັ່ງຢູ່ໃນສະພາກັບໄພ່ພົນຂອງພຣະເຈົ້າ ຊຶ່ງຢູ່ໃນຊີໂອນ;
10 ຖ້າບໍ່ດັ່ງນັ້ນ ຊາຕານຈະພະຍາຍາມຫັນຫົວໃຈຂອງພວກເຂົາໄປຈາກຄວາມຈິງ, ຈົນວ່າພວກເຂົາກາຍເປັນຄົນຕາບອດ ແລະ ບໍ່ເຂົ້າໃຈສິ່ງທີ່ໄດ້ຕຽມໄວ້ສຳລັບພວກເຂົາ.
11 ດັ່ງນັ້ນ, ເຮົາຈະມອບບັນຍັດຂໍ້ໜຶ່ງໃຫ້ແກ່ເຈົ້າ, ເພື່ອຕຽມ ແລະ ວາງລະບຽບຕົນເອງໂດຍພັນທະ ຫລື ພັນທະສັນຍາອັນເປັນນິດທີ່ຝ່າຝືນບໍ່ໄດ້.
12 ແລະ ຄົນໃດທີ່ຝ່າຝືນສິ່ງນີ້ຈະສູນເສຍໜ້າທີ່ ແລະ ຕຳແໜ່ງຂອງຕົນໃນສາດສະໜາຈັກ, ແລະ ຈະຖືກສົ່ງໄປຮັບເອົາ ຄວາມທຸກທໍລະມານຂອງຊາຕານຈົນເຖິງວັນແຫ່ງການໄຖ່.
13 ຈົ່ງເບິ່ງ, ນີ້ເປັນການຕຽມ ດ້ວຍເຫດນີ້ເຮົາຈຶ່ງໄດ້ຕຽມເຈົ້າ, ແລະ ຮາກຖານ, ແລະ ແບບຢ່າງ ຊຶ່ງເຮົາໄດ້ມອບໃຫ້ແກ່ເຈົ້າ, ຊຶ່ງໂດຍການນີ້ເຈົ້າຈະເຮັດໃຫ້ບັນຍັດ ຊຶ່ງໄດ້ມອບໃຫ້ແກ່ເຈົ້າບັນລຸຜົນສຳເລັດ;
14 ເພື່ອວ່າຜ່ານການອາລັກຂາຂອງເຮົາ, ເຖິງແມ່ນ ຄວາມທຸກຍາກລຳບາກຊຶ່ງຈະມາເຖິງເຈົ້າ, ເພື່ອວ່າສາດສະໜາຈັກຈະຕັ້ງຢູ່ຢ່າງເປັນອິດສະລະເໜືອຊາວໂລກທັງປວງພາຍໃຕ້ໂລກຊັ້ນສູງ;
15 ເພື່ອວ່າເຈົ້າຈະໄດ້ຂຶ້ນມາຫາ ມົງກຸດທີ່ໄດ້ຕຽມໄວ້ສຳລັບເຈົ້າ, ແລະ ຖືກເຮັດໃຫ້ເປັນ ຜູ້ປົກຄອງເໜືອ ອານາຈັກຫລາຍແຫ່ງ, ອົງພຣະຜູ້ເປັນເຈົ້າໄດ້ກ່າວ, ພຣະຜູ້ສັກສິດຂອງຊີໂອນ, ຜູ້ໄດ້ວາງຮາກຖານຂອງ ອາດາມ-ອອນໄດ-ອາມັນ;
16 ຜູ້ໄດ້ແຕ່ງຕັ້ງ ມີຄາເອນໃຫ້ເປັນເຈົ້າຊາຍຂອງເຈົ້າ, ແລະ ສະຖາປະນາຕີນຂອງລາວໄວ້, ແລະ ວາງລາວໄວ້ຢູ່ບ່ອນສູງ, ແລະ ມອບຂໍກະແຈແຫ່ງຄວາມລອດໃຫ້ລາວ ພາຍໃຕ້ການແນະນຳ ແລະ ການຊີ້ນຳຂອງພຣະຜູ້ບໍລິສຸດ, ຜູ້ປາດສະຈາກການເລີ່ມຕົ້ນຂອງມື້ ຫລື ການສິ້ນສຸດຂອງຊີວິດ.
17 ຕາມຈິງ, ຕາມຈິງແລ້ວ, ເຮົາກ່າວກັບເຈົ້າ, ເຈົ້າເປັນເດັກນ້ອຍໆ, ແລະ ເຈົ້າຍັງບໍ່ເຂົ້າໃຈພອນອັນຍິ່ງໃຫຍ່ທີ່ພຣະບິດາມີໃນພຣະຫັດຂອງພຣະອົງ ແລະ ຕຽມໄວ້ໃຫ້ເຈົ້າເທື່ອ;
18 ແລະ ເຈົ້າບໍ່ສາມາດ ທົນກັບທຸກສິ່ງທັງປວງໄດ້ໃນຕອນນີ້; ເຖິງຢ່າງໃດກໍຕາມ, ຈົ່ງເບີກບານເຖີດ, ເພາະເຮົາຈະ ນຳພາເຈົ້າໄປ. ອານາຈັກເປັນຂອງເຈົ້າ ແລະ ພອນໃນນັ້ນເປັນຂອງເຈົ້າ, ແລະ ຄວາມຮັ່ງມີແຫ່ງ ຊົ່ວນິລັນດອນກໍເປັນຂອງເຈົ້າ.
19 ແລະ ຄົນທີ່ຮັບເອົາທຸກສິ່ງທັງປວງດ້ວຍ ຄວາມຂອບຄຸນຈະຖືກເຮັດໃຫ້ຮຸ່ງເຫລື້ອມ; ແລະ ສິ່ງຂອງ ຂອງແຜ່ນດິນໂລກຈະຖືກຕື່ມໃຫ້ເຂົາ, ແມ່ນແຕ່ ຮ້ອຍເທົ່າ, ແທ້ຈິງແລ້ວ, ຫລາຍກວ່ານັ້ນ.
20 ດັ່ງນັ້ນ, ຈົ່ງເຮັດສິ່ງທີ່ເຮົາໄດ້ບັນຊາເຈົ້າ, ພຣະຜູ້ໄຖ່ຂອງເຈົ້າກ່າວ, ແມ່ນແຕ່ພຣະບຸດ ອາມັນ, ຜູ້ໄດ້ຕຽມທຸກສິ່ງທັງປວງກ່ອນພຣະອົງຈະ ຮັບເອົາເຈົ້າໄປ;
21 ເພາະເຈົ້າເປັນ ສາດສະໜາຈັກຂອງພຣະບຸດຫົວປີ, ແລະ ພຣະອົງຈະ ຮັບເອົາເຈົ້າຂຶ້ນໄປໃນເມກ, ແລະ ກຳນົດສ່ວນທີ່ເປັນຂອງເຂົາໃຫ້ແຕ່ລະຄົນ.
22 ແລະ ຜູ້ພິທັກຮັກສາທີ່ຊື່ສັດ ແລະ ສະຫລາດຈະໄດ້ຮັບ ທຸກສິ່ງທັງປວງເປັນມູນມໍລະດົກ. ອາແມນ.