1 Եվ կրկին, ճշմարիտ ասում եմ ձեզ, իմ բարեկամնե՛ր, ես ձեզ մի պատվիրան եմ տալիս, որ դուք պետք է սկսեք նախագծել և նախապատրաստել Սիոնի ցցի քաղաքի սկիզբն ու հիմնադրումը, այստեղ՝ Կիրթլենդի հողում, սկսելով իմ տնից:

2 Եվ ահա, այն պետք է արվի այն օրինակի համապատասխան, որը ես տվել եմ ձեզ:

3 Եվ թող հարավի առաջին հողաբաժինը նվիրաբերվի ինձ, որպեսզի մի տուն կառուցվի նախագահության համար՝ նախագահության գործերի համար՝ հայտնություններ ստանալու համար. և նախագահության ծառայության գործի համար՝ եկեղեցուն և թագավորությանը պատկանող բոլոր բաներում:

4 Ճշմարիտ ասում եմ ձեզ, որ այն պետք է կառուցվի հիսունհինգ ոտնաչափ լայնությամբ և վաթսունհինգ ոտնաչափ երկարությամբ ներսի գավիթով:

5 Եվ պիտի լինի ստորին գավիթ և վերին գավիթ՝ այն օրինակի համաձայն, որը ձեզ կտրվի ապագայում:

6 Եվ այն պիտի նվիրաբերվի Տիրոջը, հիմքից սկսած, քահանայության կարգի համաձայն, այն օրինակի համաձայն, որը ձեզ կտրվի ապագայում:

7 Եվ այն ամբողջությամբ պիտի նվիրաբերվի Տիրոջը՝ նախագահության գործի համար:

8 Եվ դուք թույլ չեք տա, որ որևէ անմաքուր բան ներս մտնի այնտեղ. և իմ փառքը կլինի այնտեղ, և իմ ներկայությունը կլինի այնտեղ:

9 Բայց եթե այնտեղ մի անմաքուր բան մտնի, իմ փառքը չի լինի այնտեղ. և իմ ներկայությունը չի լինի այնտեղ:

10 Եվ բացի այդ, ճշմարիտ ասում եմ ձեզ, որ հարավի երկրորդ հողաբաժինը պիտի նվիրաբերվի ինձ, որ ինձ համար մի տուն կառուցվի, որպեսզի տպագրվի իմ սուրբ գրքերի թարգմանությունը, և բոլոր բաները, ինչ որ ես կպատվիրեմ ձեզ:

11 Եվ այն պիտի լինի հիսունհինգ ոտնաչափ լայնությամբ և վաթսունհինգ ոտնաչափ երկարությամբ ներսի գավիթով. և պիտի լինի ստորին և վերին գավիթ:

12 Եվ այդ տունն ամբողջությամբ պիտի նվիրագործվի Տիրոջը, հիմքից սկսած՝ տպագրական աշխատանքի համար, բոլոր բաների համար, որոնք ես կպատվիրեմ ձեզ, որ բոլոր բաներում սուրբ և անապական լինի՝ համաձայն այն օրինակի, որը կտրվի ձեզ:

13 Եվ երրորդ հողաբաժնի վրա իմ ծառա Հայրում Սմիթը պիտի ստանա իր ժառանգությունը:

14 Եվ հյուսիսում՝ առաջին և երկրորդ հողաբաժնի վրա, իմ ծառաներ Ռեյնոլդս Քահունն ու Ջարեդ Քարտերը պիտի ստանան իրենց ժառանգությունները,–

15 Որպեսզի նրանք կարողանան կատարել այն աշխատանքը, որին նշանակել եմ նրանց, որ հանձնախումբ կազմեն իմ տները կառուցելու համար, համաձայն այն պատվիրանի, որը ես՝ Տեր Աստվածս, տվել եմ ձեզ:

16 Այդ երկու տները չպետք է կառուցվեն, մինչև որ դրանց վերաբերյալ ես ձեզ պատվիրան չտամ:

17 Եվ արդ, ավելին ես ձեզ չեմ տալիս այժմ: Ամեն: