O Paionia i Atunuu Uma
Géoffroy Koussemou
Faifeautalai Muamua mai Benin
Sa iloa e Géoffroy sa naunau le Atua e fesoasoani ia te ia pe afai na fai lana vaega.
Sa savavali i fafo mai le vasega ia Géoffroy ma lana uo o Théodore. Sa tai 16 tausaga o le aualii, ma sa nonofo i Benin, o se atunuu i Aferika. Sa la o i se aoga fou e aoao ai i le faiga o faatoaga. O le taimi muamua lea ua la nonofo ese ai mai o laua aiga. E tatau ona la suesue ma galulue mo ni itula uumi i aso uma.
Sa toso a’e e Géoffroy lana ato faafafa i luga o lona tauau. “Pei lava o le a ou nofo mai le aoga. Ua faigata tele nei vasega.”
“Leai!” Na fai atu ai Théodore. “Aua e te nofo. E tatau ona e faalagolago i le Atua. A e faia, o le a faamanuiaina oe.
O upu a Théodore sa mau pea ia Géoffroy i le aso atoa. Sa ola a’e Géoffroy o se Kerisiano, ae sa lei taumafai lava e faalagolago i le Atua. Sa tootuli o ia i luga o le fola, ae sa lei amata ona tatalo. Sa popole o ia. Ae afai na te le maua mai se fesoasoani mai se mea, o le a le mafai lava ona pasi ana vasega. Sa punou lemu ifo le ulu o Géoffroy.
“Le Tama oi Lagi,” na ia fai atu ai, “faamolemole faaali mai ia te au pe faapefea ona faalagolago atu ia te oe. E mafai ona e fesoasoani mai faamolemole ia pasi au vasega? Ou te folafola atu e auauna ia te oe i le mea sili ou te mafaia mo aso uma o totoe o lo’u ola.”
Mai lena taimi, sa lagona ai e Géoffroy le lototoa malosi atu ma le naunautai atili. Sa faigata pea vasega, ae sa ia iloaina sa naunau le Atua e fesoasoani mai ia te ia pe a fai lana vaega. Sa tuu ese e Géoffroy lona fefe ae galue malosi.
Sa lelei o ia i le aoga. I le sefuluvalu masina mulimuli ane, ua saunia o ia e faauu. Na mafai ona ia faia!
Ina ua ia tuua le aoga, sa faaauau pea ona galue malosi Géoffroy. Sa lei umi ae maua sana ia lava faatoaga.
Ona oo lea i se tasi aso, sa ia vaai ai i sana uo o se tagata O Le Ekalesia a Iesu Keriso o le Au Paia o Aso e Gata Ai. Sa tuuina atu e lana uo ia te ia se Tusi a Mamona. Sa faitau e Géoffroy le Tusi a Mamona ma tatalo. Sa ia lagonaina le mafanafana ma le toafilemu i lona loto ma sa ia mautinoa e moni le Ekalesia.
Ua uma ona ia iloa le isi mea e fai. Sa galue, tatalo, ma faalagolago o ia i le Atua. Muamua, sa papatiso o ia. Ona ia faasoa atu lea o lana molimau ia i latou na siomia o ia. Sa papatiso foi nisi o ana uo. O le mea na amata o se vaega toaitiiti o tagata o le Ekalesia na vave lava ona ola ma avea o se paranesi. Sa fesoasoani o ia i le tuputupu ae o le Ekalesia i Benin!
Sa manao Géoffroy e alu i se misiona. Sa lei lava ni ana tupe, o lea sa ia faatau atu ai lana faatoaga. I ni nai masina mulimuli ane, sa ia maua se valaauga e faamisiona i Ivory Coast. O ia o le faifeautalai muamua mai Benin e maua se valaauga faamisiona!
Sa fesoasoani lona tuuto ia te ia mo le tele o tausaga. Ona o lona faatuatua, ma le faatuatua o isi tagata o le Ekalesia, ua toatele ai isi tagata na papatisoina. Na avea lana paranesi ma se uarota. O lena uarota ua avea nei ma se vaega o le uluai siteki i Benin!
O loo faaauau pea e Géoffroy Koussemou ona galue malosi ma faalagolago i le Atua. Ua ia iloa e mafai ona tutupu mea maoae i le fesoasoani mai a le Atua. ●
Ata na tusia e Isabel Munoz