Tau Lava O se Taavale La’u Pasese se Tasi
E alala le tusitala i Karolaina i Matu, ISA.
“Fesoasoani mai ia matou maua tau lava o se taavale la’u pasese se tasi ina ia matou oo atu ai i le lotu nei,” sa tatalo ai teineiti.
O lenei tala na tupu i Cantabria, Sepania.
“O le a faapefea ona tatou oo atu i le lotu nei?” Na fesili ai le uso laitiiti o Ellie, o Peppa. “Ua matuai timuga tele!”
“Aua e te popole,” o le tala lea a Ellie. “Ta te totoa!”
Sa fesoasoani Ellie ia Peppa e faamau lona ofutele. Ona faamaulu lea o ona lava seevae pa’u soloatoa.
Sa savavali atu Ellie ma Peppa i fafo ma Mama ma Papa. Sa matuai tetele lava timuga. Na faamafiti e le matagi le la faamalu. Sa tau le lagona e Ellie se lototoa.
“O le a se mea e tatau ona ta faia?” Na fesili ai Ellie. Sa malosi tele le matagi na faigata ai ona savavali atu i le pasi.
“O le a pu’e se tatou taavale la’u pasese,” o le tala lea a Papa.
“Manaia le manatu,” na fai mai ai Mama. “Tatou o!”
Sa latou savavali atu i le auala lolovaia. Sa leai ni taavale la’u pasese po o ni taavale na pasi ane. E oo lava i le panadería (falefalaoa) na tapuni foi.
Mulimuli ane sa latou iloa atu le nofoaga e paka ai taavale la’u pasese e piki ai tagata. Ae sa leai se taavale na tu i le avanoa muamua o taavale la’u pasese.
“Auoi leai!” Na fai mai ai Peppa.
“Está bien. E le afaina,” o le tala lea a Ellie. “E tatau ona i ai se isi taavale. Ae le o mafai ona tatou iloa atu i le taimi nei.
Sa latou savavali latalata atu i ai. Sa avanoa foi le isi paka taavale na sosoo ai.
“O le a faapefea nei la?” o le fesili lea a Peppa.
“Ua ou iloa,” o le tala lea a Ellie. “Ta tatalo!”
Sa musumusu e teineiti se tatalo. “Nuestro Padre Faaselesitila, faamolemole fesoasoani mai ia matou maua tau lava o se taavale la’u pasese se tasi ina ia mafai ona matou oo atu i le lotu nei. O loo matou taumafai e filifili le mea sa’o, ae ua faafaigata e le timuga lenei. En el nombre de Jesucristo, amén.” Sa aoao pea e Ellie le faaSipaniolo, o lea sa ia faafefiloia ai le Igilisi ma le faaSipaniolo.
Sa latou toe savalivali teisi atu. Sa gaogao foi le isi paka taavale na sosoo ai.
“Atonu e tatau ona tatou toe liliu ma toe foi i le fale,” o le valaau leotele mai lea a Papa i le matagi.
“Ua pala uma o tatou vae!” o le tala lea a Mama.
“Sei tatou toe o atu teisi lava,” o le tala lea a Ellie. “E na’o le tasi lava se taavale la’u pasese tatou te manaomia.”
Ua mafai nei ona latou iloa atu le paka mulimuli.
O iina, faatasi ai ma ona molī lanumeamata o loo ola, o loo i ai se taavale la’u pasese!
Sa feosofi Peppa ma Ellie i totonu o le taavale la’u pasese. Sa fesoasoani Mama e fai faalelei o la lauulu. “Faamalie atu ua susū au nofoa ia i matou,” o le tala lea a Papa i le avetaavale.
Sa latou taunuu atu i le falesa ma faafeiloai ia latou uo i besos ma abrazos (sogi ma opo).
“Ou te le talitonu na tatou maua se taavale la’u pasese,” o le tala lea a Mama. “¡ Que suerte!”
“Sa le o se laki,” o le tala lea a Ellie. “Sa ma tatalo ma Peppa ina ia fesoasoani mai le Tama Faalelagi ia tatou oo mai i le lotu. Ma sa faafofoga mai o Ia!” ●