O le Tatalo [mo] le Pāpā Falaoa
E alala le tusitala i Iuta, ISA.
E faapefea ona e iloa pe o talanoa mai le Agaga Paia ia te oe?
“Ia tuu atu lou faalagolago i le Agaga lena lea na te taitai ia fai mea lelei” (Mataupu Faavae ma Feagaiga 11:12).
“E faapefea ona e iloa le taimi e talanoa mai ai le Agaga Paia ia te oe?” Sa ea a’e Kava mai ana tusitusiga paia.
Sa ataata Tama ma tuu i lalo lana tusi o le Sau, Mulimuli Mai ia te A’u . “E tele auala e mafai ona talanoa atu ai le Agaga Paia ia te oe. O nisi taimi o se lagona, po o se manatu e oso i totonu o lou mafaufau.”
Na faanonou [foliga] o Kava. Ae e faapefea ona e iloa o le Agaga Paia?
“Atonu e mafai ona tatou faia se tatalo e fesoasoani ia tatou maua ai le tali,” o le tala lea a Tina.
Sa fai e se tasi o uso o Kava le tatalo. Ona latou o atu ai lea i le aoga. Sa mafaufau Kava i lana fesili i le aso atoa.
Ina ua taunuu i le fale, sa sasala le manogi manaia o le fale. “Falaoa!” O le alaga lea a Kava.
“Sa’o lelei,” na fai mai ai Tina. “Sa ou faia ni falaoa tatou te faasoa atu i isi.”
Sa tilotilo atu Kava i ona uso. Sa faanunumi le isu o Eva. Sa faaō i luga e Sieni ona fulufulumata. “O lona uiga tatou te le aai ai?” Na fesili atu ai Sieni.
“Sa ma mananao e faataitai ona tatou faalogo i le Agaga Paia,” o le tala lea a Tama. “O lea na faatū mai ai e Tina se manatu.”
O le a latou tatalo taitoatasi e fesili atu i le Tama Faalelagi po o ai o ono manaomia le lagona alofaina i lenei aso. Ona latou tuuina atu lea o se falaoa i lena tagata.
Sa tootuli Kava i autafa o lona moega. Sa manao o ia e faalogo i le Agaga Paia, ae na faapeī le leo o le Agaga Paia? Sa manavanava loloa ma moeiini ona mata.
“Le Tama Faalelagi, o ai o loo manaomia se falaoa i lenei aso?”
Sa taumafai Kava e faalogo mo le Agaga Paia, ae sa leai se mea na ia faalogoina. Ona ia manatua lea o le pasi mai i le fale o Uso Samita ao alu atu i le fale mai le aoga. E masani lava ona talotalo mai ia te ia. Atonu e fiafia o ia i falaoa. Manaia!
Sa tufa atu e Tina ni kata e tusi ai ni faamatalaga mo tagata o le a latou asia. Na tusia e Kava, “Le Pele Uso Samita, sa ou faia se tatalo e vaai po o ai le tagata e tatau ona ou tuuina atu i ai lenei falaoa. Sa ou faatali mo se uunaiga, ma o oe na OSO! mai i lo’u mafaufau. Alofa atu, o Kava.”
Ina ua oo atu le taavale a Tina i le fale o Uso Samita, sa uu mai e Kava lana pāpā falaoa ma savali atu i le faitotoa i luma. Sa lagona lona popole. Ae faafefea pe a le fiafia Uso Samita i falaoa? Ae faafefea pe afai o le asia o ia sa na o se manatu i lona mafaufau ae le o le Agaga Paia?
Ona manatua lea e Kava se isi mea na fai mai ai Tina. Na fai mai o ia, afai o se manatu lelei pe agalelei, e le tatau ona e popole pe ua na o ni ou lava mafaufauga. O mea mananaia e lelei i taimi uma ona faia! Sa manavanava loloa Kava ma faatatagi le logo o le faitotoa.
Na tatala mai e Uso Samita le faitotoa. “Talofa, Kava! O le a se mea ua e sau ai?”
Ua tuu atu e Kava le falaoa ia te ia. Sa tilotilo ifo o ia i ona seevae, ona toe tilotilo atu lea ia Uso Samita. “E te fiafia i falaoa e fai i le fale?”
“O se mea e sili ona ou fiafia i ai.” Sa ataata o ia. “Faafetai tele lava.”
Sa ataata foi Kava. “Faafetai foi!” Ona tulioso ae lea o nisi upu se tele i lona mafaufau. Sa mulimuli o ia i le uunaiga i le taimi lava lena. “Ua silafia e le Tama Faalelagi o le mea lea e sili ona e fiafia i ai. E alofa tele o Ia ia te oe!”
Sa amata ona loimatā mata o Uso Samita. “Ua ou fiafia e mafai ona faamoemoe mai o Ia ia te oe e logona o Ia.”
Na lagona e Kava le fiafia tele. Sa talotalo atu o ia ia Uso Samita ma toe savali atu i le taavale. O lea la ua ia iloa, o le tuuina atu o le falaoa ia Uso Samita sa o se uunaiga mai le Agaga Paia. Sa fiafia o ia e toe faalogo atu i le Agaga Paia! ●
Ata na tusia e Hollie Hibbert