Misia o Tinamatua ma Tamamatua
E nofo le tusitala i Kolorato, ISA.
E mafai faapefea ona misia e Zoe se tagata e lei feiloai lava i ai?
“O le a liliu atu loto o fanau i o latou tamā” (Mataupu Faavae ma Feagaiga 2:2).
Na ū e Zoe lana kuki. “Mānaia.”
“E pei uma lava o kuki lauiloa a Tinamatua,” o le tala lea a le tuagane matua a Zoe o Zach. “Sa ia faia ni kuki e sili ona manaia!”
Na maliliu matua o Tama a o lei fanau mai Zoe. O taimi uma lava e talanoa ai ona uso ma tuagane ma tausoga matutua e uiga ia Tinamatua ma Tamamatua.
“O lou tinamatua o se kuka lelei tele,” o le tala lea a Tama a o ia uuina mai se isi kuki. “Ou te misia lava na ’aiga i afiafi sa la faia ma Tamamatua i Aso Sa uma. Sa la valaaulia ai le aiga atoa i taimi uma.”
Mata e faapeī le iloa lelei o Tinamatua ma Tamamatua? Sa mafaufau ai Zoe.
Sa faalogologo Zoe i lona aiga o faamatala mai nisi tala e uiga i ona matua matutua. Sa fiafia o ia e faalogologo e uiga ia i laua, ae sa ia lagonaina foi le le aofia ai. Sa leai ni mea na te manatua e mafai ona faasoa atu.
I ni nai aso mulimuli ane sa i ai o ia i le fale o lona tausoga matua o Lili. I luga o le moega o Lili sa i ai se pepe meataalo ie.
“E ese le aulelei!” Sa fai atu ai Zoe. Sa ia tago malie atu i le ofu o le pepe meataalo.
“Sa aumai e Tinamatua ia te au,” o le tala lea a Lili. “Sa ia faia i taimi uma ni mea mananaia faapena. Ua ou misia lava o ia.”
“Ua ou misia foi o ia,” o le tala lea a Zoe. Ona ia faa’u’u lea. E faapefea ona ia misia se tagata e lei feiloai lava i ai?
I le aluga o le vaiaso na sosoo ai sa mafaufau pea lava Zoe i ona matua matutua. Soo se taimi lava e talanoa ai se tagata e uiga ia i laua, na te lagonaina se avanoa gaogao i lona loto.
“Ou te lei feiloai lava ia Tinamatua ma Tamamatua,” sa fai atu ai Zoe ia Tama i se tasi po. “Aisea ua ou faanoanoa tele ai ona ua leai i laua?”
Sa ataata Tama. Sa mapuea malie o ia. “O ou matua matutua sa sili ona alolofa i lo laua aiga nai lo se isi lava mea.” Sa pei e melotagi lona leo. “Ou te iloa e lei suia lena mea ina ua maliliu i laua. E alolofa tele i laua ia te oe. O loo la tapuai mo oe ao e tuputupu ae.”
Sa fiti e Tama ona tamatamailima. “Ei, e i ai so’u manatu. Atonu e tatau ona fai se tatou lesona faapitoa faaleaiga e fesoasoani ia e iloa lelei ai ou matua matutua.”
“Manaia lena,” o le tala lea a Zoe.
Sa toe ataata Tama. “E mafai ona e iloa ai soo se ituaiga o mea malie, e pei o le tusia e tinamatua o ni pese malie mo fanau a lana fanau.”
Sa mo’omo’o Zoe e i ai sana pese na tusia e lona tinamatua.
O le po na sosoo ai, na faapotopoto ai le aiga e faasoa mai nisi tala e sili ona fiafia i ai e uiga ia Tinamatua ma Tamamatua. Sa latou faasoa mai foi nisi o pese malie na tusia e Tinamatua!
I le faaiuga o le lesona, sa liliu atu Tina ia Zoe. “Ou te iloa o lena e te mafaufau soo i ou matua matutua,” o lana tala lea. “E i ai se aso o le a e feiloai ai ia i laua. Ae mo le taimi nei, sa ma manatu ma Tama, atonu o le a fesoasoani le mea lenei e te latalata atili atu ai ia i laua.” Na tuuina atu e Tama ia Zoe se ata o Tinamatua ma Tamamatua.
Sa lagona e Zoe le fiafia a o tilotilo atu i le ata o ona matua matutua. E i ai se aso o le a ia feiloai ai ia i laua! ●
Ou te fiafia e aoao e uiga i lo’u aiga. Ou te fia iloa lo’u aiga ma iloa le talafaasolopito o o’u tuaa. Ou te fiafia o loo i ai isi tagata e mafai ona fesoasoani ia ou iloa atili e uiga i lo’u aiga.
Enzo R., 9 tausaga, Rio Grande do Sul, Pasila
Ata na tusia e Joanne Lew Vriethoff