O le Faafitauli o le Pati
E alala le tusitala i Corrientes, Atenitina.
Na i ai se vaega o Luz na fia alu i le pati. Ae sa ia lagonaina le le mautonu.
“Suesue i ai i lou mafaufau; ona … e ole mai ia te au pe ua sao” (Mataupu Faavae ma Feagaiga 9:8). O lenei tala na tupu i Corrientes, Atenitina.
Sa lagona e Luz le fiafia. Ua faaiu le tausaga aoga, ma sa tele mea mananaia sa tutupu. E le o toe umi ae faauu o ia mai le vasega ono. O le tausaga e sosoo ai, o le a aoga ai i le aoga maualuga!
Sa faateia o ia i le vave o lona tuputupu ae. Sa tupu umī, ma sa le o toe laitiiti o ia. Sa manaia na suiga, ae sa ia lagona foi si popole teisi.
Sa tonu ia te ia e talanoa atu i ona matua.
“O se taimi matagofie lenei o lou olaga, Luz,” o le tala lea a Papa. “O se taimi e te aoao ai, fai le mea sili e te mafaia, ma ia ausia sini o le a fesoasoani ia te oe e avea ai ma tagata ua silafia e le Atua e mafai ona avea ai oe.”
“Ae o le olaga e oo mai i le tasi le aso i le taimi,” o le tala lea a Mama. “O le a e ola ae ma avea ma lena tagata i filifiliga lelei, laiti taitasi e te faia.”
Sa fesoasoani lena mea e maua ai e Luz se lagona lelei. Sa fiafia o ia ona sa le manaomia ona tuputupu ae i se taimi e tasi.
I se tasi aso i le aoga, na fai mai ai uo a Luz o le a fai se latou pati o le faauuga. Sa matuai fiafia lava i latou. O le a i ai se taumafataga o le afiafi, musika, moli, faapea foi ma se siva!
Ae a o faalogologo atu Luz i ana uo o talanoa e uiga i le pati, sa amata ona le lelei ona faalogona. Sa lei pei o le ituaiga o pati lea o le a mafai ai ona ia lagonaina ai le Agaga Paia.
“O le a e sau, e sao a, Luz?” sa fesili ai se tasi o ana uo.
“E tatau ona e sau!” o le tala lea a se isi uo. “O le a ou fai i o’u matua e talanoa i ou matua. Ma o le a la tuu mai oe e te sau.”
“Masalo.” Sa le mautonu faalogona o le manava o Luz. “O … O le a ou logo atua oe.”
Na alu le faaiuga o le vaiaso o mafaufau Luz i le pati. Sa mafaufau i ai a o aoao lana ta piano. Sa mafaufau i ai a o la taaalo ma lona tuagane pepe. E tusa lava po o a ana mea sa fai, sa i ai pea i lona mafaufau.
O se vaega o ia sa fia alu i le pati. Ae sa ia lagonaina pea le le mautonu. Sa le mafai ona aluese le lagona popole i lona manava.
“E i ai se mea o faaletonu, hija?” Sa fesili atu ai Mamá i le aoauli o le Aso Sa. Sa ia seluseluina le lauulu uumi uliuli o Luz i ona tamatamailima.
“Ia …,” o le tala lea a Luz.
“O e mafaufau pea i le pati?”
“Ou te le iloa le mea e fai,” na fai atu ai Luz. “Ou te fia alu. Ae ou te iloa o le a ou le maua ai se lagona lelei.”
Sa ataata Mamá. “Ou te iloa o le a e faia se filifiliga lelei,” o lana tala lea. “Mafaufau i ai, fai lau filifiliga, ma ta’u atu i le Tama Faalelagi le mea ua e filifilia. O le a fesoasoani o Ia ia e iloa pe sa’o. O le a e lagonaina i lou loto.”
Na luelue le ulu o Luz. Sa manavanava loloa o ia ma alu atu i lona potu e tatalo.
“Le Tama Faalelagi,” o le musumusu lea a Luz. “Na valaaulia au e au uo i se pati, ae e le o lelei ou faalogona e uiga i ai. O le a ou ta’u atu ia i latou e le mafai ona ou sau. Pe o le mea sa’o ea lea e fai?”
Sa oo ifo se faalogona mafanafana ia Luz. Na te lei toe lagonaina le le mautonu. Sa ia lagona na pei ua tumu o ia i le malamalama! Sa ia iloa ua ia faia se filifiliga sa’o.
Ina ua savali mai Luz i fafo mai lona potu, sa ia tuuina atu ia Mama se opo lapoa.
“Ua ou filifili ou te le alu,” na fai atu ai Luz ia te ia.
“Ua ou mitamita lava ia te oe,” na fai atu ai Mamá.
Na fusi foi e Papá ia Luz. “E i ai so’u manatu,” sa ia fai atu ai. “Fai se tatou lava pati o le faauuga. E mafai ona ai se tatou aisa kulimi ma fiafia ai o se aiga!”
Sa ataata Luz. Sa fiafia tele o ia i le aisa kulimi! Ma sa fiafia tele o ia i le iloaina e mafai ona ia faia le mea sa’o, e tusa lava pe sa faigata. Faatasi ai ma filifiliga laiti ma lelei uma sa ia faia, e mafai ona ia tuputupu ae ai e avea ma tagata na silafia e le Atua e mafai ona avea ai o ia. ●
Ata na tusia e Tammie Lyon