O Se Savali Mai le Perofeta
Ou te Alofa Ia te Outou
Sii mai le “Talanoaga i le Toefuataiga ma Peresitene Russell M. Nelson,” faaputuga o vitio, Gospel Media library.
Sa feiloai Peresitene Nelson ma nisi o tamaiti Peraimeri i se fale ogalaau i Palamaira, Niu Ioka, ISA. E foliga pei o le fale lea sa nofo ai Iosefa Samita i le taimi na ia maua ai le Uluai Faaaliga. O nisi nei o mea na faasoa atu e Peresitene Nelson i tamaiti.
O Fanau Uma a le Atua
E le afaina po o fea na e fanau ai po o le a foi le fu’a na e talotaloina po o le gagana e te tautala ai. O i tatou uma o fanau a le Tama Faalelagi, ma o le a tatou tutupu a’e e avea faapei o Ia.
Taumafaiga ma Taui
O le avea ma se perofeta e manaomia ai le tele o galuega ma le tele o suesuega. O mea uma e faatatau i le avea atili e pei o le Faaola e manaomia ai taumafaiga. Ina ua finagalo le Atua e tuu atu Tulafono e Sefulu ia Mose, o fea na Ia ta’u atu ia Mose e alu i ai? I luga o le tumutumu o le Mauga o Sinai. O lea na tatau ai ona savali Mose i luga o le tumutumu o lena mauga e aumai Tulafono e Sefulu. E fiafia le Alii i taumafaiga, aua o taumafaiga e aumaia ai taui lea e le mafai ona oo mai e aunoa [ma taumafaiga].
O le Aiga o le Perofeta
O i ma’ua o ni matua o se fanau e toasefulu, e iva ni afafine lalelei ma se atalii e toatasi. E toalua i laua ua nonofo nei i le lagi. Sa puupuu o laua taimi i le lalolagi, ma o loo tapuai mai i le lagi mo i matou. Ua fusia faatasi i matou i le faaipoipoga faalemalumalu, o lona uiga o le a matou faatasi e faavavau pe a uma o matou taimi pupuu i le lalolagi.
O se Fua Faatatau mo le Fiafia
O tusitusiga paia e pei o se tusikuka. Afai e leai sau tusikuka, ae na’o lou saeua faatasi lava o le falaoamata ma le susu ma fuamoa, atonu o le a e le maua se keke lelei. Ua tuuina mai e le Atua ia i tatou se fua faatatau mo le fiafia, ma ua ta’ua o poloaiga.
O le upu poloaiga e foliga mai o se faatonuga, e pei o loo faatonu i tatou i le mea e fai. Ae o le mea moni o se auala puupuu lea i le aoaoina. Mo se faataitaiga, ua Ia poloaiina i tatou e aua le inu pia pe ulaula tapaa ma isi mea leaga. Aisea? Ina ia e ola umi ma fiafia atili ai. Mata tou manatu o le a ou ola ia 95 ou tausaga pe ana fai ou te ulaula ma inu pia? Leai. Ma o loo ou fiafia. Ma mafai ona matou faasese i le kiona ma fanau a la’u fanau.
O Se Mea Matagofie
O le salamo o lona uiga o aso uma, tatou te taumafai atili ai e fai ni mea e tele atu ia avea teisi ai e pei o le Alii o Iesu Keriso. O loo ou salamo pea. O aso uma ou te taumafai ai e aoao atili ma avea atili ia pei o le tagata ua finagalo le Alii ia ou avea ai. Ma e le o se faasalaga lena mea. O se avanoa faafiafiaina lena. O aso uma, ou te oso ese mai le moega i le taeao ma fai atu, “Oi, o le a i ai se mea matagofie o le a tupu i le aso! O le a ou avea atili e pei o Iesu. ●
Ata na tusia e David Habben