Valaaulia o Lima Fesoasoani
E Mafai Ona E Fesoasoani Pei o Iesu!
A o i ai Iesu i le lalolagi, sa fesoasoani o Ia i tagata uma na Ia vaai i ai. Sa Ia fafagaina i latou o e sa fiaaai. Sa Ia faamafanafanaina i latou sa faanoanoa. Sa Ia aoaoina tagata uma i Lana talalelei. Ua fetalai mai Iesu ia tatou mulimuli atu ia te Ia. Pe a tatou papatiso, tatou te folafola atu e taumafai e fai mea na Ia faia.
I aso nei e toatele tagata i le lalolagi e manaomia la tatou fesoasoani. O nisi ua tuuatoatasi. O nisi ua fiaaai. O nisi ua tuua o latou fale. O nisi e lei faalogo i le talalelei. E mafai e i tatou taitoatasi ona faia se mea e fesoasoani atu ai.
O Mea e Mafai Ona Faia e Ou Lima Fesoasoani
E mafai e tamaiti ona suia le lalolagi i o latou loto alolofa ma lima fesoasoani. Pe tusa o le 100 tausaga ua mavae, na fesoasoani ai tamaiti o le Peraimeri e fau se falemai i le Aai o Sate Leki, Iuta, ISA. O vaiaso uma lava, na latou aumaia ai ni sene mo le falemai fou. Ina ua tatalaina i le 1922, sa faaigoaina o le Falemai o Tamaiti o le Peraimeri. O le mafuaaga ona sa fesoasoani tamaiti i le fausiaina, o sina mea itiiti ma sina mea itiiti!
A e autilo solo, o le a e maua ai le tele o tagata e mafai ona e fesoasoani i ai. E mafai ona e faasoa atu le talalelei i le ala e te ola ai ma auauna atu ai i isi. E mafai ona e fesoasoani ia latou lagona le alofa o le Tama Faalelagi.
O Se Valaaulia e Fesoasoani
O le tausaga lenei ua matou valaaulia ai outou e faaaoga o outou loto alolofa ma lima fesoasoani e fesoasoani atu ai i isi. O le lagona fiafia e te maua pe a e fesoasoani i se tasi e sau mai le Agaga Paia. Na te faailoa atu ia te oe ua fiafia tele le Tama Faalelagi i au taumafaiga!
Ata na tusia e Liz Brizzy