O le Aso muamua o Jaechan
Pe o le ala sao ea lenei? O lagona o Jaechan ua fefiloi uma.
“Sa ou saili atu ia Ieova, ona tali mai ai lea o ia ia te au” (Salamo 34:4). O lenei tala sa tupu i Gyeonggi-do, Korea i Saute.
Sa tatā ni musika fiafia ao tutū a’e Jaechan ma Tina mai i o laua nofoaga i le faletaalo a le aoga. Sa opeopea solo tautauga paluni [lanu] sesega i le puipui a o talanoa fiafia isi tamaiti ma o latou matua.
O taeao o le aso muamua lea o le aoga, ma i Korea i Saute, e o ai i taimi uma tagata aoga fou i se polokalama faapitoa e faamanatu ai le amataga o le aoga. A o faalogologo atu o ia i pese ma tautalaga sa lagona e Jaechan le fiafia tele. Sa le mafai ona onosai lona fia aoga!
Ina ua uma le polokalama, sa savavali atu Tina ma Jaechan i auala savali o le faleaoga. Ina ua la taunuu i lona potuaoga, sa feiloai Jaechan i lana faiaoga. Sa foliga mai o se tagata lelei tele o ia.
Mulimuli ane sa savavali atu Tina ma Jaechan i fafo i le la susulu mafanafana o le tautotogo. E oo lava i le la ma le lagi na foliga fiafia ina ua amata le aoga.
O le taeao na sosoo ai, sa savali atu Tina e momoli Jaechan i le pa o le aoga. Na ia fusimauina o ia. “Ou te alofa ia te oe,” na ia fai atu ai. “Manuia lou aso muamua.”
“Ua lelei,” na fai atu ai Jaechan. “Ou te alofa foi ia te oe!” Sa talotalo faatofa mai ma faliu loa e savali i lona potuaoga, e pei ona sa la faataitaia ai.
A o savali atu Jaechan i le ala savali o le faleaoga, sa amata ona popole o ia. Pe o le ala sao ea lenei? Na tu Jaechan ma tilotilo solo. Sa liliu ma savali agai atu i se isi auala savali. Sa lei umi ae pei ua nunumi mea uma.
Sa manava loloa ia Jaechan. Sa ia iloa sa i ai o ia i le auala savali lea ananafi. Sa savali pea o ia ma ui atu i se faitotoa tele.
Ae sa lei vaai atu Jaechan i lona potuaoga, faatasi ai ma kesi ma uo ma lona faiaoga lelei. Sa ia vaaia le faletaalo. Ae ua leai ni tagata po o ni paluni. Ua na o se potu tele gaogao.
Sa amata ona maligi loimata o Jaechan. Sa taumafai o ia e aua le atuatuvale, ae sa fefe o ia. Na te lei iloa pe faapefea ona su’e lona potuaoga. Sa tootuli o ia e tatalo. “Le Tama Faalelagi ua ou leiloa. Faamolemole fesoasoani ia Tina e sau e su’e au ma fesoasoani mai ia ou oo i la’u vasega. ”
Na tu i luga Jaechan. Sa toe manavanava loloa o ia. Ona ia faatali lea.
I ni nai minute mulimuli ane, na oso mai Tina i le tulimanu. “Jaechan!” Sa tamoe atu ma fusi mau o ia. “O le a le mea na tupu?”
Sa tagi Jaechan. Sa matuai fiafia lava o ia ua vaai ia Tina. “Sa le mafai ona ou maua lo’u potuaoga,” o lana tala lea. “Ona ou tatalo lea ia e sau e su’e au.”
Sa solo ese e Tina loimata mai ona alafau. “Ua ou fiafia sa e tatalo,” o lana tala lea. “Sa ou alu atu i le fale. Ona ou maua lea o se lagona e tatau ona ou toe liliu mai ia mautinoa ua e maua lou potuaoga. Ina ua e leai ma o, sa ou sueina solo oe. Ona ou maua ai lea o oe!”
Sa uu e Jaechan le lima o Tina a o la savavali atu i le ala savali sa’o. Na uma le tagi o Jaechan. Sa ia iloa na tali mai le Tama Faalelagi i lana tatalo, ma sa lelei mea uma. Ina ua la taunuu i le potuaoga, sa ia faalogoina le talie ma le fiafia o isi tamaiti i totonu.
“Jaechan! Ua matou fiafia lava e vaai atu ia te oe,” o le tala lea a le faiaoga o Jaechan a o savali atu o ia i totonu.
“Faafetai lava,” o le tala lea a Jaechan ma si ana ifo. Sa ia toe opo tasi atu ia Tina. O le a faapea lava ona avea o se aso muamua lelei.
Ata na tusia e Shane Clester