Oliva le Toa
E alala le tusitala i Kalefonia, ISA.
“Auoi!” Na tagi Oliva. Sa oso o ia i le moega o Tina ma Tama. “O le aitu lale e sau e tuli au!”
“Sa fai sau miti le lelei,” o le tala lea a Tina. “E le moni le aitu.” Sa ia faauouo mai o ia. Sa la faapupuu faatasi.
Sa tetete Oliva. “Sa matuai umī lava! E sasama ona mata ae lanumeamata ona nifo,” o lana tala lea. “Sa fai la’u tatalo. Ae na ou vaai lava o sau!”
“Ua ou fiafia sa e ole atu i le Tama Faalelagi mo se fesoasoani,” o le tala lea a Tama. “O le a se isi mea e mafai ona e faia?”
“O le a le uiga o lau tala?” Na fai atu ai Oliva.
“Manatua le taimi na e faia ai se lauga i le Peraimeri? Sa e tatalo mo se fesoasoani. Ae na o le pau lena o lau mea sa fai?”
“Sa ou faataitaia,” o le tala lea a Oliva. “Sa ou tu i luma o le fā’ata. Na ou faia faafia la’u lauga.”
“Ma sa e faia se tautalaga maoae!” Na fai mai ai Tama.
“Ma manatua le taimi na leiloa ai lau taavale meataalo?” Na fai atu ai Tina. “Sa e tatalo ina ia maua. Ma pe sa e nofonofo ai i ou tulivae?”
“Leai. Sa ou su’e ma su’e. Sa ou tilotilo i lalo o lo’u moega. Ona ou tilotilo lea i tua o le nofoa.”
“Ma sa i ai iina!” Na fai atu ai Tina.
“O lea la,” sa fai mai ai Tama, “e mafai faapefea ona e aveese le aitu [mai lou mafaufau]?”
Sa vaai faalemafaufau Oliva o ona ofuina se ofutau.
“Muamua,” na ia fai mai ai, “tatalo.”
“Lelei. Ona a lea?”
“E mafai ona ou manava tele i totonu ma fafo. Ona ou usuina lea o le ‘O Au o se Atalii o le Atua.’”
“O se fuafuaga manaia tele lena!” Na fai atu ai Tina. “Ia toe foi loa e moe.”
O le taeao na sosoo ai na tamoe atu Oliva e talanoa ia Tina ma Tama.
“Sa ou toe miti foi i le aitu,” o lana tala lea. “Ae sa ou faia se tatalo ma mulimuli i la’u fuafuaga. Ma na alu ese atu le aitu!”
“Ua ou fiafia lava ua alu ese le aitu,” o le tala lea a Tama. “E faafofoga moni mai le Tama Faalelagi i au tatalo!” ●
Ata na tusia e Kevin Keele