Te hoa i te hoa
Hō’ē pēti i te taime hō’ē
Nō roto mai i te hō’ē uiuira’a ’e ’o Amber Healey
I tō’u ’āpīra’a, ’ua arata’i tō’u nā metua i tō’u tuahine ’e iā’u i roto i te hō’ē fa’a’apu mā’a nā te ’Ēkālesia. ’Ua haere mātou i reira nō te tauturu i te pofa’ira’a i te mau pēti. ’Ua ta’uma mātou i ni’a i te mau e’a teitei ’e ’ua pofa’i nā roto i te mau rao’ere me’ume’u i te mau pēti.
I te ha’amatara’a, ’ua ’ana’anatae roa mātou. ’Aita rā i maoro roa, ’ua putaputa roa tō mātou rima i te huruhuru e vai ra i ni’a i te hotu. ’Ua parau māua i tō māua māmā, « ’E’ita māua e hina’aro fa’ahou e rave i teie. Hina’aro māua e fa’aea ».
’Ua ani ’o māmā ia māua ē ’ua ’ite ānei māua e haere te mau pēti ato’a i hea. I tō māua paraura’a ē ’aita, ’ua fa’ata’a maira ’oia ia māua.
« E hōpoihia teie mau pēti tāta’itahi i te hō’ē fare i reira te feiā rave ’ohipa tāmoni ’ore e tapunu ai i te reira. I muri iho e hōro’ahia te reira mau punu mā’a nā te mau ta’ata e hina’aro i te mā’a. I te mau matahiti ato’a te hōro’a nei te ’Ēkālesia e rave rahi tauatini punu mā’a ».
I terā iho taime, ’ua fa’aea a’era māua tō’u tuahine i te ha’ape’ape’a nō te mau putaputa i ni’a i te rima. Tē tauturu nei māua i te mau ta’ata e hina’aro nei i te mā’a ! I muri ae i te reira, ’ua ’ārearea roa māua ia ta’uma i ni’a i te e’a nō te pafa’i i te hotu huruhuru puātou.
I teie matahiti ’ua ani atu mātou ia ’outou ’ia ’āmui i roto i te anira’a a te mau rima tauturu (’a hi’o Hoa nō te ’āva’e Tēnuare 2021). Te tāvinira’a ia vetahi ’ē mai tā te Mesia i tāvini o te hō’ē ïa o te mau mea faufa’a roa e nehenehe ia ’outou ’ia rave. E rāve’a ta’a ’ē tā te mau tamari’i nō te ’ite i te feiā nava’i ’ore ’e nō te hōro’a i tā rātou tauturu. ’E’ita paha te hō’ē ’ohipa tauturu e riro ’ei ’ohipa tauturu i te ha’amatara’a. Terā rā mai te mea ē pauroa te mau tamari’i i te ao nei e ’imi i te mau rāve’a nō te tāvini e ’āmui mai rātou i te mau mea fa’ahiahia roa !
Fa’ahōho’ara’a nā Toby Newsome