E mau pionie nā te mau fenua ato’a
Vaha’i i Tonga
Hi’ora’a i Tonga
Tē ora nei te mau ta’ata pāpa’i i Waikato, i Niu Terani, ’e i Utaha, i te fenua Marita.
’Ua tāmau noa ’o Vaha’i i te pure, ’e i te hō’ē mahana ’ua taui te reira.
’Ua tūturi Vaha’i i piha’i iho i tōna ro’i nō te fa’ahiti i tāna pure. ’O tāna pō mātāmua i te vāhi fa’aeara’a o te fare ha’api’ira’a, ’e tei roto ’oia i te hō’ē piha ’e te tahi atu mau tamāroa. ’Aita hō’ē noa a’e e melo nō Te ’Ēkālesia a Iesu Mesia a Iesu Mesia i te Feiā Mo’a i te mau Mahana Hōpe’a nei, mai iāna.
« E te Metua here i te Ao ra… » ’ua ha’amata Vaha’i nō te pure i roto i tōna ’ā’au. E ’ere rā i te mea ’ōhie. Te paraparau ra ’e te ’ata pūai ra vetahi mau tamāroa.
« Hei, ’a hi’o na ! » ’ua tuo mai te hō’ē o tōna hoa o te piha, ’o Akau. « Tē pure ra ’oia ».
’Ua hā’uti’uti ta’a ’ore noa ’o Vaha’i. ’Ua ’ite ’oia te fa’ao’ō’o ra Akau iāna. ’Ua fa’ahua rā ’oia ē ’aita ’oia i fa’aro’o iāna. ’Ua tāmau noa ’oia i te pure.
I te taime mātāmua ’a ha’api’i mai ai Vaha’i i te ’evanelia, ’aita ato’a tōna nā metua tupuna i au maita’i i te ’Ēkālesia. ’Ua haere Vaha’i i te Paraimere nā muri i tōna metua tāne feti’i ’aore rā tōna mau hoa.
I te 12ra’a o tōna matahiti, ’ua fa’aoti ’oia e bāpetizo iāna. ’Aita roa tōna nā metua tupuna i ’oa’oa roa i te ha’amatara’a. I muri iho rā, ’ua parau tōna māmā rū’au ē, « mai teie atu taime, e melo ’oe nō taua ’Ēkālesia ra. Tē hina’aro nei mātou ’ia vai ha’apa’o maita’i noa ’oe ».
I teienei tē haere ra Vaha’i i te ha’api’ira’a, ’ua fa’aoti pāpū ’oia e nā reira mau ’oia. Nō reira, ’ua tāmau noa ’oia i te pure. Noa atu ē, tē fa’ao’ō’o ra te tahi mau tamāroa iāna.
I te hō’ē pō ’a tūturi ai Vaha’i, ’ua fa’aro’o ’oia i te tahi ’ohipa ta’a ’ē.
« Hei, ’a māmū ! Tē pure ra ’o Vaha’i », tē parau ra te hō’ē.
’Ua fa’aoti a’e ra Vaha’i i tāna pure ’e ’a ’ara’ara mai ai tōna mata.
Tē pārahi ra Akau i ni’a i tōna ro’i. « E mea faufa’a rahi roa nō ’oe, e ’ere ānei ? »
’Ua tā’iri’iri Vaha’i i te upo’o. « ’Oia mau ».
I muri a’e i te reira, ’ua vai māmū noa te tahi atu mau tamāroa i te mau taime ato’a e pure ai Vaha’i. ’Aita i maoro roa, ’ua ha’amata Akau i te tūturi i pīha’i iho iāna. ’Ua ’āmui ato’a mai te tahi atu mau tamāroa. I te pae hope’a, ’ua tūturi mai te mau tamāroa ato’a i roto i te piha nō te pure ’e ’o Vaha’i i te mau pō ato’a.
’Ua ’oa’oa roa Vaha’i. ’Aita roa ’oia i pure ’utuāfare na i te fare. I teienei rā, e nehenehe ’oia e pure ’utuāfare ’e tōna mau hoa nō te piha ha’api’ira’a.
I te hō’ē mahana, e mana’o tō Vaha’i. Tē piri mai ra ho’i te hō’ē purera’a rahi a te ’Ēkālesia. E nehenehe ’oia e ani manihini i tōna mau hoa !
I muri a’e i te pure, ’ua paraparau Vaha’i i te tā’āto’ara’a nō ni’a i te purera’a. « Ua pi’ihia te reira te ’āmuira’a mata’eina’a », tē parau ra ’oia. « E haere mai te mau ta’ata nō te ha’api’i mai nō ni’a ia Iesu. E nehenehe ’outou pā’āto’a e haere mai, mai te mea e hina’aro ’outou ! »
Nō te mea ho’i ē e ti’a ia rātou e haere i rāpae’au i te fare ha’api’ira’a nō te haere i te purera’a, e ti’a i te mau tamāroa ato’a e tu’urima i te hō’ē parau nō te fāri’i i te parau fa’ati’a. ’Ua māere roa Vaha’i ’a ’ite ai ’oia i te ’api parau. Tē vai ra 77 i’oa i ni’a i te tāpura !
E ’ā’au māhanahana tō Vaha’i ’a pārahi ai ’oia i roto i te ana’ira’a o tōna mau hoa piha ha’api’ira’a ’e ’a fa’aro’o ai i te mau a’ora’a o te ’āmuira’a. E ’ā’au māhanahana mau ato’a tō Akau ’e tō vetahi i roto. I te hope’a o te ’āmuira’a, ’ua hina’aro e hitu ’ia bāpetizohia !
I taua pō ra i muri a’e i te pure ’e tōna mau hoa, ’ua parau Vaha’i i tōna iho pure. « Māuruuru i te ha’amaita’ira’a iā’u i te mau hoa maita’i », ’ua parau ’oia i te Metua i te ao ra. « ’E nō te tauturura’a iā’u ’ia riro ’ei hi’ora’a maita’i ».
’Ua fātata i te 170 mau ta’amotu i Tonga i roto i te moana nō Pātifita.
I teie mahana, e ono ta’ata i ni’a i te ’ahuru i Tonga, e mau melo nō te ’Ēkalesia.
’Ua matau-ato’a-hia Tonga i te i’oa « te mau motu o te hoara’a ».
’Ua riro Vaha’i ’e tāna vahine fa’aipoipo, ’o Sela, ’ei nā ta’ata fa’aipoipo mātāmua tei tā’atihia i roto i te hiero nō Hamilton i Niu Terani.
’Ua tāvini ’oia ’ei peresideni nō te hiero nō Nuku’alofa i Tonga.
E ’orometua ha’api’i ’oia i te fare ha’api’ira’a teitei nō Liahona, hō’ē fare ha’api’ira’a teitei nā te ’Ēkālesia i Tonga.
Mau fa’ahōho’ara’a nā Susan Keeter