Te huru hāmanira’a mā’a ’āpī a Winfred
« Pārahi ihora mātou ma te ’oa’oa » (2 Nephi 5:27).
E aha tā Winfred e nehenehe e tu’u i roto i tāna huru hāmanira’a mā’a ?
Tē tauturu nei Winfred ia Jajja (mama rū’au) i te fa’aineine i te tāmā’ara’a nō te pō.
« Mmm, e mea au roa nā’u te matoke, » ’ua parau Jajja.
« Nā’u ato’a », ’ua parau Winfred. « Hō’ē teie ’o tā’u mau mā’a au roa ! Mea au nā’u te mau mai’a pu’u. ’E te ’ōporo mā’aro ’e te tōmāti. Te vāhi au roa a’e rā o te pape ïa ».
« Nō te mea e ’ano’i te pape i te mau no’ano’a ato’a ’ei hō’ē », tē parau ra Jajja.
’Ua tāmau noa rāua i te tāpūpū i te mau pota. I muri iho, ’ua māpu a’era Winfred i te aho.
’Ua parau ’oia, « Jajja, nāhea ’oe e vai ’oa’oa noa ai i te mau taime ato’a ? »
« E tāmata vau i te rave i te reira », ’ua parau Jajja. « Terā rā ’aita vau e ’oa’oa noa nei i te mau taime ato’a. Tē ’oto ’o te hō’ē tuha’a īa o te orara’a. Tē ’oto ra ’oe i teie taime ? »
’Ua tā’iri’iri Winfred i tōna upo’o. « Tē mihi nei au ia Taata (papa), nō te mea tē rave nei ’oia i te ’ohipa i te ātea roa. ’E tē mihi nei au i te ha’api’ira’a, nō te mea e’ita e ti’a ia mātou e haere i teienei. ’E tē mihi nei au i tō’u mau hoa i te fare purera’a ».
« Mai tera iho ā, ’ia ’ite mai i te ’oto nō te reira mau mea », te parau ïa a Jajja. E ’ere te orara’a i te mea ’ōhie noa. Terā rā ’ia ’oto ana’e au, e tāmata vau i te pe’e i tā’u huru hāmanira’a mā’a nō te ’oa’oa ».
« Tā ’outou huru hāmanira’a mā’a ? »
« Mai tā’u tē vai ra hō’ē huru hāmanira’a mā’a i te matoke, tē vai ra tā’u hō’ē huru hāmanira’a mā’a nō te ’oa’oa. I te tahi taime e mea rahi roa te ’oto nō te ha’amo’e atu mai terā noa. E mea pinepine rā vau i te ’ite ē, ’ua tano maita’i tā’u huru hāmanira’a mā’a nō te mea tā’u e hina’aro nō te fa’atupu i te mana’o maita’i a’e ».
« E aha tā ’oe huru hāmanira’a mā’a ? »
’Ua ’ata’ata Jajja. « ’Āhani na, ... e nehenehe ānei ’oe e ’ite mai i te hō’ē huru hāmanira’a mā’a nā ’oe iho ? I muri iho tāua e ’āparau fa’ahou ai ».
I taua pō ra ’a pure ai Winfred, ’ua ’ite ’oia ē tē fa’aro’o mai ra te Metua i te ao ra. ’Ua ’ite ’oia ē e fa’a’oa’oa te pure iāna ! ’Ua rave mai ’oia i te hō’ē ’api parau ’e ’ua pāpa’i, Te huru hāmanira’a mā’a a Winfred nō te ’oa’oa. 1. Pure. I muri iho, haere atura ’oia e ta’oto.
I te po’ipo’i a’e ’ua tai’o ’oia i tāna Buka a Moromona. E fa’a’oa’oa ato’a te tai’ora’a i te pāpa’ira’a mo’a iāna. ’Ua ’imi a’era ’oia i tāna ’api parau ’e ’ua pāpa’i, 2. Tai’o i te mau pāpa’ira’a mo’a. I muri iho, ’ua hi’o ’oia i te pāpa’ira’a mo’a tei mahora : « E fa’aro’o i te Mesia ra » (2 Nephi 33:10).
’Ua tu’u mai ’o Winfred i te tahi atu nota : 3. ’Ia vai te fa’aro’o ia Iesu Mesia.
’Ua feruri Winfred i te maita’i o Jajja i te vaiihora’a ’ia haere mai e fārerei iāna. ’Ua ’ite Winfred ia Jajja ’e ’ua parau atu, « māuruuru nō tō ’oe fa’ati’ara’a ’ia fa’aea mai au ia ’oe ra ».
’Ua ’oa’oa Winfred i te paraura’a māuruuru. ’Ua pāpa’i fa’ahou ’oia i ni’a i tāna ’api parau. 4. E ha’amāuruuru.
I muri iho, ’ua ani Winfred i tōna mau ta’ata tāpiri mai ē e nehenehe ānei te mau tamari’i ri’i e haere mai e ha’uti. ’Ua āfa’i mai ’oia i tōna tuahine teina, ’o Milfred, ’e tōna taea’e teina, ’o Alfred. I te otira’a rātou i te ha’uti, ’ua ani ’oia i te mau tamari’i ’ia tai’o nā muri iho iāna. ’Ua tāpū mai ’o Jajja i te hō’ē merēni nō te hōro’a nā te tā’āto’ara’a.
I muri a’e ’ua haere atu ’o Winfred e fārerei i tōna hoa ’o Happy te i’oa. To’opiti, ’ua horoi rāua i te mau ’āu’a a te māmā ’o Happy. I muri iho, ’ua purūmu rāua i te tahua. E mea ’ārearea ’ia tauturu !
I te pōra’a, ’ua tauturu Winfred i tōna taea’e ’e tuahine i tā rāua mau ’ohipa nō te ha’api’ira’a. ’Ua tuatāpapa ’oia i te piapa ’e ’o Milfred. ’Ua tauturu ’oia ia Alfred i tāna ’ohipa nūmera.
I taua pō ra, ’ua ’āparau fa’ahou Winfred ia Jajja.
« E mea maita’i a’e au i teie mahana ! Tē mana’o nei au ē ’ua ’itehia iā’u tā’u huru hāmanira’a mā’a nō te ’oa’oa ».
« Fa’ahiahia roa ! ’A fa’a’ite mai nā », ’ua parau Jajja.
’Ua tai’o ’oia, « Te huru hāmanira’a mā’a nō te ’oa’oa a Winfred », « 1 Pure. 2. Tai’o i te mau pāpa’ira’a mo’a. 3. ’Ia vai te fa’aro’o ia Iesu Mesia. 4. E ha’amāuruuru ».
« E huru hāmanira’a mā’a fa’ahiahia mau », ’ua parau Jajja. « Terā rā te mana’o nei au ē ’ua mo’ehia ia ’oe hō’ē mea. E aha te mea tei fa’a’oa’oa ia ’oe i teie mahana ? »
’Ua feruri Winfred hō’ē minuti. « ’Ua ’ārearea roa vau i te ha’utira’a ’e te mau tamari’i ri’i. ’E te tauturura’a ia Happy ’e tōna māmā. ’E te tuatāpapara’a i pīha’i iho ia Milfred ’e ia Alfred. ’Ē… terā ana’e ! Te tauturura’a ia vetahi ’ē o te mā’a hope’a ïa ».
« E parau mau », ’ua parau Jajja « ’Ua riro te tāvinira’a ia vetahi ’ē mai te pape—e ’āno’i ’oia i te tā’āto’ara’a o te tahi atu mau mea maita’i ’ei hō’ē ».
« E huru hāmanira’a mā’a maita’i terā ». ’Ua ’ata a’era Winfred. « Tē hina’aro nei au e tāmata fa’ahou i te reira ananahi ».
’Ua tupu teie ’ā’amu i Kampala (Uganda)
Fa’ahōho’ara’a nā Hollie Hibbert