Te mau parau huna ’e te mau ’ohipa maēre
Tē ora nei te ta’ata pāpa’i i Iowa, fenua Marite
’Ua tano ānei te tāpe’ara’a i te parau huna a Kate ?
« ’Ua hōro‘a-noa-hia mai te Vārua o te Mesia i te mau ta’ata ato’a ra ’ia ’ite rātou i te maita’i ’e te ’ino » (Moroni 7:16).
« Hei, ’a hi’o na ! » ’Ua rave mai ’o Kate i te hō’ē pēpe ha’avare ’api parau mi’omi’o i ni’a i te tahua o te fare to’a. « ’A rave, ’a tu’u i te reira i roto i tō ’oe pūtē ».
« Hina’aro ’oe ’ia rave au i te reira ? » ’Ua ani mai ’o Maddy.
« E’ita te fare toa e nehenehe e ho’o i te reira », ’ua parau Kate. « E fa’aru’e noa rātou i te reira i roto i te vaira’a pehu. E misiōni nō te fa’aorara’a teie. Tē fa’aora nei tāua i teie pēpe ha’avare »
’Ua ’ata Kate ia Maddy. ’Ua ʼata ato’a mai ’o Maddy.
« ’Oia ïa » ’Ua tu’u atu Maddy i te pēpe ha’avare i roto i tōna pūtē. E ’ohipa ta’a ’ē te rirora’a ’ei misiōni nō te fa’aorara’a !
Teie rā, ’a haere ai rātou i rāpae i te fare toa, mai te huru ra ’ua teiaha te pēpe ha’avare ’api parau i roto i tōna pūtē mai te ’ōfa’i ra. Mai te reira ānei te huru o te hō’ē misiōni nō te fa’aorara’a ?
I tō rātou ho’ira’a mai i te fare ’o Maddy, ’ua tāpiripiri maita’i ’o Kate i te pēpe ha’avare ’api parau ’e ’ua ha’amānina i te papie mai tāna i nehenehe.
« E aha te huru ’ahu tā’u e hāmani nōna ? », ’ua ui mai ’oia, ma te ravera’a mai i te hō’ē peni tara. « E aha te mana’o e hāmani i te hō’ē ahu nō te ’orira’a ? »
’Ua tā’iri’iri Maddy te upo’o ma te ’ana’anatae. « I muri iho, e nehenehe tāua e fa’a’ite atu i tō’u māmā ! »
« ’Aita ! ’Eiaha tāua e parau i te hō’ē ta’ata », ’ua parau Kate. « ’Eiaha roa. E parau huna teie nā tāua, pāpū ? E fafau mai ’oe e’ita ’oe e parau ».
« Ē, pāpū. Tē parau fafau atu nei au », ’ua nā reira Maddy. « Nō te aha rā ’aita tāua e nehenehe e parau ? »
« Mai te mea e parau ’oe, e riri tō ’oe māmā, ’e e’ita paha ’oia e hina’aro ’ia hauti ’āmui fa’ahou tāua ».
« Nō te aha ’oia e riri ai ? » ’Ua ui Maddy. ’Ua ’ōpūpū tōna ’ōuma ’e te mata’u.
’Ua tu’u Kate i tāna peni tara i raro. « Mai te mea e’ita ’oe e parau, e vaiiho vau ia ’oe te pēpe ha’avare ’e te mau ’ahu ato’a tā’u e pāpa’i hōho’a nōna ».
I teienei, ’ua ’ite Maddy nō te aha e mana’o pe’ape’a tōna. « ’Ua… ’ua ’eiā tāua i te reira, e ’ere ānei ? » ’ua muhumuhu ’oia.
« Hei, nā ’oe i tu’u i te reira i roto i tō ’oe pūtē ’e ’ua fa’ahaere huna mai i rāpae i te fare toa ».
« Nō te mea nā ’oe i parau mai iā’u ! »
« ’Aita ! » ’Ua parau Kate. « Tē ho’i nei au i te fare, hou ’oe ’a ’imi ai i te ha’afifi iā’u ». ’Ua ti’a a’era ’oia i ni’a ’e ’ua horo atu i rāpae nā te ’ūputa.
I te reira taime, ’ua tomo mai māmā i roto i te piha. « Nō te aha Kate i ho’i ’oi’oi ai ? » ’Ua ’ite ’oia i te pēpe ha’avare ’api parau i roto i te rima ’o Maddy. « ’E nō hea mai teie pēpe ? »
’Ua hōhoni Maddy i tōna utu. ’Aita ’oia e au maita’i e tāpe’a i te hō’ē parau huna ia māmā. E aha rā te tupu mai te mea ’ua tano ’o Kate ’e e riri ’o māmā.
’Aita te mana’o pe’ape’a i roto i tōna ’ōuma i haere ’ē. ’Ua rave ’oia i te hō’ē hutira’a aho hōhonu ’e ’ua fa’ati’a i te tā’āto’ara’a ’o te ’ā’amu.
« ’Ua parau Kate iā’u ē e fafau mai e tāpe’a noa te reira ’ei parau huna », ’ua parau ’oia. « E ’ohipa ’ino rā te reira ».
’Ua pārahi atu māmā i pīha’i iho iāna i ni’a i te ro’i. « E mea ’ino te rahira’a o te mau parau huna. Mai te mea iho ā ra e parauhia ’oe, ’eiaha roa e parau i te hō’ē noa atu ta’ata. I te tahi atu pae, hō’ē ’ohipa māere, mai te hō’ē tao’a hōro’a ’aore rā te hō’ē ’āreareara’a, e nehenehe e riro ’ei ’ohipa maita’i. E mea ti’a ’ia riro ’ei mea ’ārearea nō te mau ta’ata ato’a ».
’Ua tā’iri’iri Maddy te upo’o. « Māuruuru nō tō ’oe orera’a e riri iā’u », ’ua parau ’oia. « ’Ua parau Kate e nā reira ’oe ».
’Ua tauahi atu ra māmā iāna. « Tē te’ote’o mau nei au ia ’oe nō tō ’oe fa’aro’ora’a i te Vārua Maita’i ’e i te paraura’a mai iā’u i te parau mau ».
« E hina’aro ānei ’oe e ho’i au i te fare toa nō te fa’aho’i i te pēpe ha’avare ? » ’Ua ani Maddy.
« ’Pāpū roa ! » ’Ua ʼataʼata māmā. « ’E ’ia ho’i mai tāua, e nehenehe ’oe e tauturu iā’u nō te hāmani i te hō’ē faraoa monamona ’ei ’ohipa māere nā pāpā ».
’Ua ’ata Maddy. « I teienei, ’o te tahi mea ’o tā’u e nehenehe e ’ite e mea maita’i roa ! »
Fa’ahōho’ara’a nā Devin McSherry