អ្នកត្រួសត្រាយផ្លូវនៅគ្រប់ដែនដី
អូលហ្គា ស្នេឌើហ្វើរ
អ្នកផ្គត់ផ្គង់ព្រះវិហារបរិសុទ្ធដំបូងគេមកពីប្រទេសឆេកូស្លូវ៉ាគី
អូលហ្គាដឹងថាគាត់នឹងទៅព្រះវិហារបរិសុទ្ធនៅថ្ងៃណាមួយ ។
អូលហ្គាបានសម្លឹងមើលរូបភាពព្រះវិហារបរិសុទ្ធដែលព្យួរនៅលើជញ្ជាំងផ្ទះរបស់គាត់ ។ គាត់បានដកដង្ហើមធំ ។ ប្រសិនបើគ្រួសាររបស់គាត់បានទៅព្រះវិហារបរិសុទ្ធមិនដឹងជាអស្ចារ្យប៉ុណ្ណាទេ ! ប៉ុន្តែ មិនមាន ព្រះវិហារបរិសុទ្ធ នៅក្បែរនោះទេហើយវាលំបាកខ្លាំងណាស់ក្នុងការចេញទៅក្រៅប្រទេសពីប្រទេសរបស់គាត់ ។
អូលហ្គា បានជ្រមុជទឹកកាលពីប៉ុន្មានឆ្នាំមុន ។ ប៉ុន្ដែនៅពេលនោះពួកអ្នកផ្សព្វផ្សាយសាសនាត្រូវបានបង្ខំឲ្យចាកចេញពីប្រទេសនេះ ។ សមាជិកនៃសាសនាចក្រមិនត្រូវបានអនុញ្ញាតឲ្យទៅព្រះវិហារទៀតទេ ។ ពួកគេមិនអាចនិយាយជាមួយអ្នកដទៃអំពីជំនឿរបស់ពួកគេបានទៀតផង ។
អូលហ្គានៅតែបន្តរស់នៅតាមព្រះសិក្ខាបទ ។ ហើយលោក ជៀរី ជាស្វាមីរបស់គាត់ ក៏ធ្វើដូច្នោះដែរ ។ ពួកគាត់បានអធិស្ឋាន និងអានព្រះគម្ពីរ ។ ពួកគាត់ធ្វើរាត្រីក្រុមគ្រួសារ និងបានបង្រៀនកូនៗរបស់ពួកគាត់ ។ នៅរៀងរាល់ថ្ងៃអាទិត្យពួកគេទាំងអស់គ្នាមានការប្រជុំសាក្រាម៉ង់នៅក្នុងផ្ទះតូចរបស់ពួកគេ ។ ពួកគាត់បានព្យួររូបភាពព្រះវិហារបរិសុទ្ធជាច្រើន ។
ហើយនៅពេលអូលហ្គា និងគ្រួសាររបស់គាត់មានអារម្មណ៍ឯកោពួកគាត់បានរម្លឹកខ្លួនឯងថា ពួកគាត់មិននៅតែម្នាក់ឯងទេ ពួកគាត់មានសមាជិកសាសនាចក្ររាប់ពាន់នាក់នៅជុំវិញពិភពលោកផងដែរ ។
នៅថ្ងៃមួយមានរឿងគួរឲ្យរំភើបបានកើតឡើង ។ ប្រធាន រ័សុល អិម ណិលសុនកាលនោះជាប្រធានទូទៅសាលាថ្ងៃអាទិត្យបានមកទស្សនកិច្ចនៅប្រទេសរបស់ពួកគាត់ ។ អូលហ្គាញញឹមនៅពេលគាត់បានចាប់ដៃរបស់ប្រធានណិលសុន ។ បន្ទាប់មកលោកបានសន្យាជាពិសេសមួយជាមួយគាត់ ។ « ប្អូនស្រីនៅថ្ងៃណាមួយប្អូននឹងបានទៅកាន់ព្រះវិហារបរិសុទ្ធ » ។
អូលហ្គាបានមានអារម្មណ៍កក់ក្ដៅ ។ គាត់បាននិយាយខ្សឹបថា« អរគុណ » ។
ជាច្រើនខែបានកន្លងផុតទៅ ។ បន្ទាប់មកជាច្រើនឆ្នាំកន្លងផុតទៅ ។ អូលហ្គាបានសម្លឹងមើលរូបភាពព្រះវិហារបរិសុទ្ធដែលព្យួរនៅលើជញ្ជាំងផ្ទះរបស់នាងដោយមានសេចក្តីប្រាថ្នាចង់ទៅព្រះវិហារបរិសុទ្ធ ។ ការទៅព្រះវិហារបរិសុទ្ធហាក់បីដូចជាមិនអាចទៅរួចទេ !
ក្រោយពីបួនឆ្នាំកន្លងផុតទៅអូលហ្គា និងជៀរីត្រូវបានគេអញ្ជើញឲ្យទៅចូលរួមសន្និសីទទូទៅនៅទីក្រុងសលត៍លេករដ្ឋយូថាហ៍ ស.រ.អា. ។ អូលហ្គាមានការព្រួយបារម្ភថាពួកគាត់មិនអាចទៅបានទេ ។ ស្ថានភាពនៅក្នុងប្រទេសរបស់ពួកគាត់នៅមានការពិបាកនៅឡើយ ។ ការធ្វើដំណើរចេញក្រៅប្រទេស ទាមទារឲ្យមានឯកសារជាច្រើន ។ ប៉ុន្តែអ្វីៗគ្រប់យ៉ាងបានដំណើរការបានយ៉ាងល្អ ។ អូលហ្គាបានមានអារម្មណ៍ថាភើតពោះ នៅពេលដែលយន្តហោះរបស់ពួកគាត់បានហោះឡើងចេញទៅសហរដ្ឋអាមេរិក ។ វាជាអព្ភូតហេតុមួយដ៏អស្ចារ្យណាស់ ។
អូលហ្គា និងជៀរីបានទៅចូលរួមសន្និសីទហើយដើម្បីស្តាប់ព្យាការី ។ ពួកគាត់បានទៅមើលវិសាលដ្ឋានព្រះវិហារបរិសុទ្ធ និងទៅមជ្ឈមណ្ឌលភ្ញៀវទេសចរ ។ ប៉ុន្តែផ្នែកដ៏សំខាន់បំផុតគឺការចូលទៅក្នុងព្រះវិហារ បរិសុទ្ធ !
ពាក់រ៉ូបពណ៌សអូលហ្គាមានអារម្មណ៍ថាគាត់បានកំពុងនៅស្ថានសួគ៌នៅពេលដែលគាត់បានធ្វើការសន្យាពិសេសជាមួយព្រះ ។ គាត់ថែមទាំងត្រូវបានផ្សារភ្ជាប់ជាមួយជៀរីទៀតផង ។ ការសន្យារបស់ប្រធាន ណិលសុនបានក្លាយទៅជាការពិត ។
អូលហ្គា និងជៀរីបានត្រឡប់មកផ្ទះវិញ ។ កាលពេលវេលាបានកន្លងផុតទៅអ្វីៗនៅក្នុងប្រទេសរបស់ពួកគាត់បានប្រសើរឡើង ។ ទីបំផុតពួកគាត់អាចទៅព្រះវិហារហើយអ្នកផ្សព្វផ្សាយសាសនាអាចចាប់ផ្តើមបង្រៀនម្តងទៀតបាន ។
នៅថ្ងៃមួយសំឡេងទូរសព្ទបានរោទិ៍ឡើង ។ ប្រធាន ថូម៉ាស អេស ម៉នសុន បានទូរសព្ទមក ។ លោកបានហៅអូលហ្គាឲ្យធ្វើការបម្រើមុខងារជាអ្នកផ្គត់ផ្គង់ព្រះវិហារបរិសុទ្ធនៅក្នុងព្រះវិហារបរិសុទ្ធ ហ្វាយប៊ើក ប្រទេសអាឡឺម៉ង់ ។ ដោយស្វាមីរបស់គាត់ ជៀរីនឹងត្រូវបានហៅបម្រើជាប្រធានព្រះវិហារបរិសុទ្ធ ។
អូលហ្គាពាក់រ៉ូបពណ៌សវែងរបស់គាត់ឈរញញឹមនៅខាងក្នុងព្រះវិហារបរិសុទ្ធ ហ្វាយប៊ើក ។ ពីមុន ព្រះវិហារបរិសុទ្ធហាក់ដូចជានៅឆ្ងាយណាស់ ។ តែឥឡូវគាត់អាចទៅបានរៀងរាល់ថ្ងៃ ! វាជាសុបិនដ៏អស្ចារ្យដែលក្លាយជាការពិត ។
នៅតំបន់ ដែលអូលហ្គា រស់នៅក្រោយមកបានក្លាយជាផ្នែកមួយនៃសាធារណរដ្ឋឆែក ។
នៅសាធារណរដ្ឋឆែកមានប្រាសាទថ្មរាប់រយ ។
អ្នកផ្គត់ផ្តង់ព្រះវិហារបរិសុទ្ធគឺជាអ្នកដឹកនាំភេទស្រីនៅក្នុង ព្រះវិហារបរិសុទ្ធ ។
អូលហ្គាមានរូបថតព្រះវិហារបរិសុទ្ធជាង ២០ កន្លែងនៅក្នុងផ្ទះរបស់គាត់ ។
គាត់ និងជៀរីមានកូនប្រុសម្នាក់ និងកូនស្រីម្នាក់ ។
គាត់បានរក្សាទុកសៀវភៅរូបថតដែលមានរូបថតអ្នកផ្សព្វផ្សាយសាសនាដែលបានបង្រៀនគាត់ផងដែរ ។
រូបភាពដោយ ឆ័រណា ជេ ស៊ី ធេននី