Uo i le Uo
O Se Nofoaga Paia
Mai se faatalanoaga ma Chad Strang.
O lou ofisa o loo i le ata lafoia o le Malumalu o Sate Leki. Pe a ou tilotilo atu i fafo o le faamalama, ou te vaaia upu o loo i luga o le malumalu o loo faapea mai, “E Paia i le Alii: O le Maota o le Alii.”
O na upu o loo i luga o malumalu uma. O le “E Paia i le Alii” e faamanatu mai ai ia i tatou e tatau ona tatou agavaa e ulu atu i totonu.
O le agavaa o lona uiga o le taumafai e fai le mea e finagalo le Alii tatou te faia. E oo lava i lou laitiiti, e mafai ona e saunia e ulu atu i le malumalu i se aso.
E mafai ona e saunia i ni auala faigofie. E mafai ona e aoao e uiga i le Tama Faalelagi ma Iesu Keriso. E mafai ona e tatalo. E mafai ona e tagofia le faamanatuga. E mafai ona e tausia poloaiga. E mafai ona e sailia igoa o tuaa e lei papatisoina ina ia mafai ai e se tasi ona papatiso mo i latou i totonu o le malumalu. E mafai ona e taumafai i le mea sili ina ia agalelei atu, ia alofa atu ia i latou o siomia oe, ia faamagalo atu, ma ia auauna atu.
A o e faia nei mea, o le a saunia lou loto e ulu atu i le maota o le Alii, o se nofoaga o le paia.