Tatalo mo Tessa

Saunia e Jane McBride

(E faavae i se tala moni)

E alala le tusitala i Colorado, ISA.

“E leai se tasi e manao ia te au i la latou au,” o le tala lea a Tessa.

“O ai o i ai i le itu a le Alii? O Ai? O le taimi lenei e faaali atu ai” (Hymns, no. 260).

Sa autilo ifo Tessa i lalo i ona seevae. Ua oo i le taimi mo le vasega o taaloga. Sa piki e tamaiti ni au e taaalo ai i le taaloga kikipolo. Sa ia iloa o ia o le a mulimuli piki. Sa ia masani ai lava.

E lei umi ae leai se isi tagata na totoe ua nao Tessa. “Ou te masalo ua tatou toe maua foi o ia ,” na musumusu atu ai le kapeteni o le vaega i lana uo. Ona ata aamu ai lea o i laua uma.

Sa faataga faafoliga Tessa e na te lei lagona atu.

I ni nai minute i le taaloga, sa kiki ai e se teineitiiti i le isi au le polo. Na sau sa’o lava ia Tessa!

O le a ou faaali atu ia i latou e mafai ona ou taalo! O le manatu lea o Tessa. Sa ia oso i luma e pue le polo. Ae na tau i ona lima ma pa’ū ifo i lalo i le eleele.

“E le mafai ona e faia se mea ia sa’o?” o le tala lea a le kapeteni o le au.

Sa faliu vave Tessa ma faasaga atu ia te ia. “Ua lelei! E te le toe popole i lou toe iai faatasi ma outou!” Sa ia savali tatu atu i le polo ma matuai kiki malosi.

O le uo mamae a Tessa, o Shondra, sa tamoe atu ia te ia. “Ei, e le afaina,” o le tala lea a Shondra. “E soo se tasi lava e mafai ona pau ai se polo.”

“E sa’o? Ae aisea la e le manao ai se tasi ia te au ou te iai i le latou au?” O le tala lea a Tessa.

“Atonu ona e te matuai ita lava,” o le tala lea a Shondra. Sa ia toe savali atu i le mea sa faatalitali mai ai isi tamaiti.

Sa nofo Tessa i luga o se nofoa i le tulimanu o le malae taalo. Sa loimatā ona mata. Sa lei manao o ia i le aoga e toe valaau atu i ona matua. Ua uma ona latou valaauina muamua. Sa fai mai le puleaoga sa faigata ia Tessa ona fealofani ma isi tamaiti.

Sa le iloa e Tessa pe aisea na ia faapea ai. Sa lei manao o ia e faatupu se vevesi. Sa ia lagonaina le ita ma le faanoanoa i nisi o taimi, ma sa faigata ia te ia ona taofia i totonu.

Sa mapuea Tessa. “E le taitai talafeagai au iinei,” o lana tala lea ia te ia lava.

Ina ua uma le aoga, sa faanatinati atu Tessa i fafo. Sa i ai tina iina e piki mai o ia. Sa faalogologo o ia a o faamatala e Tessa lona aso.

“Latou te le filifilia lava au i a latou au,” o le tala lea a Tessa. “Ou te lagona e pei e leai lava se isi i la’u itu”

“Ou te faamalie atu, la’u pele” o le tala lea a Tina. “O nisi taimi e agaleaga ai tagata. Ae o le Tama Faalelagi o loo i ai pea i lau itu. Ma e faapena fo’i lou aiga.” Sa ia fusi mai Tessa. “Ta o loa i le fale. E i ai se mea ou te faaofo ai oe.”

Ina ua laua taunuu i le fale, sa i ai Tinamatua iina! E fiafia lava Tessa i ana asiasiga.

“Ou te fia iloa mea uma o loo tutupu i lou olaga,” o le tala lea a Tinamatua. “O a mai le aoga?”

Sa tilotilo i lalo Tessa. “E le lelei tele.”

“Sa fai mai lou tina, o loo e feagai ma taimi faigata,” o le tala lea a Tinamatua. “E te iloa o loo tatalo o ia ma lou tama mo oe, e sa’o?”

“Ioe.”

“Ma e te iloa o tamamatua ma a’u ma te tatalo mo oe, e sa’o?”

Sa luelue le ulu o Tessa.

“Ia, ua toatele isi tagata o loo tatalo foi mo oe!”

“O le a le uiga o lau tala?” O le fesili lea a Tessa.

“Sa ou tuu lou igoa i le lisi o talosaga i le malumalu,” o le tala lea a Tinamatua. “O le ala lena, e toatele ai tagata o loo tatalo mo oe—e oo lava i tagata e le iloa oe.”

“O lona uiga, e pei o loo iai uma i latou i le au e tasi ma au?” O le tala lea a Tessa.

“Ioe, e mafai ona e vaai i ai i le ala lena,” o le tala lea a Tinamatua. “O loo faamalosiau mai pea le Tama Faalelagi ia te oe! Ma o lenei, e faapena foi tagata uma o loo tatalo mo oe.”

“Faafetai lava, Tinamatua!” Na tuuina atu e Tessa se opo lapoa ia Tinamatua.

O le isi taimi na lagona ai e Tessa le le fiafia i le aoga, sa moeiini ona mata ma manava i totonu. Sa ia manatuaina tagata uma sa tatalo mo ia. O lena mea sa fesoasoani ia te ia e maua ai se lagona lelei sili atu. Ona ia punou lea o lona ulu e fai lana lava tatalo.

Faafetai lava, Tama Faalelagi, sa ia tatalo ai. Faafetai mo le faamalosiau mai ia te au.