O Paionia i Atunuu Uma
Makerita Cummings
O le Au Paia faamaoni mai Ausetalia
E nofo le tusitala i Iuta, ISA.
Pe ua latou o mai ea i lenei mamao e aunoa ma se mea e maua ai?
Sa faamomoe e Makerita lana fanau i o latou moega. O lona atalii, o Jeffrey, na pupula mai lona mata e tasi. “Tina, o afea e mafai ona tatou o ai i le malumalu?”
Sa kisi atu Makerita i lona muaulu. “I le taimi lava e maea ai.” Sa ia tape le moli.
O loo tulimatai foi e Makerita le faapaiaga o le malumalu. Sa fiafia o le a faamau atu i lona aiga. Ae sa mamao ese le malumalu i Niu Sila. O le a tele se tupe e faaalu e malaga ai mai lo latou aiga i Ausetalia. Sa latou sefe mo ni nai masina. Sa oo lava ina latou faatau ese atu la latou taavale. Ae sa manaomia pea le 200 o nisi pauni.
Sa tootuli o ia e tatalo. “Tama Faalelagi, faamolemole fesoasoani mai ia i matou ia maua le vaega o totoe o le tupe matou te manaomia.”
O le taimi lava lena na savali mai lana tane, o Don. “Na ou vaai i lo’u tama ananei. Sa ia faatoese mo le le asiasi mai ia i tatou, ma na ia tuuina mai mo i tatou lenei mea.”
Sa ia tuuina atu ia te ia se fasi pepa. O se siaki mo le 100 pauni! Sa faigata ona talitonu i ai Makerita. E lei talanoa atu le tama o Don ia i latou mo ni nai masina. O se vavega lava!
I ni nai aso mulimuli ane, sa asiasi atu ai matua o Makerita. “Sa ma sefeina sina tupe,” o le tala lea a lona tama. Sa ia oomiina le 100 pauni i le lima o Makerita. “Ia manuia le tou malaga!”
Sa ataata Makerita. Ua lava la latou tupe i le taimi nei!
Sa iai se faafitauli e tasi lava. O le malaga o le a alu ai le ono vaiaso. Sa fai mai le pule a Don e le mafai ona umi faapena se taimi e alu ai. Ina ua mavae le tele o tatalo, sa tonu ia Makerita ma Don o le a faamavae mai i lana galuega.
Mulimuli ane ua oo i le taimi e o ai. Sa fesoasoani Makerita ma Don i le la fanau i luga o le nofoaafi. Sa latou tietie mo aso atoa e lima.
“Ua tatou oo ea?” Sa fesili atu ai Jeffrey ia Makerita.
“E le i oo lava,” o lana tala lea. “O lenei la o le a tatou o i le vaa i Niu Sila.”
Ae sa i ai se isi tala le lelei. O le vaa na lavea. E leo toe avea ni pasese. Pe ua latou o mai ea i lenei mamao e aunoa ma se mea e maua ai?
Leai! Sa toe tali mai tatalo a Makerita. Sa tuu atu e se tasi ia i latou ni pepa malaga o le vaalele. E lei umi ae felelei atu Makerita ma lona aiga i luga atu o le vasa. O le nofoaga e sosoo ai, Niu Sila!
Ina ua mulimuli ane laa atu Makerita i totonu o le malumalu, sa mafanafana lona loto. Sa oo foi ina ia faatalofa i le aao o le perofeta. “O le a faamanuiaina e le Tama Faalelagi lou aiga ona sa e filifili e sau iinei,” o lana tala lea.
Mulimuli ane, sa laei papae ia Makerita ma lona aiga. Sa latou tootutuli faataamilo i se fata faitaulaga ina ia faamauina. Sa susulu fiafia foliga o Makerita. O lea la ua mafai ona latou faatasia e faavavau!
Ina ua latou taunuu i le fale, sa na o le 5 pauni na totoe a Makerita ma Don. Ae sa manatua e Makerita le folafolaga a le perofeta. O le a faamanuiaina i latou e le Tama Faalelagi.
Ma sa Ia faia lava! O le vaiaso na sosoo ai, na sau ai Don i le fale ma se tala fiafia. “Ua maua la’u galuega! Ua sili atu nai lo le mea sa ou iai muamua.”
Sa opoina e Makerita o ia. Sa ia iloa o le alu i le malumalu e tauia i taimi uma.
O Ausetalia e na o le pau lea o le atunuu o loo avea foi ma se konitineta.
Sa faapaiaina le malumalu o Hamilton Niu Sila i le 1958.
O le aso ua lima malumalu i Ausetalia.
Sa papatisoina Makerita ina ua uma ona faaipoipo o ia.
Sa auauna atu Makerita ma lona toalua o le faatina ma le peresitene o malumalu eseese e lua i Ausetalia.
Sa nofo Makerita i Perth, Ausetalia, e silia ma le 5,300 km (3,300 maila) mai Hamilton, Niu Sila.
Ata na tusia e Margarida Esteves