O se Aso Fanau i le Malumalu
O le aso fanau o Litia ua lata mai.
“O le a se mea e te manao i ai mo lou aso fanau, Litia?” O le fesili lea a Tina.
Sa mafaufau Litia mo ni nai minute. Pe na ia manao i se meataalo fou? Pe na ia manao i se tusi e faitau? Ona iloa lea e Litia le mea sa ia manao lava i ai.
“Ou te fia asiasi i le malumalu,” o le tala lea a Litia. Sa manao o ia e faatasi ma lona aiga. Sa manao o ia e alu i se nofoaga fiafia. Ma o le a se isi nofoaga na sili atu le fiafia nai lo le malumalu?
I le aso fanau o Litia, sa sauni ai Tina, Tama, o Litia, ma ona uso e tietie atu i le malumalu. Sa oo lava ina valaaulia e Litia lana uo o Grant.
Sa o se malaga umi. Ae sa le afaina lena. Sa faamatala e Litia ma Grant ma lona uso o Lusi ni tala malie. Sa ia faamatala atu se tala i ona uso laiti, o Elisa ma Ellie.
Ma le mea mulimuli, sa mafai e Litia ona vaai atu i le malumalu. Ua latou taunuu!
“Vaai i le agelu o Moronae!” O le tala lea a Litia. Sa ia tusi atu i le malumalu.
O le taimi lava na alu ai o ia i fafo mai le taavale, sa tamoe atu ai Litia i faitotoa o le malumalu.
Sa i ai ni laau aulelei e faataamilo i le malumalu. Sa i ai i laau ni lau lanu moli ma le samasama. O lau i luga o le palapala ua pao a o savavali solo Lydia ma lona aiga faataamilo i le malumalu.
Sa agi mai se matagi tele agai i laau. Sa tilotilo atu Litia i laulaau ua felelei i le ea. Sa tamoe o ia e pue se laulaau a o lei oo i le eleele. Sa matagofie! Sa ia tuuina i totonu o lana taga.
Sa faitau e Tama le faailoga i luga o le malumalu. Sa faapea mai, “E Paia i le Alii: O Le Maota o le Alii.”
“O lona uiga e mafai ona tatou lagona le latalata atu ia Iesu iinei,” o le tala lea a Tina.
Sa lagona e Litia le toafilemu. O se nofoaga fiafia tele lenei!
A o latou o ese atu, sa aumai i fafo e Litia lana laulaau. Ina ua taunuu o ia i le fale o le a ia tuuina i totonu o lana pusa faapitoa. O le auala lena e mafai ai ona ia manatua i taimi uma lenei aso matagofie!
Ata na tusia e Tina Finn