Filemu ma pese o le Peraimeri
Sa mafaufau Max agai i lona aiga o le a iai i se aso.
“Ou te lagona le Faaola pe a iai le alofa” (Tusipese a tamaiti, 102).
Sa faaluelue Max i tua ma luma i lona nofoa. O le vaega e sili ona fiafia i ai i le Peraimeri lea o le a amata.
“Susu maia i le taimi o pesepesega,” o le tala lea a Sister Rosa. Sa amata ona ta le piano. Sa pese faatasi atu ai ma Max.
E fiafia tele Max i le taimi o pesepesega. Ae sa lei pei lona aiga o aiga fiafia sa ia pese e uiga iai i le Peraimeri. Sa faigata mea uma i le fale.
O le mafuaaga lena e matuai fiafia tele ai Max i le Peraimeri. Sa ia lagonaina i taimi uma le alofa ma le saogalemu a o i ai o ia iina. Sa ia lagonaina le filemu i le Peraimeri.
“Mo le tatou pese e sosoo ai, e i ai sau luitau faapitoa mo oe,” o le tala lea a Sister Rosa. “A o tatou pepese, ou te manao ia te oe e te mafaufau pe o le a faapei pe a e matua ma i ai sou lava aiga.”
Na toe amata le musika mai le piano. O nota sa malu ma filemu. Sa tilotilo solo Max i le potu. Sa mafai ona ia vaai i ata o Iesu ma le malumalu o loo tautau i luga o le puipui.
Sa amata ona pepese isi tamaiti. Sa amata foi ona pese Max. O lo’u aiga e manuia i le mana o le perisitua.
Sa moeiini mata o Max ma vaai faalemafaufau i le avea o ia ma se tama. Sa ia mafaufau e tatalo faatasi ma lona aiga i le lumanai. Sa ia vaai faalemafaufau i le usuina o pese faatasi ma i latou, taaalo faatasi i taaloga, ma le faia o afiafi faaleaiga.
A o ia usuina upu mulimuli, sa i ai se ataata tele i foliga o Max. Ou te lagona le Faaola pe a iai le alofa.
E i ai se aso e mafai ai e Max ona maua se aiga faapena. E i ai se aso e mafai ai ona ia maua se aiga lea e na te lagona ai le filemu e pei ona ia maua i le Peraimeri. O le mafaufau e uiga i ai, na lagona ai e Max le mafanafana atoa.
Na sii lona lima. “Sister Rosa,” o le tala lea a Max, “Ou te manatu o le pese lena e pei o se fua o le faiga o se meaai(recipe). O le fua mo se aiga fiafia.”
“E sa’o oe,” o le tala lea a Sister Rosa. “E Leai se aiga e atoatoa. Ae a tatou taumafai e avea e pei o Iesu, e mafai ona tatou fesoasoani i o tatou aiga. E mafai ona tatou fesoasoani ia avea o tatou aiga ma nofoaga filemu.”
Sa tilotilo atu Max i le ata o le malumalu i luga o le puipui. Sa ia iloa e mafai ona ia fesoasoani i lona aiga i le taimi nei e ala i le avea e faapei o Iesu. Ma e ui ina sa mamao lava, ae sa fiafia o ia i le i ai o lona lava aiga. Ma na ia fiafia ai i le iloaina e mafai ona faatasi o ia ma i latou e faavavau.
Ata na tusia e Matt Smith