Saunia mo le Malumalu
“E faapefea ona ou maua se pepa faataga?” O le fesili lea a Ajan.
“Vaai ia outou faia mea uma ma le agavaa” (Mamona 9:29).
Sa ataata Ajan ina ua ia faalogoina se tuitui i le faitotoa. Sa valaaulia e Madda (Tina) lo latou uso o auaunaga e fesoasoani i se afiafi faaleaiga faapitoa.
Sa ia tatalaina le faitotoa. “Wah gwaan, Brother Williams!” (“O le a se mea ua tupu?”)
“O loo irie mea uma!” O le tala lea a Brother Williams. (“O loo lelei mea uma!”) Sa ia tuuina atu ia Ajan se taga mago mai lana laau.
Sa nofo i lalo Brother Williams i luga o le nofoa. Sa talosagaina e Madda le tuafafine laitiiti o Ajan, o Tana, e fai se tatalo.
Ina ua uma, sa fai mai Brother Williams, “O le tausaga lenei, o le a atoa ai le 12 o Ajan. E i ai se tasi e iloa pe aisea ua taua ai lenei tausaga mo ia?”
O le uso laitiiti o Ajan, o Tejaun, sa feminoiai solo i le fiafia. “Ona o le a mafai ona ia maua le perisitua ma tufatufa atu le faamanatuga!”
“E sa’o lena!” O le tala lea a Brother Williams. “Ae o loo i ai foi se isi mafuaaga.”
Sa ia tatalaina lana atotupe ma aumai i fafo se fasi pepa laitiiti. “O se pepa faataga lenei o le malumalu.”
Sa ia tuuina atu ia Ajan.
“Manaia!” Sa faasolo e Ajan ona tamatamailima i luga o le malumalu auro i luga o le kata. “O le a se mea e te faaaogaina ai?”
“Ou te faaali atu i le tagata o loo saofai i le laulau pito i luma i le malumalu. E faaali atu ai ia i latou ua ou agavaa e alu i totonu.”
“Ou te fia vaai!” Sa se’i mai e Tana mai ia Ajan ma suesue i ai ma le totoa.
“O le a sou manatu i ni ou lagona pe afai e i ai sau pepa faataga a oe lava?” O le fesili lea a Brother Williams.
“O le a ou lagona le faatauaina!” Sa tilotilo ae Ajan i luga mai le kata. “Ae ou te le iloa pe mafai ona ou alu i le malumalu. E tele ni tupe e faatau ai se pepa o le vaalele e alu ai iina.”
“E le mafai foi ona ou alu soo i le malumalu,” o le tala lea a Brother Williams. “Ae o lau pepa faataga e faamanatu mai ai ia te au ia saunia i taimi uma e alu i totonu.”
Sa mafaufau Ajan mo se minute. “Ou te fia saunia foi!” o lana tala lea. “E faapefea ona ou maua se pepa faataga?”
“E te lua feiloai ma le epikopo,” o le tala lea a Brother Williams. “O le a ia fesili atu ia te oe i nisi o fesili e iloa ai pe ua e saunia.”
“O lona uiga e pei o se suega?” Sa fesili atu ai Ajan, ma se popole itiiti.
“E pei lava o se talanoaga,” o le tala lea a Brother Williams. “O le epikopo o lau uo, ma e finagalo o ia e fesoasoani ia te oe ina ia e saunia.”
Sa luelue le ulu o Ajan. Sa fiafia o ia i le epikopo.
“E te fia vaai i fesili?” Sa tuu atu e Brother Williams ia Ajan se fasi pepa o i ai ni nai fesili. Sa fetaomi atu Tana ma Tejaun ia te ia e vaai foi i ai.
“Numera tasi,” o le tala lea a Ajan. “‘Pe e te faatuatua ma i ai se molimau i le Atua, Le Tama Faavavau; Lona Alo, o Iesu Keriso; ma le Agaga Paia?’”
Sa ia susulu. Sa faigofie lena mea. “Ioe!”
Sa ia faaauau pea ona faitau i fesili, e taitoatasi. Sa faamalamalama mai e Madda ma Brother Williams le uiga o ni nai mea itiiti.
Ona faitau lea e Ajan o se isi fesili: “‘E te malamalama ma usitai i le Upu o le Poto?’” Na faauu o ia. “I se tasi taimi na tuuina mai ai e D‘andre ia te au ni vai sui i fagu malosi a o ou i ai i lona fale,” o lana tala lea. “Ae ou te le toe fia inu ai lava. Pe o lona uiga la e le mafai ona mauaina se pepa faataga o le malumalu?”
“O le tausia o le upu o le poto o lona uiga o le aua le inu ava malosi, ma o le vai sui i fagu malosi e i ai le ava malosi,” o le tala lea a Brother Williams. “Ae e mafai ona e salamo i taimi uma ma ia agavaa e alu i le malumalu.”
“Ona o Iesu!” o le tala lea a Tejaun.
“Sa’o lelei lava!” O le tala lea a Brother Williams. “Ona mafai lea e lau pepa faataga o le malumalu ona faamanatu atu ia te oe ia faaauau pea ona usitai i le Upu o le Poto. Ma ia saunia i taimi uma e alu i le malumalu. ”
Sa ataata Ajan. Sa lelei atili ai ona lagona.
“Atonu o le a ou alu i le malumalu i se taimi lata mai lava,” o le tala lea a Ajan. “Ma pe a ou faia, o le a ou saunia!”
Ata na tusia e Shawna J. C. Tenney