O Se Vaaiga Ia Musa
E alaala le tusitala i Aioua, ISA.
Atonu e le agaleaga moni le tamaitiiti fou.
“Aua e vaai tagata i le tino, a e vaai Ieova i le loto” (1 Samuelu 16:7).
“Tina, sa i ai se mea na tupu i le aoga i le aso lea e matuai ou popole ai a.” Na faapau le ato a Angie i luga o le fola ma faapalasi atu i lalo i luga o le nofoa.
Sa tilotilo ae tina mai le tusi sa ia faitauina. “Oi? O le a le mea na tupu?”
“Ia, o loo i ai se tamaitiiti fou e igoa ia Musa i la’u vasega.”
“Lelei tele!” Na fai atu ai Tina. “Na e talanoa ia te ia?”
“Leai, ma ou te le manao i ai!” O le tala lea a Angie. “E agaleaga.”
“O le a le mea sa ia faia?”
Sa faamata ita mai Angie. “Sa ou vaai ia te ia o savali atu i le aoga ma lona tuafafine. Sa ia faasavalia o ia i ona tua i le ala atoa! O taimi uma lava na ia taumafai ai e savali atu i ona autafa, sa ia faanatinati ma oso atu i ona luma. Na ou matuai ita ai lava.”
Na faauu tina. “E le manaia tele lena mea. Atonu e mafai ona ia faaaogaina se uo e pei o oe e faaali atu ai ia te ia le ala e taulima ai isi i le alofa.”
O le taimi lava lea, na faanatinati atu ai i totonu le uso laitiiti o Angie, o Meghan, “Tina, mate mai la? O loo i ai se teine fou i lau vasega! O lona igoa o Dalia Kader. Pe le o se igoa matagofie ea lena?”
“E pei lava o lona tuagane e i totonu o la’u vasega,” o le tala lea a Angie.
“E mo’i? Ua e laki tele.”
Na faauu Angie. “Laki? Aisea?”
“Na tau mai e Dalia ia te au mea uma e uiga ia te ia!”
“Ou te matea na ia fai atu ai,” na memumemu atu ai Angie.
“Sa ia fai mai sa tatau ona ia tuuina ni mataua i ona mata i le taeao nei, ma sa tatau ona ia faia se matatioata pogisa e puipuia ai ona mata, ae sa galo ia te ia. O lea la, ina ua la savavali i le aoga, sa savali atu Musa i luma o ia i le ala atoa e faapaolo ai o ia mai le la. E le manaia ea lena mea?”
Na emo mata o Angie i le faateia. Pe na ia faamasinoina sese ia Musa?
“E foliga mai o ia o se tuagane magafagafa lelei lava,” o le tala lea a Tina.
“O lea lava!” O le tala lea a Megan. “Ma ina ua la oo atu i le aoga, sa la savavali faatasi ma ia i le ofisa ina ia mafai ona la vili atu i le fale. Ma sa ia nofo ma ia seia oo ina aumaia e lona tina le matatioata pogisa.”
Oka, o le manatu lea o Angie. Ou te matea ou te lei iloa le mea moni na tupu.
Sa nofo i lalo Meghan i talaane o Angie i luga o le nofoa. “E manaia tele le matatioata pogisa a Dalia! E viole ma e iai maa iila i luga. Tina, e mafai ona ou valaaulia o ia e sau i lenei vaiaso? E mafai ona fai ma matatioata pogisa ma fai ma taaloga faiga-ofu!”
“Manaia le manatu,” o le tala lea a Tina. “Aisea e te le valaaulia ai foi Musa? Ou te fia feiloai ia i laua uma. O le a sou manatu, Angie?”
“Ou te fia feiloai foi ia i laua.” Sa ataata Angie. “Ou te manatu o Musa o le a avea ma se uo lelei.”
Ata na tusia e Jörg Saupe