Si’iina o Spotty
E alala le tusitala i Iuta, ISA.
E faapena le ala e fesoasoani ai Iesu ia i tatou.
“O le a tuu atu e le Alii ia te oe le malologa, mai lou faanoanoa, ma mai lou mata’u” (2 Nifae 24:3).
Sa ata Abbie. Sa feosofi solo ma le fiafia, ma faase‘e solo i ona autafa. O le fea e tatau ona ia pikia?
Sa tamoe atu ia te ia se tamai maile uliuli ma se vaega paepae i lona fatafata. Sa tata lona siusiu ma eko lona lima. Ma sa iloa e Abbie. O ia lea! Sa ia si’i o ia i luga.
“O ia lea, Tama!” Sa fusi lemu atu e Abbie le tamai maile mafanafana ma minoi soo. “Tatou faaigoa ia Spotty.”
Ina ua la taunuu i le fale, sa fiafia le tuagane ma le uso o Abbie e feiloai ia Spotty. Sa tata le siusiu o Spotty ma taavalevale i lona manava e manao i seisi e valu lona manava. Ina ua tuu i lalo e Tama le pesini a le maile, sa tanumia e Spotty lona ulu i meaai!
Mulimuli ane, sa o Tama ma Abbie e faasavalivali Spotty. Sa tuu atu e Tama ia Abbie le fusi.
“Pipiimau pea,” o le tala lea a Tama. “E ono fefe Spotty ma taumafai e sola ese. E manaomia ona e mautinoa e na te lagona le saogalemu.”
“Ua lelei Tama.” Sa osooso Abbie i luga ma lalo. Sa le mafai ona ia faatali!
Sa latou savavali atu i lalo o le auala. Ia, sa savavali Abbie ma Tama. Sa savali malosi Spotty. Sa ia sogisogi i vao. Sa ia ou i isumu vao. O nai minute uma lava, sa ia toe tepa ai i tua ia Abbie ma Tama.
E lei umi ae latou oo mai i se fale ma ni maile lapopoa se tolu. Sa ou ma le taufeai mai i tua o le pa.
Sa tu faamalo Spotty. Sa taumafai Abbie e toso o ia i luma, ae sa le mafai ona minoi.
“E le afaina. E le mafai ona latou oo atu ia te oe,” o lana tala lemu lea. “O lo o e saogalemu.”
Sa na o le tagi lemu lava o Spotty.
“Atonu e tatau ona e si’iina o ia,” o le tala lea a Tama. Sa piki e Abbie Spotty i luga ma savali atu i le isi itu o le auala. Sa tete o ia. Ina ua le mafai ona latou toe vaai i maile, sa toafilemu Spotty. Sa ia etoeto foliga o Abbie, ma sa ia tuuina o ia i lalo.
I ni nai minute mulimuli ane, sa amata ona faalemu le alu a Spotty. Sa punou lona ulu. Sa taoto ane i lalo o le auala savali.
“Sau loa,” o le tala lea a Abbie. “Toeitiiti tatou taunuu i le fale.”
Sa emo atu mata o Spotty ia Abbie. Na mapuea o ia.
“Oi. Ua lelava tele, si au uo?” Sa ata Abbie. Sa ia toe pikiina o ia i luga. O le taimi la lea sa ia siiina o ia seia oo lava i le fale. Sa ofo atu Tama e fesoasoani, ae sa lei mamafa tele Spotty. Ma sa alofa Abbie ia te ia ma manao e tausi o ia.
O lena Aso Sa, sa talanoa ai le faiaoga Peraimeri a Abbie e uiga ia Iesu Keriso.
“E alofa tele Iesu ia i tatou lea na Ia puapuagatia ai mo i tatou,” o le tala lea a Sister Oliva. “Sa Ia lagonaina o tatou faanoanoaga uma ina ia mafai ona Ia malamalama i o tatou lagona. O lena auala, e mafai ai ona Ia tauaveina i tatou i o tatou tofotofoga.”
Sa mafaufau Abbie pe na faapefea ona ia tauaveina Spotty. E faapena le ala e fesoasoani ai Iesu ia i tatou, Sa mafaufau ai Abbie. Atonu e le o tauaveina moni o ia e Iesu, ae sa Ia fesoasoani ia te ia ia lagona le malosi atu pe a ia manaomia o Ia. E pei o le isi po, ina ua fefe o ia i le pogisa. Sa ia tatalo ma lagona le saogalemu. Pe ina ua popole o ia nei galo ia te ia ana meaaoga. Sa ia tatalo i lena taimi ma maua se lagona lelei—ma sa ia manatuaina!
Sa ataata Abbie. Sa ia iloa e sili atu le alofa o Iesu Keriso ia te ia nai lo lona alofa ia Spotty. Ma sa tele naua lena mea!
Ata na tusia e Alexandra Ball