Mai le Au Peresitene Sili
O Le Ulua’i Meaalofa o le Kerisimasi
Sii mai le “The Gospel of Peace,” Faigalotu o le Kerisimasi a le Au Peresitene Sili, 8 Tes., 2019, broadcasts.ChurchofJesusChrist.org.
I se tasi Kerisimasi, sa faanoanoa ai se teineitiiti e 11 tausaga le matua ona sa lei maua sana pepe meataalo fou sa ia manao ai mo se taimi umi lava. Sa mafaufau o ia pe ua matua tele o ia mo le Kerisimasi. “E te le o matua tele lava mo le Kerisimasi,” o le tala lea a lona tama. “Ae ua lava lou matua e te malamalama atili ai e uiga i ai.”
Sa ia faamatala atili mai. “Lea ua e faalogo tatou te avatu ni meaalofa i le Kerisimasi ona sa aumai e leoleo mamoe ma Le Au Makoi ni meaalofa i le tamaitiiti o Keriso,” o lana tala lea. Ona ia faamatala atu lea ia te ia e uiga i le ulua’i meaalofa o le Kerisimasi. O le taimi na tuuina mai ai e le Tama Faalelagi ia i tatou Lona Alo, o Iesu Keriso, e avea ma o tatou Faaola. Sa silafia e le Tama Faalelagi o le a puapuagatia Lona Alo i le lalolagi, ae sa Ia tuuina atu pea Iesu i le lalolagi. Ma sa tuuina mai ma le naunauta’i e Iesu o Ia lava ina ia mafai ai ona tatou maua le ola e faavavau.
O lena po sa lei moe ai le teineitiiti ma se pepe meataalo o le Kerisimasi i lona aluga. Ae i lona loto sa ia maua ai se lagona fou o le filemu. Sa ia te ia se meaalofa e le mafai ona pala/faaleagaina pe leiloa. O le meaalofa sili lea o le alofa a le Tama Faalelagi.
“Aua ua faapea lava ona alofa mai o le Atua i le lalolagi, ua ia aumai ai lona Atalii e Toatasi.” Ioane 3:16
Ata na tusia e J. Beth Jepson