O Le Keke o le Kerisimasi
O lenei tala sa tupu i Iapani.
E fiafia Kaiya i meaai suamalie o le Kerisimasi. Ae sa sili atu lona alofa i lana uo.
O taeao o le Kerisimasi, ma sa popole Kaiya. Sa lei popole o ia i le mauaina o se meaalofa po o le a foi le meaalofa o le a i ai. Sa popole o ia i lana uo o Minato.
Sa taaalo Kaiya ma Minato mo le kalapu soka lava e tasi. Ma sa aooga i le aoga e tasi. Ae e lei sau Minato i le aoga mo aso e tolu. Sa ia misia foi tolegina soka. Na fai mai le faiaoga sa ma‘i le tama o Minato. Ina ia mautinoa o le a le mama‘i isi, e tatau ona nonofo le aiga atoa o Minato i le fale mo le lua vaiaso.
Sa popole Kaiya ne’i ma‘i foi ma Minato. Sa ia fesili atu ia Mama pe mafai ona latou siakiina o ia. Sa la valaauina le tina o Minato.
“Aua e te popole,” o lana tala lea. “O loo manuia matou. Ae e lei mafai ona matou mauaina la matou kurisumasu kēki (keke Kerisimasi).”
O le keke Kerisimasi o le keke e sili ona fiafia i ai Kaiya. Sa i ai se kulimi paepae ma teuga felanulanua’i i le pito i luga. O se meaai faapitoa i Iapani. Sa ia manatu e tatau ona lagona e Minato le faanoanoa i le le mafai ona auai.
Ina ua uma le telefoni, sa fai mai Kaiya, “Mama, ta o e ave la tatou keke Kerisimasi mo latou. Ma e mafai foi ona tatou aveina ma se pizza mo i latou?” Sa ia iloa o le pizza saba (i‘a) e fiafia tele i ai Minato.
Na malie i ai Mama. Muamua sa latou okaina le pizza. Ona tuu lea e Mama le keke Kerisimasi i totonu o se pusa. Na sosoo ai ma lo la aoina mai o ni meaai mama ma vaiinu suamalie.
“O le a fesoasoani nei mea ia i latou e aulia atu ai i nai aso e sosoo ai,” o le tala lea a Mama.
Sa o Papa ma Kaiya e piki mai le pizza. Ona la o atu lea i le fale o Minato e kiliva ai mea uma. Sa le mafai ona la o i totonu, o lea sa laua tuua ai mea uma i le faitotoa, faatatagi le logo, ma o ese loa.
Ina ua taunuu Kaiya i le fale, sa faaali atu e Mama ia te ia se feau tusitusia mai le tina o Minato. “Ou te le talitonu na e aumaia ia i matou se keke!” na faitauina. “Ua fiafia tele tamaiti. Faafetai tele lava.”
I ni nai minute mulimuli ane, na tatagi ai le logo o le faitotoa. O Uso ma Tuafafine Takahashi. O i latou o ni tagata o le Ekalesia sa nonofo latalata ane.
“Na maua aumaia mo outou ni higashi (kuki araisa) mo le Kerisimasi,” o le tala lea a Tuafafine Takahashi. Sa ia uuina mai se ipu kuki ma ni mamanu matagofie.
Ina ua uma le taumafataga o le afiafi, sa aai Kaiya ma ona matua i kuki. “Ua e faanoanoa ea ua leai sa tatou keke Kerisimasi?” O le fesili lea a Tina.
Sa mafaufau Kaiya e uiga i lana fesoasoani ia Minato ma lona aiga. “E leai lava,” na ia fai atu ai. “Aua, o le Kerisimasi e faatatau i le foai atu!”
Ata na tusia e Felia Hanakata