Mea Faafiafia

O Meataulima o le Kerisimasi i le salafa o le Lalolagi

Saunia e Chelsea Flake Mortensen

O nei galuega taulima taitasi e mai i atunuu eseese. E mafai ona e faia se teuteuga e faavae i tu ma aga masani o le Kerisimasi a lou aiga?

O Le Aso Pale a St. Lucia

I Suetena, o le Aso o St. Lucia o loo i le amataga o Tesema. E ofu e teineiti ni ofu papae ma palealii e iai moligao. O moligao e faatusa i le malamalama o Iesu Keriso.

Oti ni siepi o lau mai pepa ma valivali lanumeamata. Faakelu pe faapipii faatasi e fai ai se pale lapotopoto.
Fai ni moligao mai pepa ma faaopoopo i le pale.

Fetu Susulu

I Filipaina, e amata e tagata ona faamanatuina le Kerisimasi ia Setema! O le toatele o tagata e faia ni molitusi e mamanuina i i fetu e taua o parols.

Tuu ni fasilaau se lima i luga o le tasi ma le isi i se foliga fetu. Nonoa faatasi i latou i le mea latou te fesopoai ai.
Faapipii pepa manifinifi i luga o le fetu.
Teuteu lou fetu. Faaopoopo se li‘o o le manoa i le pito i luga o le fetu e tautau ai i luga.

Mea Faapapa i Pasila

E faamanatu e tagata i Pasila le Kerisimasi e ala i le faia o se fiafia i luga o le matafaga ma matamata i faaaliga o mea faapapa.

Oti ni fasipepa uumi se lua, e tusa ma le 2–3 inisi (5–8 sm) le lautele. Fai ni mea iti e tuu i lalo i le tasi itu o fasipepa taitasi e fai ai se koke. Aua le otiina atoa!
Tuu fasipepa i luga o le tasi ma le isi ma taai faataamilo i se fasilaau umi po o se fasilaau mimiti. Faapipii pe kelu le pito i lalo o le pepa i le laau.
Ili i fafo le koke e foliga mai o se mea faapapa! Faaali mai au teuga o mea faapapa i se fagu tuuteu po o se ipu.

Faapapa Kerisimasi

I Egelani, e fiafia tamaiti e aumai ni afifi laiti e ta‘ua o faapapa Kerisimasi. E toso e se tagata se toatasi i pito taitasi e sue ai meaai mama ma meaalofa laiti i totonu!

Afifi se fasipepa manifinifi faataamilo i se paipa o pepa malo po o se pepa mafiafia. E tatau ona umi atu le pepa nai lo le paipa.
Faatumu le paipa i mea teuteu ninii ma lole po o se isi meaalofa laitiiti.
Mimilo le pepa i pito taitasi.
Nonoa uma itu e lua i se lipine po o le manoa e tapuni ai.