O Paionia i Atunuu Uma
Olga Bing
Taitai Peraimeri i Pasila
E alala le tusitala i Kalefonia, ISA.
Sa valaaulia uma i latou e Olga.
“Ua ou misia tagata uma i la matou paranesi,” o le tala faanoanoa lea a Olga. Sa toe na o ia ma lona aiga i le Aoga Sa.
Na tapunia e le uso o Olga, o Wilma, ana tusitusiga paia. “Ua ou misia lava foi i latou.” Sa lue atu le ulu o Tina ma Tinamatua.
Sa manao Olga e tagi. Ina ua papatisoina o ia, e 60 tagata na o mai i le lotu i vaiaso taitasi! Ae na amata loa le Taua Lona II a le Lalolagi. Ona o le taua, sa tatau ai i faifeautalai uma i Pasila ona o i le fale. A aunoa ma i latou, sa le lava i latou e umia le perisitua ona faia ni sauniga masani a le Ekalesia. Sa le mafai ona latou faamanuiaina le faamanatuga pe papatisoina tagata.
Sa taofia le mautotogiina o le falelotu e le ekalesia. Na feiloai tagata o le Ekalesia i fale o tagata e suesue i tusitusiga paia. Ma sa taitoatasi, ona amata ona latou o uma i isi lotu.
Ina ua uma le taua, sa manatu Olga o le a toe faia e le paranesi ni sauniga lotu. Ae sa lei lava ni tagata. O lea sa faaauau ai pea ona feiloai na o Olga ma lona aiga i le Aso Sa.
“Ua ou misia le pese faatasi ma tagata uma,” o le tala lea a Olga. “Ma ua ou misia tamaiti sa masani ona o mai i le lotu.”
“E faapena foi au,” na fai atu ai Tinamatua.
I nai aso na sosoo ai, sa mafaufau malosi Olga i le mea e fai. Sa ia tatalo mo se fesoasoani. “Tama Faalelagi, faamolemole fesoasoani mai ia matou iloa le auala e toe malosi ai la matou paranesi.”
I se tasi aso na maua ai e Olga se manatu. Sa alu o ia i fafo. Sa taaalo ni teineiti se toalua i lalo o se laau.
“Olá!” Sa fai atu ai Olga. “E te fia sau i le vasega a la‘u ekalesia mo tamaiti i le po nei? O le a tatou aoao e uiga ia Iesu, usu pese, ma fiafia.”
Sa tilotilo atu teineiti i le tasi ma le isi. “Ioe,” o le tala lea a se tasi o i laua.
“Lelei tele! Afai e fai mai ou matua e mafai ona e sau, feiloai mai ia te au iinei i se taimi mulimuli ane. E mafai ona tatou savavali faatasi i le vasega.”
Sa talotalo faatofa atu Olga ma savali i lalo o le auala. Sa ia maua nisi tamaiti o taaalo i le futebol (soka). Sa valaaulia uma i latou e Olga.
O nisi o tamaiti na o mai muamua i le lotu. Sa fiafia lava i latou e toe o mai! Sa lei mananao isi tamaiti e o mai. Ae na faailoa atu e Olga ia i latou uma e talia i latou.
Mulimuli ane i lena po, sa faapotopoto ai e Olga tamaiti o e na fai mai o le a latou o mai, faatasi ai ma o latou matua. Sa latou savavali faatasi uma i lona fale.
Sa aoaoina e Tina ma Tinamatua matua i se potu e tasi. Sa aoao atu e Olga ma Wilma tamaiti i se isi. Sa usuina e Olga ni pese faatasi ma i latou. Sa faamatala e Wilma tala o tusitusiga paia.
Sa lagona e Olga le fiafia a o ia savavali atu ma tamaiti i o latou fale. “Faafetai lava mo le o mai,” o lana tala lea. “Feiloai i le isi vaiaso!”
Sa laitiiti le latou paranesi, ae sa iloa e Olga o le a toe tupu. Ma sa ia manao e fuafua le lesona o le vaiaso lea i le taimi lava lena!
O Pasila o le atunuu aupito tele lea i Amerika i Saute.
Na lolomiina le Tusi a Mamona i le gagana Potukale i le taimi o le Taua Lona II a le Lalolagi.
O Pasila e fitu ona malumalu, ma le isi lua o loo fuafua mai.
Sa papatisoina Olga i le Vaituloto o Guaíba.
Mulimuli ane sa avea o ia ma se peresitene o le Peraimeri.
Sa faaipoipo Olga ma maua ai ni fanau se toalima.
Ata na tusia e Tatsiana Burgaud