O Le Kerisimasi i Mali
E alaala le tusitala i Texas, ISA.
Sa le mafai e Judith ona faatali e faamanatu le soifua mai o Iesu i lana paranesi.
“Ua logo pesega, A agelu mai luga, ma le tali a mauga” (Viiga, nu. 117).
O le Aso Kerisimasi. Sa hamu ia Judith a o savali atu o ia i le falelotu. Sa latou o ma ona tei i le pati o le Kerisimasi a le latou paranesi.
Sa ataata lona uso, o Eseta. “Pe o le ‘Ua Logo Pesega a Agelu mai Luga?’”
“Ioe! Ou te fiafia tele i ai. Talosia ae tatou te usuina i le asō.” Sa ataata Judith.
“Ou te fiafia tele i lena pese!” Sa faaopoopo atu i ai Désiré, lona tuagane. Sa ia pese leotele, “Fa-a-a-a-a-manu!”
Sa latou talie faatasi. Sa le mafai ona faatali Judith e faamanatu ma la latou paranesi. E le toatele ni tagata i Mali e faamanatuina le Kerisimasi. I lenei vaega o Aferika, o le toatele o tagata sa le tele ni mea na iloa e uiga ia Iesu. Ia i latou, o le Kerisimasi ua na o se aso masani.
Sa tumu ia magaala i tagata. Sa faatau atu e tagata faatauoloa ni meleni lanumeamata vaivai. Sa ave e tagata talavou ma matutua ni sioki vai i luga o o latou ulu. Sa taitai e se alii talavou se asini o loo tosoina se taavale toso. Sa tilotilo ae Judith i luga i le olo umī ma vaapiapi o se faletapuai faamusolemi. O se fale matagofie lea sa tapuai ai le toatele o o latou tuaoi Musolemi.
Sa masani ona o Judith, Eseta, ma Désiré i le ekalesia a Papa. Ae o le taumafanafana talu ai, sa latou auai ai i le O Le Ekalesia a Iesu Keriso o le Au Paia o Aso e Gata Ai. O lea la ua savavali faatasi le toatolu o i latou i le lotu i vaiaso taitasi. Sa fiafia Judith e aoao e uiga ia Iesu i le Peraimeri.
Mulimuli ane sa latou taunuu i le pati. O le toatele o aiga i le paranesi ua i ai iina. O se masini e faaali ai ata o loo faaalia se vitio o le Kerisimasi i luga o le puipui o le falesa. Sa vaavaai atu Judith ia Iosefa o taitaia Maria e ui atu i Peteleema i luga o se asini. O auala pisi ma pefu na faamanatu atu ia te ia e peioseai o Mali!
Ina ua uma le vitio, sa oo atu se taavale la‘u pasese. Sa oso i fafo Sister Valerie, le peresitene o le Aualofa.
“Ua ou aumaia le meaai!” sa ia valaau mai ai.
Sa fesoasoani tagata uma e aumai ipu i le faapaologa. O se ‘aiga tele! Salati pateta, karoti, pi lanumeamata, araisa samasama malosi, moa falai … sa manaia uma lava!
“Faafetai tele lava, Sister Valerie!” Sa fai atu ai Judith.
Ona tofu lea o tamaiti laiti ma se polo, pepe meataalo, po o se taavale meataalo. Sa lei lava ni meaalofa mo Judith e maua ai se meaalofa, ae sa lei afaina ia te ia. Sa fiafia o ia e vaai atu i tamaiti laiti o ataata.
Sa faaiuina le pati i pesega. Sa ataata Judith ina ua latou usuina le “Ua Logo Pesega a Agelu mai Luga.”
Sa usuina faatasi e le paranesi atoa. Sa matuā matagofie tele. Na soifua moni mai Lava Iesu i na tausaga uma ua mavae! Sa matuai faafetai Judith ona o ia, Désiré, ma Eseta sa iloa e uiga ia te Ia. Ma sa fiafia tele o ia e faamanatu Lona soifua mai.
O Eseta, Judith, ma Désiré i luma o lo latou falelotu.
Ata na tusia e Steph Marshall