Auaunaga Mamoe, Mafanafana
E alala le tusitala i Oregon, ISA.
O le a se mea e mafai ona fai e Jay i le ie faaopoopo?
Sa tilotilo solo Alex i ie o le faleoloa. Sa tele tele ni lanu ma mamanu mananaia. Sa ia vaaia ni nai vaega e atoatoa lelei.
“Ei, Tina,” o le tala lea a Alex, ma faasino atu i se ie o loo i ai ni pili felanulanuai i luga. “E te fiafia i nei pili?”
“Ou te fiafia i lapiti aulelei, ma felefele,” o le tala lea a Tina.
Sa ata Alex. “Ua e iloa le uiga o la’u tala! Pe o le a lelei ea lenei ie mo sikafu?”
“Ou te manatu o le a fiafia i ai au uo.”
O le a fai e Alex ni sikafu mo ana uo. O le a ia faaaogaina le lolomiina o le polo soka mo Iosia, le lolomiina o le roketi-vaa mo Jose, ma le lolomiina o le gecko mo Mike.
E lei umi ae latou agai atu i le fale ma le ie. Ina ua latou tuua le pakaga taavale, sa vaaia e Alex se alii o uuina i luga se pepa malo e talosaga atu mo se fesoasoani. Sa ia iloa atonu e lei i ai se galuega a le tamaloa po o se fale. Ma sa matuai malulu lava o ia! Sa na o se peleue manifinifi sa i ai. Sa mafiafia le ofutele o le taumalulu o Alex, ae sa malulu pea lona savali i le aoga i taeao.
Ina ua latou taunuu i le fale, sa faaali atu e le tina o Alex ia te ia le auala e faataatia sa‘o ai ie ma fua ai le tele o lona manaomia e fai ai se sikafu se tasi. Sa ia tipiina ma le faaeteete le ie i lana selaulu. Ona ia tipiina lea o ni vavae i luga o pito e fai ai se koke. E lei umi, ae maua e Alex ni sikafu lanu sesega se ono. Sa i ai foi se faaputuga tele o ie faaopoopo.
“E mafai ona e mafaufau i se isi tagata e te manao e fai ni meaalofa?” O le fesili lea a Tina.
“E leai,” o le tala lea a Alex. Ona ia mafaufau lea i le tamaloa sa uuina se faailoga. Sa iai sona manatu.
O lena vaiaso mo le afiafi faaleaiga, na aoao ai e Alex lona aiga atoa i le auala e fai ai ni sikafu. Sa fuaina e lona tina i latou. Sa otioti e lona tama le ie. Sa faia e Alex ma lona tuafafine le koke felefele. Sa fiafia o ia e fai ni sikafu i le ie o le pili. Sa foliga mai na ataata atu le pili ia te ia a o ia galue.
“Oka,” o le tala lea a Alex ina ua uma. “Sa matou faia ni sikafu se 14 e faasoa atu!”
“O le a le tatou mea o fai i le taimi nei?” na fesili atu ai lona tuafafine.
“Ou te manatu e tatau ona matou tuuina i totonu o le taavale,” o le tala lea a Alex. “A tatou vaai la i se tasi e foliga malulu, e mafai ona tatou tuuina atu ia i latou se tasi.”
“O se manatu manaia tele lena!” na fai atu ai Tamā.
Sa ave e Tina se ato i fafo o le kapoti, ma sa latou faaputuina ia ia sikafu mafanafana i totonu. “Atonu e mafai ona tatou o i se taavale a le aiga i se taimi e vaavaai ai ni tagata e manaomia ni sikafu,” o lana tala lea.
“E mafai ona tatou o i le taimi lenei?” Sa fesili atu ai Alex.
Na tilotilo atu Tina i fafo o le faamalama. “Ou te le iloa. E pei e malulu ia fafo.”
“Pe le o le mafuaaga ea lena?”
Na ataata ona matua. “Ou te matea e sao oe,” o le tala lea a Tina. “Tau lava ia e mautinoa e fai lelei ofu mafanafana.”
Sa faia e Alex lona pelaue, ae sa tau le iloa atu le ea malulu. Sa ia iloa e mafai ona fesoasoani ana sikafu i se tasi, ma o lena mea na ia lagona ai le mafanafana i totonu.
Ata na tusia e Mark Robison