O Se Meaalofa o le Kerisimasi mo Iesu
Ua lata ona oo mai le Kerisimasi! Sa tau le mafai ona faatali Amy.
“O ia te oe le pusa mo Iesu?” Sa fesili atu ai Amy ia Tina. “Ua toeitiiti lava oo i le taimi o Lona aso fanau!”
“Ua ou fiafia na e manatuaina,” o le tala lea a Tina.
Sa tuu e Tina se pusa lanumumu i luga o le laulau. Sa iila lava. Sa i ai i le pito i luga se lipine mumu. O tausaga taitasi mo le Kerisimasi, sa tusi ai e Amy ma lona aiga i lalo ni mea agalelei sa latou faia. Latou te tuuina i totonu o le pusa.
“Tatou te mulimuli ia Iesu pe a tatou fesoasoani atu i isi,” o le tala lea a Tina. “O la tatou meaalofa lea ia Iesu.”
Sa manao Amy e faatumu le pusa atoa i meaalofa mo Iesu! Sa mafaufau o ia i mea agalelei e mafai ona ia faia.
I le taumafataga o le afiafi, sa fesili atu ai Tama, “E i ai se meaalofa mo Iesu e tusi i lalo?”
“O a’u!” o le tala lea a Emi. “Sa ou fesoasoani e tuu ese ia seevae o Ari.”
“Sa agalelei tele lena mea,” o le tala lea a Tama. Sa ia tusia i luga o se fasipepa. Sa tuu e Amy le pepa i totonu o le pusa.
O aso taitasi, sa taumafai ai Amy e fai ni mea lelei. Sa manao o ia e mulimuli ia Iesu.
Sa fesoasoani o ia ia Tama e faatau meaai i le faleoloa.
Sa ia tautau i luga lona pelaue.
Sa ia fesoasoani ia Tina e fufulu ipu.
Sa lei tau o ia ma lona tuagane.
O aso uma lava, e tuu ai e Emi se mea agalelei i totonu o le pusa iila. E lei umi ae tumu le pusa i mea agalelei!
Mulimuli ane o le Aso Kerisimasi. Sa amata ona tatala e Amy ni nai meaalofa. Sa ia tatalaina foi le meaalofa mo Iesu! Sa feauauai Tina ma Tama e faitau mea agalelei uma i totonu o le pusa.
Sa iai lagona lelei o Amy i totonu. O le fesoasoani i isi e faafiafia ai o ia. Sa ia iloaina na faafiafiaina ai foi Iesu!
Ata na tusia e Christine Grove