Ko hono Fua a Sipotí
ʻOku nofo ʻa e tokotaha naʻá ne faʻu e talanoá ʻi Utah, USA.
ʻOku pehē ʻa e founga hono tokoniʻi kitautolu ʻe Sīsuú.
“ʻE tuku kiate koe ʻe he ʻEikí ha mālōlō, mei ho mamahí, pea mei hoʻo manavaheé” (2 Nīfai 24:3).
Naʻe makiʻikiʻi ʻa ʻEpi. Naʻe puna takai ha fanga kiʻi kuli fiefia mo futefute ʻi hono tafaʻakí. Ko e fē ʻoku totonu ke ne filí?
Naʻe lele mai kiate ia ha kiʻi kulī ʻuliʻuli ʻoku toti hinehina hono fatafatá. Naʻá ne tāvilivili hono hikú pea ʻemo hono nimá. Pea naʻe ʻilo ʻe ʻEpi. Ko ia ia! Naʻá ne fua hake ia.
“Teti, ko ʻeni!” Naʻe fāʻofua ʻa ʻEpi ki he kiʻi kulī māfana mo longomoʻuí. “Tau ui ia ko Sipoti.”
ʻI heʻena aʻu ki ʻapí, naʻe fiefia e tuongaʻane mo e tokoua ʻo ʻEpí ke feʻiloaki mo Sipoti. Naʻe tāvilivili ʻe Sipoti hono hikú peá ne teka hake ke vakuvaku hono keté. ʻI he taimi naʻe tuku hifo ai ʻe Teti e poulu ʻa e kulií, naʻe tūʻulu hifo ʻa Sipoti ki he meʻakaí!
Naʻe lue leva ʻa Teti mo ʻEpi ʻo ʻave ʻa Sipoti ke ʻeveʻeva. Naʻe ʻoange ʻe Teti e maeá kia ʻEpi.
Naʻe pehē ange ʻe Teti, “Puke ke maʻu. ʻE lava pē ke ilifia ʻa Sipoti pea feinga ke hola. ʻOku fie maʻu ke ke fakapapauʻi ʻokú ne ongoʻi malu.”
“ʻIo, Teti.” Naʻe punopuna ʻa ʻEpi. Naʻe ʻikai ke ne faʻa tatali!
Naʻa nau lue atu he halá. Naʻe luelue ʻa ʻEpi mo Teti. Ne punopuna ʻa Sipoti. Naʻá ne fakananamu e vaó. Naʻe kālou ki ha fanga sikuila. ʻI he ngaahi miniti siʻi kotoa pē, naʻá ne sio ki mui kia ʻEpi mo Teti.
Naʻe ʻikai fuoloa kuo nau aʻu atu ki ha ʻapi ʻoku ʻi ai ha kulī lalahi ʻe tolu. Naʻe ngungulu mo kālou mai e fanga kulií mei he loto ʻaá.
Naʻe tuʻu maʻu ʻa Sipoti. Naʻe feinga ʻa ʻEpi ke fusi mai ia, ka naʻe ʻikai pē ke ngaue ia.
Naʻá ne lea leʻosiʻi ange, “Sai pē ia. He ʻikai ke nau lava ʻo maʻu koe. ʻOkú ke malu koe.”
Naʻe ngīngī leʻosiʻi pē ʻa Sipoti.
Naʻe talaange ʻe Teti, “Mahalo ʻoku totonu ke ke fua ia.” Naʻe fua hake ʻe ʻEpi ʻa Sipoti pea lue ki he kauhala ʻe tahá. Naʻá ne tetetete. ʻI he ʻikai ke nau toe lava ʻo sio ki he fanga kulií, naʻe nonga ʻa Sipoti. Naʻá ne ʻemo e fofonga ʻo ʻEpí, peá ne tuku hifo ia.
Hili ha ngaahi miniti siʻi mei ai, naʻe kamata ke māmālie hifo ʻa Sipoti. Naʻe punou hono ʻulú. Naʻá ne tokoto he laʻisimá.
Naʻe pehē ange ʻe ʻEpi, “Haʻu foki. ʻOku tau mei aʻu ki ʻapi.”
Naʻe pete ʻa Sipoti kia ʻEpi. Naʻe māpuhoi ai.
“ʻIau. Fuʻu helaʻia, siana?” Naʻe kata ʻa ʻEpi. Naʻá ne toe fua hake ia. Ko e taimí ni naʻá ne fua ia he halá ʻo aʻu ki ʻapi. Naʻe fie tokoni ʻa Teti, ka naʻe ʻikai ke fuʻu mamafa ʻa Sipoti. Pea naʻe ʻofa ʻa ʻEpi ai mo loto ke tokangaʻi ia.
ʻI he Sāpate ko iá, naʻe talanoa e faiako Palaimeli ʻa ʻEpí fekauʻaki mo Sīsū Kalaisi.
Naʻe pehē ʻe Sisitā ʻŌliva, “ʻOku ʻofa lahi ʻa Sīsū ʻiate kitautolu ko ia naʻá Ne mamahi ai maʻatautolu. Naʻá Ne ongoʻi ʻetau ngaahi mamahí kotoa koeʻuhí ke mahino kiate Ia ʻa e ongo ʻoku tau maʻú. ʻI he founga ko iá, te Ne lava ai ʻo tokoniʻi kitautolu ʻi hotau ngaahi faingataʻaʻiá.”
Naʻe fakakaukau ʻa ʻEpi ki he founga ʻo ʻene fua ʻa Sipotí. Naʻe fakakaukau ʻa ʻEpi, ko e founga ia ʻoku tokoniʻi ai kitautolu ʻe Sīsuú. Mahalo he ʻikai ke fua moʻoni ia ʻe Sīsū, ka naʻá Ne tokoni ke ne ongoʻi mālohi ange ʻi he taimi naʻá ne fie maʻu ai Iá. Hangē ko e pō ʻe tahá, ʻi heʻene ilifia he fakapoʻulí. Naʻá ne lotu peá ne ongoʻi malu. Pe ko e taimi naʻá ne hohaʻa ai naʻa ngalo ʻene ngāue fakaako mei ʻapí. Naʻá ne lotu leva pea ongoʻi fiemālie ange—pea naʻá ne manatuʻi ia!
Naʻe malimali ʻa ʻEpi. Naʻá ne ʻiloʻi naʻe ʻofa ʻa Sīsū Kalaisi ʻiate ia ʻo lahi ange ʻi heʻene ʻofa ʻia Sipotí. Pea naʻe lahi fau ia!
Ngaahi tā fakatātā ʻa Alexandra Ball