Ko e Kau Paionia ʻi he Fonua Kotoa Pē
ʻOlokā Pingi
Taki ʻo e Palaimeli ʻi Palāsilá
ʻOku nofo ʻa e taha naʻá ne faʻú ʻi Kalefōnia, USA.
Naʻe fakaafeʻi kotoa kinautolu ʻe ʻOlokā.
Naʻe loto-mamahi ʻa ʻOlokā mo pehē, “ʻOku ou ʻofa ki he tokotaha kotoa pē ʻi homau koló.” Ko ia pē mo hono fāmilí naʻe toe ʻi he Lautohi Faka-Sāpaté.
Naʻe tāpuni ʻe Uilemā, ko e taʻokete ʻo ʻOlokaá, ʻa ʻene folofolá. “ʻOku ou ʻofa foki mo au kiate kinautolu.” Naʻe kamo pē ʻa Mami mo Kulenimā.
Naʻe fie tangi ʻa ʻOlokā. ʻI he taimi naʻe papitaiso ai iá, naʻe omi ha kakai ʻe toko 60 ki he lotú ʻi he uike kotoa pē! Ka naʻe kamata ʻa e Tau Lahi Hono II ʻa Māmaní. Naʻe pau ke foki kotoa e kau faifekau ʻi Palāsilá ki ʻapi, koeʻuhí ko e taú. Ka ne ʻikai kinautolu, naʻe ʻikai ke tokolahi feʻunga e kau maʻu lakanga fakataulaʻeikí ke fakahoko e ngaahi fakataha angamaheni ʻa e Siasí. Naʻe ʻikai ke nau lava ʻo tāpuakiʻi ʻa e sākalamēnití pe papitaiso ʻa e kakaí.
Naʻe taʻofi ʻe he koló hono nō e fale lotú. Ka naʻe fakataha ʻa e kāingalotu ʻo e Siasí ʻi he ʻapi ʻo e kakaí ke ako e ngaahi folofolá. Pea naʻe kamata ke nau ʻalu tahataha ki he ngaahi siasi kehé.
ʻI he ʻosi ʻa e taú, naʻe fakakaukau ʻa ʻOlokā ʻe toe fakahoko e ngaahi fakatahaʻanga houalotu ʻa e koló. Ka naʻe ʻikai tokolahi feʻunga ʻa e kakaí. Ko ia naʻe fakataha pē ʻa ʻOlokā mo hono fāmilí ʻi he Sāpaté.
Naʻe pehē ʻe ʻOlokā, “ʻOku ou manatu ʻofa ki he hiva mo e tokotaha kotoá. Pea ʻoku ou ʻofa ki he fānau naʻa nau faʻa omi ki he lotú.”
Naʻe pehē ange ʻe Kulenimā, “Mo au pē.”
ʻI he ngaahi ʻaho siʻi hono hokó, naʻe fakakaukau lahi ʻa ʻOlokā ki he meʻa ke faí. Naʻá ne lotua ha tokoni. “Tamai Hēvani, kātaki muʻa ʻo tokoni mai ke mau ʻiloʻi e founga ke toe fakamālohia ai homau koló.”
Naʻe maʻu ʻe ʻOlokā ha foʻi fakakaukau ʻi ha ʻaho ʻe taha. Naʻá ne hū ki tuʻa. Naʻe vaʻinga ha ongo tamaiki fefine ʻi ha lalo ʻakau.
“Olá!” Ko ʻOlokā atu ia. “Te mo fie haʻu ki he kalasi ʻi homau siasí maʻá e fānaú he pooni? Te tau ako fekauʻaki mo Sīsū, hivaʻi ha ngaahi hiva, mo fiefia.”
Naʻe fesiofaki e ongo tamaiki fefiné. Naʻe pehē ange ʻe he toko taha, “ʻIo.”
“Sai! Kapau ʻe talaatu ʻe homo ongomātuʻá te mo lava ʻo haʻu, pea tau fetaulaki mai ki heni ʻanai. Te tau lue fakataha ki he kalasí.”
Naʻe taʻataʻalo atu ʻa ʻOlokā peá ne lue he halá. Naʻá ne maʻu ha fānau tokolahi ange naʻa nau vaʻinga futebol (soka). Naʻe fakaafeʻi kotoa kinautolu ʻe ʻOlokā.
Ne omi ha niʻihi ʻo e fānaú ʻo lotu kimuʻa. Naʻa nau fiefia ke nau toe haʻu! Naʻe ʻikai fie haʻu ha tamaiki kehe. Ka naʻe ʻai ʻe ʻOlokā ke nau ʻiloʻi naʻe talitali lelei kotoa kinautolu.
Kimui ange ʻi he pō ko iá, naʻe tānaki fakataha mai ʻe ʻOlokā ʻa e fānau naʻa nau pehē te nau ōmaí, fakataha mo ʻenau mātuʻá. Naʻa nau lue fakataha kotoa ki hono falé.
Naʻe akoʻi ʻe Mami mo Kulenimā ʻa e mātuʻá ʻi ha loki pē ʻe taha. Naʻe akoʻi ʻe ʻOlokā mo Uilemā ʻa e fānaú ʻi he loki ʻe taha. Naʻe hivaʻi ʻe ʻOlokā ha ngaahi hiva mo kinautolu. Naʻe fakahoko ʻe Uilemā ha ngaahi talanoa mei he folofolá.
Naʻe ongoʻi fiefia ʻa ʻOlokā ʻi heʻene lue mo e fānaú ki ʻapí. Naʻá ne pehē ange, “Fakamālō atu homou lava maí. Tau toki sio he uike kahaʻú!”
Naʻe tokosiʻi honau kiʻi koló, ka naʻe ʻiloʻi ʻe ʻOlokā ʻe toe tokolahi pē ia. Pea naʻá ne fie palani leva ʻa e lēsoni ki he uike kahaʻú he taimi pē ko iá!
Ko Palāsila ʻa e fonua lahi taha ʻi ʻAmelika Sauté.
Naʻe pulusi e Tohi ʻa Molomoná ʻi he lea faka-Potukalí lolotonga e Tau Lahi Hono II ʻa Māmaní.
ʻOku ʻi ai ha temipale ʻe fitu ʻi Palāsila, mo ha temipale kehe ʻe ua ʻoku kei langa.
Naʻe papitaiso ʻa ʻOlokā ʻi he Anovai Kuaipá.
Naʻá ne hoko kimui ko ha palesiteni Palaimeli.
Naʻe mali ʻa ʻOlokā pea ʻi ai ʻene fānau ʻe toko nima.
Ngaahi tā fakatātā ʻa Tatsiana Burgaud