Ko e Keke Kilisimasí
Naʻe hoko ʻa e talanoa ko ʻení ʻi Siapani.
Naʻe saiʻia ʻa Kaia he ngaahi meʻa lelei ʻi he Kilisimasí. Ka naʻá ne ʻofa lahi ange ʻi hono kaungāmeʻá.
Ko e Kilisimasí ʻapongipongi, pea naʻe hohaʻa ʻa Kaia. Naʻe ʻikai hohaʻa ia pe te ne maʻu ha meʻaʻofa pe ko e hā e meʻaʻofa ko iá. Naʻá ne hohaʻa ki hono kaungāmeʻa ko Miniató.
Naʻe vaʻinga ʻa Kaia mo Miniato ʻi he kalapu soka tatau pē. Pea naʻá na ako ʻi he ʻapiako tatau. Ka naʻe ʻikai haʻu ʻa Miniato ki he akó he ʻaho ʻe tolu. Naʻá ne liʻaki foki e ako vaʻinga soká. Naʻe pehē ʻe he faiakó naʻe puke e tamai ʻa Miniató. Naʻe pau ke nofo kotoa e fāmili ʻo Miniató ʻi ʻapi ʻi ha uike ʻe ua, ke fakapapauʻi he ʻikai puke e niʻihi kehé.
Naʻe hohaʻa ʻa Kaia naʻa puke foki mo Miniato. Naʻá ne kole ange kia Mama pe te na lava ʻo ʻaʻahi ki ai. Naʻá na fetuʻutaki telefoni ki he faʻē ʻa Miniató.
Naʻá ne talaange “ʻOua te mou hohaʻa. ʻOku mau sai pē. Ka kuo teʻeki ke lava ʻo maʻu ʻemau kurisumasu kēki (keke Kilisimasí).”
Ko e keke Kilisimasí naʻe saiʻia taha ai ʻa Kaiá. Naʻe fakaʻofoʻofa e kilimi hinehiná mo e ngaahi teuteu fakalanulanú. Ko ha kiʻi fakaneifua makehe ia ʻi Siapani. Naʻá ne fakakaukau ʻoku pau pē ne ongoʻi loto-mamahi ʻa Miniato ke hala ai.
Hili e telefoní, naʻe pehē ʻe Kaia, “Mama, ta ō ʻo ʻave ʻetau foʻi keke Kilisimasí maʻanautolu. Pea ʻe lava foki ke ta ʻave mo ha pisa kia kinautolu?” Naʻá ne ʻiloʻi ko e pisa saba (ika) naʻe saiʻia taha ai ʻa Miniató.
Naʻe loto ki ai ʻa Mama. Naʻá na ʻuluaki tā ʻo ʻota e pisá. Naʻe faʻo leva ʻe Mama ʻa e foʻi keke Kilisimasí ʻi ha puha. Naʻá na tānaki leva ha fanga kiʻi meʻakai mo e inu melie.
Naʻe pehē ʻe mama, “ʻE tokoni ʻeni ke nau moʻui ai he ngaahi ʻaho ka hoko maí.”
Naʻe ʻalu ʻa Papa mo Kaia ʻo ʻomai e pisá. Naʻá na ʻalu leva ki he ʻapi ʻo Miniató ke ʻave ki ai e meʻa kotoa. Naʻe ʻikai ke na lava ʻo hū ki loto, ko ia naʻá na tuku kotoa ia ʻi he matapaá, lomiʻi e fafangú, peá na mavahe.
ʻI he aʻu ʻa Kaia ki ʻapí, naʻe fakaʻaliʻali ange ʻe Mama ha pōpoaki telefoni mei he faʻē ʻa Miniató. Naʻe pehē, “ʻOku ʻikai ke u tui naʻá ke haʻu mo ha foʻi keke! ʻOku fiefia ʻaupito ʻa e fānaú. Mālō ʻaupito.”
Hili ha ngaahi miniti siʻi mei ai, kuo tatangi e fafangu he matapaá. Ko Misa mo Sisitā Takahasi ia. Ko ha mēmipa kinaua ʻo e Siasí naʻá na nofo ofi mai.
Naʻe pehē ʻe Sisitā Takahasi, “Ko homou higashi (kūkisi laise) ʻeni ki he Kilisimasí.” Naʻá ne toʻo hake ha peleti kūkisi kuo teuteuʻi fakaʻofoʻofa.
Hili e maʻu meʻatokoni efiafí, naʻe kai ʻe Kaia mo ʻene ongomātuʻá e kūkisí. “ʻOkú ke loto-mamahi he ʻikai ke ʻi ai haʻatau foʻi keke Kilisimasí?” Ko e fehuʻi ange ia ʻa e fineʻeikí.
Naʻe fakakaukau ʻa Kaia ki heʻene tokoniʻi ʻa Miniato mo hono fāmilí. Naʻá ne talaange, “ʻIkai. ʻI he hili ʻa e meʻa kotoa, ko e Kilisimasí ʻoku fekauʻaki ia mo e foakí!”
Ngaahi tā fakatātā ʻa Felia Hanakata