Mei he Kau Palesitenisī ʻUluakí
Ko e ʻUluaki Meʻaʻofa Faka-Kilisimasí
Naʻe toʻo mei he “Ko e Ongoongolelei ʻo e Melinó,” fakataha lotu Faka-Kilisimasi ʻa e Kau Palesitenisī ʻUluakí, 8 Tīsema 2019, broadcasts.ChurchofJesusChrist.org.
ʻI ha Kilisimasi ʻe taha, naʻe loto-mamahi ha kiʻi taʻahine taʻu 11 koeʻuhí naʻe ʻikai ke ne maʻu ha tamapua foʻou naʻá ne fakaʻamua fuoloa. Naʻá ne fifili pe kuó ne fuʻu motuʻa ki he Kilisimasí. Naʻe pehē ʻe heʻene tamaí, “ʻOku ʻikai ke ke fuʻu motuʻa ki he Kilisimasí. Ka ʻokú ke lahi feʻunga ke mahino ange ia kiate koe.”
Naʻá ne fakamatala lahi ange. Naʻá ne pehē, “Kuó ke fanongo ʻoku tau foaki e ngaahi meʻaʻofa ʻi he Kilisimasí koeʻuhí naʻe ʻomi ʻe he kau tauhisipí mo e Kau Tangata Potó ha ngaahi meʻaʻofa ki he tamasiʻi ko Kalaisí.” Naʻá ne talaange leva fekauʻaki mo e ʻuluaki meʻaʻofa Kilisimasí. Ko e taimi ia naʻe foaki mai ai ʻe he Tamai Hēvaní Hono ʻAlo ko Sīsū Kalaisí, ke hoko ko hotau Fakamoʻuí. Naʻe ʻafioʻi ʻe he Tamai Hēvaní ʻe mamahi Hono ʻAló ʻi he māmaní, ka naʻá Ne kei foaki mai pē ʻa Sīsū ki he māmaní. Pea naʻe foaki loto-fiemālie ʻe Sīsū Ia koeʻuhí ke tau lava ʻo maʻu ʻa e moʻui taʻengatá.
Naʻe ʻikai mohe e taʻahiné he pō ko iá mo ha tamapua Kilisimasi ʻi hono piló. Ka naʻá ne maʻu ha ongoʻi nonga foʻou ʻi hono lotó. Naʻá ne maʻu ha meʻaʻofa naʻe ʻikai lava ke motuʻa pe mole. Ko e meʻaʻofa maʻongoʻonga ia ʻo e ʻofa ʻa e Tamai Hēvaní.
“He naʻe ʻofa pehē ʻa e ʻOtuá ki māmani naʻá ne foaki hono ʻAlo tofu pē ʻe taha naʻe fakatupú.” Sione 3:16
Ngaahi tā fakatātā ʻa J. Beth Jepson