Kilisimasi ʻi Malí
ʻOku nofo ʻa e tokotaha naʻá ne faʻú ʻi Tekisisi, USA.
Naʻe ʻikai faʻa tatali ʻa Siutiti ke fakafiefiaʻi mo hono koló e ʻaloʻi ʻo Sīsuú.
“Fanongoa kau ʻāngelo, he toafa honau leʻo” (Ngaahi Himí, fika 112).
Ne hoko ʻa e ʻAho Kilisimasí. Naʻe ngūngū pē ʻa Siutiti ʻi heʻene lue ki he fale lotú. Naʻá ne ʻalu mo hono tokouá mo e tuongaʻané ki he paati Kilisimasi ʻa honau koló.
Naʻe malimali hono tokoua ko ʻĒsetá. “Ko e ʻFanongoa Kau ʻĀngelóʻ ena?
“Ko ia! Ko hoku manakó ia. ʻOfa pē te tau hivaʻi ia he ʻahó ni.” Naʻe malimali ʻa Sutiti.
“ʻOku ou saiʻia he foʻi hiva ko iá!” Naʻe tānaki atu ki ai hono tuongaʻane ko Tesileí. Naʻá ne hiva leʻolahi, “Kolo-o-o-o-o-lia!”
Naʻa nau kakata kotoa. Naʻe ʻikai faʻa tatali ʻa Siutiti ke fakafiefiaʻi mo honau koló. Naʻe ʻikai fakamanatua e Kilisimasí ʻe ha kakai tokolahi ʻi Mali. ʻI he konga ko ʻeni ʻo ʻAfiliká, ko e tokolahi taha ʻo e kakaí naʻe ʻikai ke nau ʻilo lahi fekauʻaki mo Sīsū. Naʻe hoko ʻa e Kilisimasí kiate kinautolu ko ha ʻaho angamaheni pē.
Naʻe fonu ʻa e ngaahi halá ʻi he kakaí. Naʻe fakatau atu ʻe he kau tuʻuaki koloá ha fanga foʻi meleni lanu mata. Naʻe hilifaki ʻe he kakai kei talavou mo motuʻá ha ngaahi sioki vai ʻi honau ʻulú. Naʻe taki ʻe ha kiʻi tamasiʻi ha ʻasi naʻá ne toho ha saliote. Naʻe sio hake ʻa Sutiti ki he taua māʻolunga mo fāsiʻi ʻo ha fale lotu. Ko ha fale fakaʻofoʻofa ia naʻe lotu ai ha tokolahi ʻo honau ngaahi kaungāʻapi Mosilemí.
Naʻe faʻa ʻalu ʻa Siutiti, ʻĒseta, mo Tesilei ki he siasi ʻo Papá. Ka ʻi he faʻahitaʻu māfana kuo ʻosí, ne nau kau ai ki he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní. Ne nau lue fakataha he taimí ni ʻa e toko tolú ki he lotú ʻi he uike kotoa pē. Naʻe saiʻia ʻa Sutiti ʻi he ako fekauʻaki mo Sīsū ʻi he Palaimelí.
Ne faifai pea nau aʻu ki he pātí. Ne ʻosi ʻi ai e tokolahi taha ʻo e ngaahi fāmili ʻi honau koló. Naʻe huluʻi ʻe ha mīsini fakaʻata lahi ha ngaahi vitiō Kilisimasi ʻi he holisi ʻo e fale lotú. Naʻe mamata ʻa Siutiti ki hono taki ʻe Siosefa ʻa Mele ʻo aʻu ki Pētelihema ʻi ha ʻasi. Naʻe fakamanatu ange ʻe he ngaahi hala femoʻuekina mo efuá ʻa Mali!
ʻI he ʻosi ʻa e vitioó, naʻe afe mai ha tekisī. Naʻe hifo mai ʻa Sisitā Vāleli, ko e palesiteni Fineʻofá ki tuʻa.
Naʻá ne ui mai, “Ko e meʻakaí ʻeni!”
Naʻe tokoni ʻa e tokotaha kotoa pē ke ʻomi e ngaahi laulau meʻakaí ki he fakafaletoló. Naʻe fai ha kai pola! Salati pateta, kāloti, piini lanu mata, laise engeenga, moa fakapaku … naʻe ifo kotoa ia!
“Mālō ʻaupito, Sisitā Valelī.” Ko Siutiti ange ia.
Naʻe taki taha leva e fānau iiki tahá he foʻi pulu, kiʻi tamapua, pe kā meʻavaʻinga. Naʻe ʻikai ke lahi feʻunga e meʻaʻofá ke ʻi ai ha meʻaʻofa ʻa Siutiti, ka naʻe ʻikai ke ne hohaʻa ki ai. Naʻá ne saiʻia he sio ki he malimali ʻa e longaʻi fānaú.
Naʻe fakaʻosi ʻaki e pātí ʻenau hiva. Naʻe malimali ʻa Siutiti ʻi heʻenau hivaʻi ʻa e “Fanongoa Kau ʻĀngeló.”
Naʻe hiva fakataha ʻa e koló. Naʻe fakaʻofoʻofa ʻaupito. Naʻe ʻaloʻi moʻoni ʻa Sīsū ʻi he ngaahi taʻu lahi ko ia kuohilí! Naʻe houngaʻia ʻaupito ʻa Siutiti ʻi heʻene ʻiloʻi, mo Tesilei mo ʻĒseta fekauʻaki mo Iá. Pea naʻá ne mātuʻaki fiefia ke fakamanatua Hono ʻaloʻí.
Ko ʻĒseta, Siutiti, mo Tesilei ʻi muʻa ʻi honau fale lotú.
Ngaahi tā fakatātā ʻa Steph Marshall