Haʻu, ʻo Muimui ʻIate Au

Taimi Fiefia ʻi he Folofolá

ʻOku fakatatau ʻa e ngaahi fakakaukau ko ʻení ki he Haʻu, ʻo Muimui ʻIate Au—ma‘á e Fakafoʻituituí mo e Ngaahi Fāmilí ʻi he uike kotoa pē.

Ko Hotau ʻApi Fakalangí

drawing of family holding hands

Ki he Tokāteline mo e Ngaahi Fuakava 137–138

• Hivaʻi ʻa e “Naʻe Toetuʻu Nai ʻa Sīsū?” (Tohi Hiva ʻa e Fānaú, 45).

• ʻI he kei siʻi ʻa Siosefa Sāmitá, naʻe mālōlō hono tokoua ko ʻAlaviní. Naʻe maʻu ʻe Siosefa kimui ange ha mata meʻa-hā-mai ʻe ʻalu ʻa ʻAlavini ki he puleʻanga fakasilesitialé. Koeʻuhí naʻe pekia pea toetuʻu ʻa Sīsū Kalaisi, te tau lava ʻo toe nofo mo hotau ngaahi fāmilí hili ʻetau mate pea toetuʻú.

• Lau ʻa e Tokāteline mo e Ngaahi Fuakava 137:1–5. ʻOkú ke pehē ʻe fēfē ʻa e puleʻanga fakasilesitialé? Taufetongi ʻi hono lea ʻaki ha ngaahi foʻi lea ke fakamatalaʻi ia. Hili iá pea tā ha fakatātā ʻo ho fāmilí mo e Tamai Hēvaní mo Sīsū.

Fuʻu ʻAkau “ʻOku Mau Tuí”

Christmas ornaments

Ki he Ngaahi Tefito ʻo e Tui mo e Fanongonongo Fakamafaiʻi 1 mo e 2

• Hivaʻi ʻa e “Naʻá Ne Fekau Hono ʻAló” (Tohi Hiva ʻa e Fānaú, 20–21).

• ʻOku akoʻi ʻe he Ngaahi Tefito ʻo e Tuí ʻa e meʻa ʻoku tau tui ki aí. Naʻe tohi ʻe Siosefa Sāmita e Ngaahi Tefito ʻo e Tuí ke fakamatalaʻi ʻaki e ongoongoleleí ki he niʻihi kehé.

• Lau e “ʻUhinga ʻOku ou Saiʻia ai ʻi he Ngaahi Tefito ʻo e Tuí” ʻi he peesi 26. Kosi ʻo toʻo ha foʻi siakale ʻe 13 ke ngaohi ʻaki ha ngaahi meʻa teuteu pepa. Fakafika e ngaahi siakalé mei he 1 ki he 13. Tā leva ha meʻa ʻi he tafaʻaki ʻe tahá ʻokú ne fakamanatu atu ʻa e tefito ʻo e tui ko iá. Te ke lava ʻo tautau ia ʻi homou fuʻu ʻakau Kilisimasí pe ʻi ha feituʻu kehe ʻi homou falé. ʻI hoʻo tautau e meʻa teuteu takitaha, lau mo e tefito ʻo e tui ʻoku kaunga ki aí.

Tolo Houngaʻia Fakafāmilí

family tossing a ball to each other

Ki he “Ko e Fāmilí: Ko ha Fanongonongo ki Māmani”

• Hivaʻi e “Te u Muimui he Palani ʻa e ʻOtuá” (Tohi Hiva ʻa e Fānaú, 86–87).

• Ko e fāmilí ko e konga mahuʻinga ia ʻo e palani ʻa e ʻOtuá. ʻOku pehē ʻi he “Ko e Fāmilí: Ko ha Fanongonongo ki Māmani, ko e fiefia ko ia ʻi he moʻui fakafāmilí ʻoku meimei ke toki aʻusia pē ia ʻi he taimi kuo langa ai ʻa e fāmilí ʻi he ngaahi akonaki ʻa e ʻEiki ko Sīsū Kalaisí.” Te tau lava ʻo ʻai ke fiefia ange hotau ngaahi fāmilí ʻi heʻetau muimui kia Sīsuú.

• Fakahoko leva ha kiʻi vaʻinga! Tangutu takatakai. Lī ha foʻi pulu pe laʻipepa kuo nusinusiʻi ke hapohapo e tokotaha kotoa. ʻI hoʻo lī ki ha taha ʻa e foʻi pulú, talaange ha founga ʻe taha kuó ke sio ai ʻoku nau muimui ʻia Sīsū ke tokoniʻi ha taha ʻi homou fāmilí ke ne ongoʻi fiefiá.

Ko e ʻAloʻí ʻi ha Fāmili

cut-out Nativity scene

Ki he Kilisimasí

• Hivaʻi ʻa e “Kau, ʻĀngelo Ne Hiva” (Ngaahi Himí, fika 118).

• ʻOku akoʻi mai kiate kitautolu ʻe he “Ko e Kalaisi Moʻuí: Ko e Fakamoʻoni ʻa e Kau ʻAposetoló” ko Sīsū Kalaisi ʻa e “maama, mo e moʻui, pea mo e ʻamanaki leleiʻanga ʻo e māmaní.” ʻOku tau fakamanatua ʻa e Kilisimasí ke manatuʻi ʻa Sīsū Kalaisi.

• Fakaʻaongaʻi e ʻekitivitī he peesi 24 ke fakahoko e talanoa ʻo e ʻAloʻí. Taufetongi ʻi hono tānaki atu ha ngaahi fakatātā ki he ʻAloʻí lolotonga hoʻo fakahoko e talanoá.

Ngaahi tā fakatātā ʻa Katy Dockrill