Vaʻinga

Ngaahi Meʻa Fakameaʻa faka-Kilisimasi ʻi he funga ʻo e Māmaní

Fakahoko ʻe Chelsea Flake Mortensen

Ko e ngaahi meʻa fakameaʻa kotoa ko ʻení mei ha fonua kehekehe. Te ke lava nai ʻo ngaohi ha meʻa teuteu ʻo fakatefito ʻi he ngaahi tukufakaholo faka-Kilisimasi homou fāmilí?

Pale ki he ʻAho ʻo Seni Lūsiá

ʻI Suēteni, ko e ʻAho ʻo Seni Lūsiá ʻoku hoko ia ʻi he konga kimuʻa ʻo Tīsemá. ʻOku tui ʻe he tamaiki fefiné ha kofu hinehina mo ha ngaahi kalauni tapu mo ha ʻū teʻelango. ʻOku fakafofongaʻi ʻe he teʻelangó ʻa e maama ʻa Sīsū Kalaisí.

Kosi e ngaahi laʻiʻakau mei he laʻipepá pea valivali lanu mata kinautolu. Fakapipiki pe tepiʻi fakataha kinautolu ke ngaohi ʻaki ha pale fuopotopoto.
Ngaohi ha teʻelango mei he pepá pea tānaki ia ki he palé.

Ngaahi Fetuʻu Ngingilá

ʻI he ʻOtu Filipainí, ʻoku kamata hono fakafiefiaʻi ʻe he kakaí ʻa e Kilisimasí ʻi Sepitema! ʻOku ngaohi ʻe he kakai tokolahi ha ngaahi maama fetuʻu ʻoku ui ko e parols.

Fokotuʻutuʻu ha vaʻakau ʻe nima ʻi ha fuo ʻo ha fetuʻu. Haʻi fakataha ia ʻi he feituʻu ʻoku fehulunaki aí.
Fakapipiki ha pepa manifi ʻi he foʻi fetuʻú.
Teuteuʻi hoʻo fetuʻú. Fakapipiki ha foʻi afo ki he tumuʻaki ʻo e fetuʻú ke tautau ʻaki ki ʻolunga.

Fana ʻOne ʻi Palāsilá

ʻOku fakamanatua ʻe he kakai ʻi Palāsilá ʻa e Kilisimasí ʻaki ʻenau fiefia ʻi he matātahí mo mamata ʻi he ngaahi fana ʻoné.

Kosikosi ha ongo laʻipepa lōloa lanu kehe ʻe ua, meimei ʻinisi ʻe 2–3 (senitimita ʻe 5–8) hono fālahí. Kosikosi fakaaveave e tafaʻaki ʻe taha ʻo e laʻipepa takitaha. ʻOua ʻe kosi ke motú!
Fokotuʻutuʻu fakataha e ngaahi laʻipepá pea takaiʻi ia ʻi ha vaʻakau lōloa. Tepiʻi pe fakapipiki ʻa e konga ki lalo ʻo e laʻipepá ki he vaʻakaú.
Fakamavahevaheʻi e aveavé ke hangē ha fana ha ʻoné! Fakaʻaliʻali hoʻo ngaahi teuteu fana ʻoné ʻi ha vaasi pe ipu.

Mā Pakupaku Kilisimasí

ʻOku saiʻia e fānau ʻi ʻIngilaní ke maʻu ha fanga kiʻi kofukofu ʻoku ui ko e mā pakupaku Kilisimasí. ʻOku fusi ʻe ha taha ʻa e ongo tulikí ke kumi e fanga kiʻi meʻa leleí mo e fanga kiʻi meʻaʻofa ʻi lotó!

Kofu takai ha laʻipepa manifi ʻi ha foʻi tiupi pepa fefeka pe pepa matolu. ʻOku totonu ke lōloa ange ʻa e laʻipepá ʻi he foʻi tiupí.
Fakafonu ʻa e foʻi tiupí ʻaki ʻa e meʻa ngingila mo e lole pe ko ha kiʻi meʻaʻofa kehe.
Mioʻi ʻa e laʻipepá ʻi he ongo tulikí.
Nonoʻo e ongo tulikí fakatouʻosi ʻaki ha loufau pe afo.