Ko Ha Meʻaʻofa maʻa Sīsū
Naʻe vave e hoko mai ʻa e Kilisimasí! Ne ʻikai ke faʻa tatali ʻa ʻEimi.
“ʻOkú ke maʻu e puha maʻa Sīsuú?” Ko e fehuʻi ange ia ʻa ʻEimi kia Mamí. “Kuo mei hokosia Hono ʻaho ʻaloʻí!”
Naʻe pehē ange ʻe Mami, “ʻOku ou fiefia ʻi hoʻo manatuʻí.”
Naʻe hili ʻe Mami ha puha kulokula ʻi he funga tēpilé. Naʻe ngingila ia. Naʻe ʻi ai ha līpine lanu kulokula ʻi ʻolunga. ʻI he Kilisimasi ʻo e taʻu kotoa pē, naʻe tohi ʻe ʻEimi mo hono fāmilí ha ngaahi meʻa lelei naʻa nau fakahokó. Ne nau faʻo ia ki he puhá.
Naʻe pehē ʻe Mami, “ʻOku tau muimui ʻia Sīsū ʻi he taimi ʻoku tau tokoni ai ki he niʻihi kehé. Ko ʻetau meʻaʻofa ia kia Sīsuú.”
Naʻe loto ʻa ʻEimi ke fakafonu e puhá ʻaki e ngaahi meʻaʻofa maʻa Sīsuú! Naʻá ne fakakaukau ki he ngaahi meʻa lelei te ne lava ʻo fakahokó.
Naʻe fehuʻi ange ʻe Teti ʻi he maʻu meʻatokoni efiafí, “ʻOku ʻi ai ha taha ʻoku ʻi ai haʻane meʻaʻofa maʻa Sīsū ke tohi?”
Naʻe pehē ange ʻe ʻEimi, “Ko au! Naʻá ku tokoni ke tuku fakalelei e puti ʻo ʻAlí.”
Naʻe pehē ʻe Teti, “Naʻe angalelei ʻaupito ia.” Naʻá ne tohi ia ʻi ha laʻipepa. Naʻe faʻo ʻe ʻEimi ʻa e laʻipepá ki he puhá.
Naʻe feinga ʻa ʻEimi ʻi he ʻaho takitaha ke fakahoko ha ngaahi meʻa angaʻofa. Naʻá ne loto ke muimui ʻia Sīsū.
Naʻá ne tokoni kia Teti ke fakatau mai ha meʻakai mei he falekoloá.
Naʻá ne tautau hono koté.
Naʻá ne tokoni kia Mami ke fufulu e ʻū peletí.
Naʻe ʻikai ke ne kē mo hono tuongaʻané.
Naʻe faʻo ʻe ʻEimi he ʻaho kotoa pē ha meʻa lelei ʻi he puha ngingilá. Ne ʻikai fuoloa kuo fonu e puhá ʻi he ngaahi meʻa leleí!
Faifai pea aʻu ki he ʻAho Kilisimasí. Naʻe fakaava ʻe ʻEimi ha ngaahi meʻaʻofa. Naʻá ne fakaava foki e meʻaʻofa maʻa Sīsuú! Naʻe taufetongi ʻa Mami mo Teti ʻi hono lau e ngaahi meʻa lelei kotoa pē ʻi he puhá.
Na‘e ongoʻi fiefia ʻa ʻEimi. Naʻá ne fiefia ʻi heʻene tokoniʻi e niʻihi kehé. Naʻá ne ʻiloʻi naʻe fiefia foki ai mo Sīsū!
Ngaahi tā fakatātā ‘a Christine Grove