Na‘e Ala Atu ‘a Kalolaina ‘o Tokoni
ʻE tokoni fēfē ʻa Kalolaina ki hono kaungāmeʻá?
Naʻe feinga ʻa Kalolaina ke fanongo ki heʻene faiakó. Ka naʻe ʻikai lava ke tuku ʻene sio ki hono kaungāmeʻa ko Leimoní. Naʻe ʻikai ke ʻi ai hano louʻulu!
Ne kiʻi fuoloa mai e ngangana hono ʻulú. Naʻá ne tula he taimí ni.
Ne fanongo ʻa Kalolaina ki ha longoaʻa ʻi mui ʻiate ia. Naʻe makiʻikiʻi ʻa Sisa mo Luisi. Naʻá ne fakaʻamu pē ne ʻikai ke na kataʻi ʻa Leimoni.
ʻI he pongipongí kotoa, naʻe fakahanoku holo pē ʻe Leimoni hono ongo umá. Naʻe ʻikai ke ne hiki hono nimá. Naʻá ne mata mamahi. Naʻe fakaʻamu ʻa Kalolaina naʻá ne lava ʻo tokoniʻi ia ke ne ongoʻi fiemālie ange.
Faifai pea hokosia e taimi ke vaʻinga ai ʻi tuʻá. Ko Leimoni pē naʻe fuofua hū ki tuʻa mei he lokiakó. ʻI he hū ʻa Kalolaina ki tuʻá, naʻe ʻikai ke ne sio ki ai ʻi ha feituʻu! Naʻe ʻikai kau ia ʻi he soká. Naʻe ʻikai kaka ʻi he ngaahi paá. Pea ne ʻikai kau ʻi he sikoti ʻi he tafaʻaki ʻo e faiakó.
Ko ʻena ia! Naʻe tuʻu ʻa Leimoni ʻi he tuliki ʻo e loto ʻataʻataá. Pea naʻe ʻi ai foki mo Sisa mo Luisi. Naʻe luelue atu ʻa Kalolaina ʻo ofi atu.
“Sio ki hono fuʻu foʻi ʻulu fōlahí!” Ko e kaila ia ʻa Sisá.
Kae kata ʻa Luisi. “Te u tele ʻe au mo hoku ʻulú kapau ne palakū pehē hoku laʻiʻulú.”
Naʻe kuku ʻe Leimoni hono ongo nimá. Naʻe hangē ʻe ngali tangí.
Naʻe lele atu ʻa Kalolaina kia Leimoni. Peá ne pehē ange, “ʻOkú ke fie vaʻinga mo au?” Naʻá ne ala atu hono nimá, peá na lue fakataha ki he mamaʻó. Naʻá na lue pē kae ʻoua kuó na ofi ki he faiakó. ʻE ʻikai ke hohaʻasi kinaua ʻe ha taha ai.
Naʻe ʻeke ange ʻe Kalolaina. “ʻOkú ke fie vaʻinga sikoti?”
Naʻe kamo ange ʻa Leimoni. Naʻá ne tā ha ngaahi laine ʻi he kelekelé ʻaki e sioká.
Naʻá ne fehuʻi ange, “ʻOkú ke sai pē?”
“ʻOku ou sai he taimí ni.” Ne malimali ʻa Leimoni. “Mālō hoʻo tokoniʻi aú.”
Naʻe malimali ʻa Kalolaina. Naʻá ne fiefia ʻi heʻene loto-toʻa feʻunga ke tokoniʻi hono kaungāmeʻa foʻoú.
Ngaahi tā fakatātā ʻa Hollie Hibbert