Ko e Mālō e Lelei ‘a e ‘Umatá
Naʻe puna fakalaka ʻa Tāsī ʻi he kiʻi vai pelepela. Naʻá ne makiʻikiʻi. Naʻe fakafiefia maʻu pē ʻa e ngaahi ʻaho ʻuhoʻuhá. Naʻá na lova vaka laʻiʻakau mo Mami ʻi he vaí. Naʻé fakakēkē ʻa Tāsī ʻi he tētē hake ʻene kiʻi laʻiʻakaú.
Naʻá ne ʻeteʻete atu ʻi he vahaʻa ʻo e fanga kiʻi vai pelepelá mo ha foʻi sioka lanu ʻi hono ongo nimá. Naʻá ne valivali e laʻisima lueʻanga ʻi he tafaʻakí pea aʻu pē ki ha fuʻu foʻi maka fōlahi. Naʻe ʻasi fakaʻofoʻofa ʻa e ngaahi lanú ʻi he langi lanu kuleí. Naʻe ʻikai tokanga ʻa Tāsī ki he momokó.
Naʻe sio hake ʻa Tāsī ki he langi fakapōpōʻulí.
“Mami, ʻe lava ke ʻafio mai ʻa e Tamai Hēvaní kiate au he taimí ni?” Ko e fehuʻi ange ia ʻa Tāsií.
“ʻIo.” Ko e Fineʻeikí ange ia, “ʻE lava ke ʻafioʻi koe ʻe he Tamai Hēvaní he taimí ni.”
Naʻe kiʻi fakakaukau taimi siʻi ʻa Tāsī. Peá ne hiki hake hono nimá ʻo taʻataʻalo.
Naʻá ne taʻataʻalo pē ki he langí mo pehē hake, “Mālō e lelei!” Mahalo pē naʻa lava ʻa e Tamai Hēvaní ʻo ʻafio hifo ki heʻene taʻataʻalo hake kiate Iá!
Ne faifai pea hū ʻa Tāsī mo Mami ki fale ke fakamāfana ai.
Naʻe toʻo ʻe Tāsī ha pepa pea tā ha ʻumata fakaʻofoʻofa. Naʻá ne fakaʻaliʻali ange ia kia Teti ʻi heʻene aʻu atu ki ʻapí. Naʻá ne fakamatala ange e meʻa kotoa fekauʻaki mo ʻene fiefia he ʻaho ʻuhoʻuhá.
Hili e maʻu meʻatokoni efiafí, naʻe tō ʻa e laʻaá. Naʻe pehē ange ʻe Teti, “Tau ō ʻo sio ki he tō ʻa e laʻaá.”
Naʻa nau lue atu ki tuʻa. Naʻe nanamu ʻo hangē ne toki ʻosi kaukau e māmaní. Naʻe molū pea lanu pingikī e ngaahi ʻaó. Pea naʻe ʻi he langí ʻa e ʻumata ngingila, mo fakaʻofoʻofa tahá!
“ʻOkú ke manatuʻi ko hai ʻokú ne ngaohi ʻa e ʻumatá?” Ko e fehuʻi ange ia ʻa Mamí.
Naʻe pehē ange ʻe Tāsī, “ʻOku ngaohi kinautolu ʻe he Tamai Hēvaní!”
Naʻe kuku mai ʻe Tāsī hono nimá kiate ia ʻo hangē ʻokú ne fāʻofua pē kiate iá. “ʻOku ou tui ʻokú Ne ‘mālō e lelei’ fakafoki mai kiate au!”
Tā fakatātaaʻi ʻe Cristina Trapanese