Ngaahi Hivá mo e Fanga kiʻi Pula mei he Koá
Naʻe makiʻikiʻi pē ʻa ʻĀlisi ʻi heʻene fakakaukau atu ki he hiva ʻa Palesiteni Kimipolo mo e pulú.
Naʻe vahevahe atu ʻe ʻĀlisi ha foʻi tata nūtolo ʻe taha ki he poulu hono tuongaʻané. Naʻá ne ʻofa ʻi hono ngaahi tuongaʻané mo e tokouá—foʻi toko nimá kotoa! Naʻé ongo fakafiefia ke tokoniʻi kinautolu. Ka naʻe faʻa faingataʻa ʻa e hoko ko e lahi tahá. Talu e haʻu ʻa e pēpē foʻoú ki ʻapí, mo e fie maʻu ke lahi ange ʻene tokoní. Naʻe lahi fau e meʻa naʻe hoko ʻi hono ʻapí!
“Ko e hā naʻá ke ako ʻi he lotú he ʻaho ní?” Ko e fehuʻi ia ʻa Tetí.
“Sīsū!” Ko e kiʻi tokoua siʻisiʻi ange ia ʻo ʻĀlisi ko Selá. Naʻá ne laiki ʻa e soosi ʻāpelé ʻi heʻene peletí.
Ne malimali ʻa ʻĀlisi. Naʻe talavou ʻaupito ʻa Sela. Pea toe fuʻu likoliko foki.
Ne kamata pehē hake ʻa ʻĀlisi, “Naʻá ku ako fekauʻaki mo Palesiteni Kimipolo …” Ka naʻe ui mai ʻa Mami mei he loki ʻe tahá. Naʻá ne fie maʻu e tokoni ʻa Tetí ki he pēpeé.
Ne pehē atu ʻe Teti, “Kātaki. Te u vave mai pē.”
Lolotonga e tokoni ʻa Teti kia Mamí, naʻe tokoni ʻa ʻĀlisi ki he tokotaha kehe kotoa pē. Naʻe huaʻi ʻe ʻĒliki ʻene ipu huʻakaú. Naʻe fakamaʻa ia ʻe ʻĀlisi. Ne kamata ke tangi ʻa Sela. Naʻe fāʻofua ʻa ʻĀlisi ki ai. Naʻe fie maʻu ʻe Kelela ke toe ʻoange haʻane nūtolo. Naʻe tata ange ʻe ʻĀlisi ʻene nūtolo.
Naʻa mo e taimi naʻe foki mai ai ʻa Tetí, naʻe kei longoaʻa pē mo felekeu ʻa e loki kaí. Ne fakaʻamu ʻa ʻĀlisi naʻe faingofua ange ke ongoʻi nonga.
Faifai pea ʻosi e kai hoʻataá. Naʻe tokoni ʻa ʻĀlisi ki hono ngaahi tokouá mo e tuongaʻané ke ʻave e ʻū meʻa ngaahi kaí ki he fufuluʻanga peletí. Naʻe taʻu motuʻa feʻunga pē ʻa ʻĀlisi ke ʻoua ʻe maumauʻi ha meʻa. Ko ia naʻá ne tokangaʻi hono fufulu e ʻū meʻa ngaahi kaí. Naʻá ne fakafonu ʻa e fufuluʻanga peletí ʻaki ʻa e vai koá.
ʻOku ou fakaʻamu ange naʻe ʻikai fie maʻu ke u fai ha ngaahi ngāue fakaʻapi, ko e fakakaukau ia ʻa ʻĀlisí. Naʻá ne manatuʻi leva ʻa e meʻa naʻá ne ako ʻi he Palaimelí fekauʻaki mo Palesiteni Sipenisā W. Kimipoló. ʻI heʻene kei siʻí, naʻe pau foki ke ne fai mo ha ngaahi ngāue fakaʻapi. Naʻá ne faʻa hivaʻi ha ngaahi himi ʻi he taimi naʻá ne tatau ai e huʻakau ʻo e pulú!
Naʻe fakakaukauloto ʻa ʻĀlisi ki hono hivaʻi ʻe Palesiteni Kimipolo ha foʻi hiva mo ha pulu. Naʻá ne makiʻikiʻi.
Fakafokifā kuó ne maʻu ha foʻi fakakaukau. ʻE lava pē ke ne hangē ko e palōfitá! Naʻá ne maʻu e tohi himí peá ne fakaava hake ia ki he ʻuluaki himí.
Naʻe pau ke ne feinga ʻi ha faʻahinga founga ke tuku fakaava pē ia. Naʻe hili ʻe ʻĀlisi ʻa e tohí ʻi he matapā sioʻatá. Naʻá ne fakaʻefihiaʻi e tapa ʻe taha ʻo e tohí ʻi mui ʻi ha fuʻu ʻakau naʻe tō ʻi ha kiʻi poulu. Naʻá ne fakaʻefihiaʻi leva ʻa e tapa ʻe tahá ʻi mui ʻi ha ipu mamafa. Naʻá ne lava leva he taimí ni ʻo sio ki ai lolotonga ʻene ngāué.
Lolotonga hono olo ʻe ʻĀlisi ʻa e ʻū poulú, ipú, mo e sēpuní, naʻá ne hivaʻi ʻa e himí. Naʻe ongoongo lelei ʻa e vai māmāfaná, mo e fanga kiʻi pula mei he koá ki hono ongo nimá. Pea naʻe hanga ʻe he hivá ʻo ʻai ke fiefia hono lotó.
ʻI he ʻaho hono hokó, ne toe hiva pē ʻa ʻĀlisi. Pea mo e ʻaho hoko mai aí. Naʻá ne feinga ke ne manatuʻi e ngaahi lea ʻo e himi takitaha. Peá ne hoko atu leva ki he hiva hokó. Naʻe ako foki ʻe ʻĀlisi ha ngaahi himi foʻou! Kuó ne ako tā piano ʻi ha ngaahi taʻu siʻi. ʻI he taimi naʻe ʻikai ke ne ʻilo ai ha himí, naʻá ne ako e ngaahi notá ʻi he pianó.
Naʻe ʻikai fuoloa kuo ʻikai ke toe hohaʻa ʻa ʻĀlisi ia ki hono fufulu ʻo e ʻū peletí. Ne ʻi ai ha taimi ʻe niʻihi, ne hangē naʻá ne saiʻia ia aí! Ko ha meʻa lelei ke hiva mo fakakaukau kia Sīsū. Naʻe hangē hono ako ʻo e himi foʻou takitahá ko hano maʻu ha kaungāmeʻa foʻoú. Neongo pe ko e hā e lahi e longoaʻa ʻokú ne ʻātakaiʻi ʻene moʻuí, ne tokoniʻi ia ʻe he ngaahi himí ke ne ongoʻi nonga.
Ngaahi tā fakatātā ʻa Erin Taylor