Tohi ʻe Koe
Loto-to‘a mei he Laumālie Mā‘oni‘oní.
Naʻá ku tokoto ʻi hoku mohengá hili hono fakamohe au ʻe heʻeku faʻeé ʻi he pō ko iá. Naʻá ku fakakaukau ki ha ngaahi fakapulipuli ʻe niʻihi naʻá ku tauhi. Naʻe fakafonu hoku lotó ʻaki ʻa e ha loto-tauteá. Peá u manatuʻi leva ke u lotu. ʻI heʻeku fai iá, naʻe talamai ʻe he Laumālie Māʻoniʻoní ke u talanoa ki heʻeku fineʻeikí fekauʻaki mo e meʻa naʻe ʻi hoku ʻatamaí.
Ne hangē ne u kiʻi ilifia ke talanoa ki heʻeku fineʻeikí fekauʻaki mo iá. Naʻá ku ʻiloʻi naʻe feinga ʻa Sētane ke u ongoʻi ilifia. Naʻá ku ʻiloʻi foki ʻo fakafou ʻi he Laumālie Māʻoniʻoní ko e talanoa ki heʻeku fineʻeikí ʻa e meʻa totonu ke faí.
Ne faifai peá u maʻu ha loto-toʻa ke u ʻalu ʻo kole ki heʻeku fineʻeikí pe te ma lava ʻo talanoa. Naʻá ku fakamatala ange ʻa e meʻa kotoa pē fekauʻaki mo e meʻa kuó u faí mo e ongo naʻá ku maʻú. Naʻá ku ʻohovale, he naʻe ʻikai ke ne ʻita. Naʻá ne talamai ʻene fiefia ʻi heʻeku loto-toʻa feʻunga ke talanoa mo iá. Naʻá ma fāʻofua, peá u kole ange ke ne fakamolemoleʻi au. Naʻá ku ongoʻi fiemālie mo fiefia.
Naʻá ku toe lotu ki heʻeku Tamai Hēvaní ʻo kole kiate Ia ke Ne fakamolemoleʻi foki mo au. Naʻe ongo fakafiefia moʻoni ke muimui ki he Laumālié mo fai e meʻa ʻoku totonú. ʻOku ou houngaʻia koeʻuhí ko Sīsū, ʻa ia naʻá Ne ʻai ke u lava ʻo fakatomala ʻi he taimi ʻoku ou fai ai ha fehalākí. ʻOku ou houngaʻia foki ʻi he Laumālie Māʻoniʻoní, ʻa ia naʻá ne tokoniʻi au ke u ongoʻi lelei angé. Pea ʻoku ou houngaʻia ʻi ha faʻē ʻofa ʻokú ne fakafanongo peá ne ʻiloʻi au.
Ngaahi tā fakatātā ʻa Adam Howling