Ngaahi ‘Ekitivitī ‘i he Ha‘u, ‘o Muimui ‘Iate Aú
Ki he efiafi fakafāmili ʻi ʻapí, ako folofolá, pe fakafiefia pē!
Ko Hotau ‘Api Fakalangí
Ki he Mōsese 1; ʻĒpalahame 3
Talanoá: Naʻa tau nofo kotoa mo Sīsū mo e Tamai Hēvaní kimuʻa pea fāʻeleʻi kitautolú. Naʻe faʻu ʻe he Tamai Hēvaní ha palani ke tau haʻu ai ki he māmaní. (Vakai, ʻĒpalahame 3:24–25.)
Hivá: “ʻOku Moʻui ʻEki Tamaí” (Tohi Hiva ʻa e Fānaú, 8)
ʻEkitivitī: Lau ʻa e talanoa mei he folofolá ʻi he peesi 8. Pea ngaohi leva ha ʻaati maka! Tānaki ha ngaahi foʻi maka kehekehe. Faʻu ha ʻata ʻo e Tamai Hēvaní, Sīsū, mo koe kimuʻa pea tau haʻu ki he māmaní.
Va‘inga Manatu ‘i he Loto-Hounga‘iá
Ki he Sēnesi 1–2; Mōsese 2–3; ʻĒpalahame 4–5
Talanoá: Naʻe fakahā ʻe he Tamai Hēvaní kia Sīsū Kalaisi ke faʻu ʻa e māmaní ke tau nofo ai (vakai, Sēnesi 1–2). Naʻe faʻu ʻe Sīsū ʻa e ʻakaú mo e fanga monumanú ke tau tokangaʻi. Te tau lava ʻo houngaʻia ʻi he māmaní.
Hivá: “ʻOku ʻOfa ʻEku Tamai Hēvaní ʻIate Au” (Tohi Hiva ʻa e Fānaú, 16–17)
ʻEkitivitī: Fai ha kiʻi vaʻinga he Taimí ni! ʻE pehē ʻe he tokotaha ʻuluakí, “ʻOku ou houngaʻia koeʻuhí ko e …” peá ne toki lea ʻaki leva ha meʻa naʻe fakatupu ʻe he Tamai Hēvaní mo Sīsū. ʻE toe fakahoko ia ʻe he tokotaha hokó peá ne tānaki atu leva ha meʻa foʻou. Hokohoko atu ai pē ʻi ha siakale ʻi he fuoloa taha te mou lavá.
Ko e Hapohapo ki he Ngaahi Fili ‘Oku Leleí
Ki he Sēnesi 3–4; Mōsese 4–5
Talanoá: Naʻe fili ʻa ʻIvi ʻi he Ngoue ko ʻĪtení ke kai ʻa e fua ʻo e ʻakau ʻo e ʻiló. Naʻá ne foaki ʻa e fuaʻiʻakaú kia ʻĀtama. Naʻá ne toe fili foki ke kai ʻa e fuaʻiʻakaú. (Vakai, Mōsese 4:12.) Hili ʻena kai ʻa e fuá, naʻá na ʻilo ʻa e faikehekehe ʻo e totonú mei he halá.
Hiva: “Fili e Hala Totonú” (Tohi Hiva ʻa e Fānaú, 82)
ʻEkitivitī: Tangutu fuopotopoto ʻo lī takai ha foʻi pulu. ʻI hoʻo hapo e foʻi pulú, fakamatala ki ha fili lelei naʻá ke fakahoko he uiké ni.
Tohi Fakamo‘oni Fakafāmilí
Talanoá: Naʻe faʻu ʻe he fāmili ʻo ʻĀtama mo ʻIví ha “tohi ʻo e manatú” (Mōsese 6:5). Naʻa nau tohi fekauʻaki mo Sīsū Kalaisi mo e palani ʻa e Tamai Hēvaní. Ko e tohí ni ko e kamataʻanga ia ʻo e folofolá.
Hiva: “Lea ʻaki Heni e ʻOfá,” (Tohi Hiva ʻa e Fānaú, 102–03)
ʻEkitivitī: Te ke lava foki ʻo faʻu ha tohi ʻo e manatú! Kole ki he tokotaha kotoa pē ʻi ho fāmilí ke nau hiki ʻenau fakamoʻoni kia Sīsū Kalaisí. Hili iá pea fakapipiki fakataha e ʻū pēsí ke faʻu ha tohi. Tānaki atu ia ki hoʻo puha tukuʻanga koloa ʻi he peesi 30.
Fakatupulaki ‘o e ‘Ofá
Ki he Mōsese 7
Talanoá: Naʻe langa ʻe ʻĪnoke mo hono kakaí ha kolo naʻe ui ko Saione. Naʻe angatonu ʻa e kakai ʻi Saioné pea “naʻa nau loto-taha pē mo fakakaukau taha” (Mōsese 7:18). ʻOku ʻuhinga ia naʻa nau feʻofaʻaki mo fetauhiʻaki. Naʻe ʻikai ke nau kē pe fefakamamahiʻaki.
Hiva: “ʻOfa ʻi ʻApí” (Ngaahi Himí, fika 187)
ʻEkitivitī: Lau e Mōsese 7:19–21. Langa leva ha kolo ʻaki ha ngaahi poloka, maka, pe vaʻakau. ʻI hoʻo langá, talanoa fekauʻaki mo e founga te ke lava ai ʻo ʻai ho fāmilí ke hangē ko Saioné. Te ke lava ʻo ʻave ha ʻū tā ʻa hoʻo kolo kuo ʻosí ki he Kaumeʻá!
Ngaahi tā fakatātā ʻa Katy Dockrill