Mei he Kau Palesitenisī ʻUluakí
Ko e Fānau ʻOfeina Koe ʻa e ʻOtuá
Toʻo mei he Fakamafola ʻa e Kaumeʻa ki he Kaumeʻá maʻá e Fānaú: 2021. Mamataʻi ia ʻi he ChurchofJesusChrist.org/broadcasts.
Siʻoku ngaahi kaungāmeʻa kei talavou, ʻoku ou ʻofa atu! ʻI he taimi ʻoku ou sio atu ai kiate kimoutolú, ʻoku ou fakakaukau ki hoku makapuna uá. ʻOku mou ʻiloʻi, ʻoku laka hake he makapuna ua ʻe toko 100 ʻi homau fāmilí ʻoku teʻeki hoko honau taʻu 12? ʻOku nau poto mo pelepelengesi ʻaupito ʻo hangē pē ko kimoutolú.
Ko ha fānau ʻofeina kimoutolu ʻa e ʻOtuá. Kātaki ʻo manatuʻi muʻa e moʻoniʻi meʻa ko iá. Kapau he ʻikai teitei ngalo ʻiate kimoutolu ʻa e moʻoni haohaoa ko iá, te mou lava ʻo fehangahangai mo ha faʻahinga palopalema pē, ʻi he tui mo e loto-toʻa.
ʻI he taimi ʻoku papitaiso mo hilifakinima ai kimoutolú, ʻoku mou fai ha palōmesi te mou muimui ki he ʻEikí. Pea ʻokú Ne palōmesi mai te Ne fekauʻi mai Hono Laumālié ke tataki kimoutolu. Fakakaukau angé ki he maama mo e ʻofa te mou lava ʻo ʻomi ki he māmaní ʻi hoʻomou hoko ko ha tokotaha muimui faivelenga ʻo Sīsū Kalaisi!
Siʻoku ngaahi kaungāmeʻa kei talavou, ʻoku ou laukau ʻaki kimoutolu takitaha! ʻOku ou ʻiloʻi ʻoku tokangaʻi kimoutolu ʻe he Tamai Hēvaní. ʻOkú Ne ʻofa lahi ʻiate kimoutolu, pea pehē foki kiate au.
Ko e Palani Fiefia ʻa e Tamai Hēvaní
Valivali ʻa e ngaahi fakatātaá ke ʻilo lahi ange fekauʻaki mo e palani ʻa e Tamai Hēvaní. Laukonga ke lahi ange ʻi he ʻĒpalahame 3–5.
Ne tau nofo fakataha mo e Tamai Hēvaní kimuʻa pea fanauʻi mai kitautolú.
Naʻá ne kole kia Sīsū Kalaisi ke fakatupu ʻa e māmaní maʻatautolu.
Naʻe ngaohi ʻe Sīsū ʻa e laʻaá, māhiná, mo e ngaahi fetuʻú ke ʻoatu ha maama.
Naʻe ngaohi ʻe Sīsū ʻa e māmaní ke fakaʻofoʻofa ʻaki e ʻulu ʻakaú mo e ngaahi matalaʻiʻakaú. Naʻá Ne ngaohi ʻa e iká, ngaahi manupuná, mo e fanga monumanú.
Pea tuku mai leva ʻe he Tamai Hēvaní ʻa ʻĀtama mo ʻIvi, ko ʻetau ʻuluaki ongomātuʻá, ki he māmaní.
ʻOku ʻofeina mo tokangaʻi au ʻe he Tamai Hēvaní.
Ngaahi tā fakatātā ʻa Elise Black