ʻIkai ke Fuʻu Tuenoa
Naʻe hoko ʻa e talanoa ko ʻení ʻi ʻEkuatoa.
Naʻe fakaʻamu ʻa Teimiane ʻe lava ke haʻu fakataha kotoa hono fāmilí ki he lotú.
Naʻe vakaiʻi ʻe Teimiane ʻene kató ke sio pe ʻoku ʻi ai ʻa e meʻa naʻá ne fie maʻú. Vala lotu? ʻOsi ʻi ai. Sū? ʻOsi ʻi ai. Tohi ʻa Molomoná? ʻOsi ʻi ai. Naʻá ne fakamaʻu ʻene kato āfeí, hili ia ʻi hono umá, pea hū atu ki he matapaá.
“Mama!” Ko e ui atu ia ʻa Teimiané. “Te u ʻalu au kia Abuela (kuifefine) mo Abuelo (kuitangata)!”
Naʻe fai e pelupelu taueli ʻene fineʻeikí. “Fakapapauʻi ʻokú ke tokoni ki hoʻo ongo kuí.” Naʻá ne tuʻu ʻo fāʻofua kia Teimiane. “ʻOku ou ʻiloʻi ʻokú ke saiʻia ke ke ʻalu mo kinaua ki he lotú. ʻOfa ke ke maʻu ha taimi lelei ʻapongipongi.”
Naʻe talaange ʻe Teimiane, “Te u fai ia!” Ka naʻá ne fakakaukauloto pē Ka ʻoku ou fakaʻamu ange te ke lava ʻo haʻu mo au.
Ne lue atu ʻa Teimiane ki he taliʻanga pasí. ʻI he Tokonaki kotoa pē, naʻá ne heka pasi ai mei hono kolo ʻi ʻEkuatoá ki he ʻapi ʻo Abuela mo Abueló. Naʻá ne mohe mo kinaua ʻi he pō ko iá. Peá ne ʻalu leva ʻi he ʻaho hono hokó ki he lotú mo kinaua.
ʻI he pongipongi Sāpaté, ne teuteu ʻa Teimiane ki he lotú. Naʻá ne fakamaʻu hono soté. Tui hono suú. Peá ne lue leva ki he lotú mo Abuela mo Abuelo.
Naʻe saiʻia ʻa Teimiane ʻi he lotú. Naʻá ne saiʻia ke hivaʻi ʻa e ngaahi hivá mo maʻu ʻa e sākalamēnití. Naʻá ne saiʻia foki ke sio ki hono ngaahi kaungāmeʻá. Ka naʻá ne fakaʻamu naʻe ʻi ai mo e toenga hono fāmilí.
ʻI he hoʻatā ko iá, naʻe lue atu ʻa Teimiane, Abuela, mo Abuelo ki he ʻapi ʻo Brother mo Sister Luisí. Ne ʻamanaki ke fakahoko haʻanau efiafi fakafāmili fakataha. Naʻe ʻomi ʻe Abuela ha poulu keke huʻakau melie ki he hikinga uá.
Naʻe fekauʻaki e lēsoní mo Sīsū. Naʻe valivali ʻe Teimiane ha fakatātā ʻo Sīsū lolotonga ʻene fanongo ki he lēsoní. Naʻe pehē ʻe Brother Luisi, “ʻOku ʻafioʻi ʻe Sīsū ʻa e meʻa kotoa pē ʻoku tau ongoʻí. Naʻa mo e taimi ʻoku tau ongoʻi loto-mamahi aí.”
Naʻe sio ʻa Teimiane ki heʻene fakatātā ʻo Sīsuú. Naʻá ne fiefia ʻoku ʻafioʻi ʻe Sīsū ʻa e meʻa naʻá ne ongoʻí.
Hili e lotu tukú, naʻe pehē ange ʻe Abuela, “Naʻá ku haʻu mo ha keke huʻakau melie. Ko hai ʻoku fie kai?”
“Ko au?” Ko Teimiane ange ia. Ko e manako ia ʻo Teimiané ʻa e hikingaua ne lahi ai e kilimí pea toe melie fokí! Pea naʻe ngaohi ʻe Abuela ʻa e keke lelei tahá.
ʻI he hili ʻa e efiafi fakafāmilí, ne luelue atu ʻa Abuela mo Teimiane ki he taliʻanga pasí ke foki ki ʻapi. Naʻe hanga pē ʻa Teimiane ki lalo.
Naʻe ʻeke ange ʻe Abuela. “ʻOku ʻi ai ha meʻa ʻoku hoko?”
Naʻe fakafulofula ʻa Teimiane. “ʻOku ou fakaʻamu ne tau ō ki he lotú mo e toenga hoku fāmilí.”
Ne pēhe ange ʻe Abuela, “Mo au pē.” Naʻá ne fāʻofua kia Teimiane. “Ka ʻoku ʻofa lahi ʻaupito ho fāmilí ʻiate koe. Pea ʻoku pehē pē mo Abuelo mo au mo ha niʻihi tokolahi kehe!”
Ne lele hake e pasí ʻo tuʻu. Naʻe tangutu ʻa Teimiane ʻi he tafaʻaki ʻo e matapā sioʻatá ʻo taʻataʻalo kia Abuela ʻi he mavahe atu ʻa e pasí.
Ne fakakaukau ʻa Teimiane ki he meʻa naʻe lea ʻaki ʻe Abuelá. Naʻá ne fakakaukau ki heʻene fineʻeikí mo hono tokouá mo e tuofefiné. Naʻá ne ʻiloʻi naʻa nau ʻofa lahi ʻiate ia. Naʻá ne fakakaukau ki heʻene faiako Palaimelí. Mo e fāmili Luisí. Pea mo Abuela mo Abuelo. Naʻa nau ʻofa kotoa foki ʻiate ia.
Ka ko e meʻa lahi tahá, naʻe ʻiloʻi ʻe Teimiane ne ʻofeina ia ʻe he Tamai Hēvaní mo Sīsū. Pea naʻe ʻikai ke ne toe ongoʻi taʻelata ai
Ngaahi tā fakatātā ʻa Julissa Mora