‘Ū Tohinoa ‘a Papá
Naʻe hoko ʻa e talanoa ko ʻení ʻi Tahiti.
Naʻe tangutu ʻa ʻĀlani ʻi ha sea ʻi hono tuʻafalé. Ne taaitō e laʻaá. Naʻe tuʻu ha ngaahi fuʻu paame ʻo sītuʻa ki ha langi lanu pingikī mo lanu moli.
Naʻá ne huke hake e peesi ʻo e tohi naʻá ne laú. Naʻe ʻikai ke ʻi ai ha ʻū fakatātā. Ka naʻe ʻikai tokanga ki ai ʻa ʻAlani. Naʻá ne saiʻia hono lau e tohí ni!
Naʻá ne lau vave pē ʻa e ngaahi tohinima maau ʻa Papá. Naʻá ne manatuʻi e konga ko ʻení! Naʻá ne kata maʻu pē ai.
ʻI he taimi ko iá, ne hū mai ʻa Papa ki tuʻa. “Ko e hā e meʻa ʻoku fakaolí?”
“ʻOku ou lau ha taha ʻo hoʻo ngaahi tohí.” Naʻe malimali ʻa ʻĀlani. “ʻOku ou saiʻia he konga fekauʻaki mo e niú.”
“ʻOi, ko hoʻo ʻuhingá ki heʻeku ʻū tohinoá.” Ne tangutu hifo ʻa Papa ʻi he tafaʻaki ʻo ʻĀlaní. “ʻOku nau fakamatalaʻi e talanoa ʻo ʻeku moʻuí. Ka ʻoku ʻikai fekauʻaki pē ia mo au. ʻOkú ke kau foki mo koe ai. Pea pehē foki kia Mama, mo ho ngaahi tokouá mo e tuofefiné.”
“Hangē ko Nīfaí!” Ko ʻĀlani ange ia. “Naʻá ne hiki ha ngaahi talanoa fekauʻaki mo ʻene moʻuí, pea naʻá ne tohi foki fekauʻaki mo hono fāmilí.”
“Ko ia!” Ko Papa mai ia.
Naʻe pehē ange ʻe ʻĀlani, “ʻOku ou saiʻia taha pē ʻi he ngaahi konga fekauʻaki mo koé.” Hangē ko e taimi naʻá ke hoko ai ko ha faifekau ʻi heni ʻi Tahití.”
Naʻe pehē ange ʻe Papa, “ʻOku ou saiʻia taha ʻi he ngaahi talanoa fekauʻaki mo koé.” “Naʻá ke ʻiloʻi ne ma fakahingoa koe ki he hingoa loto ʻo ʻEletā Petinaá?”
“Naʻe teʻeki ke ke talamai ia kiate au! ʻOku ʻikai ke u faʻa tatali ke lau e konga ko iá.”
Naʻe malimali ʻa Papa. “ʻOku lahi ha ngaahi talanoa ʻi heʻeku ʻū tohinoá. Talu ʻeku hiki ha ngaahi tohinoa talu mei hoku taʻu valú.”
“Talu ho taʻu valú?” Ko e fehuʻi ange ia ʻa ʻĀlani. “Ko ha fuʻu taimi fuoloa ʻaupito ia.”
Naʻe kata pē ʻa Papa. “ʻOku ʻikai ke u fuʻu motuʻa pehē.”
Naʻe kiʻi fakakaukau ʻa ʻĀlani. Naʻá ne pehē ange, “ʻOku vavé ni pē ʻeku taʻu valú. ʻE lava ke ʻomi haʻaku tohinoa ki hoku ʻaho fāʻeleʻí?”
“ʻIo!” Ko Papa ange ia.
“Te u lava leva ʻo tohi haʻaku ngaahi talanoa koeʻuhí ke lava ʻe heʻeku fānaú ʻo lau ia ha ʻaho.”
“Ko ha tukufakaholo fakafāmili lelei ia!” Ko Papa ange ia.
Ngaahi tā fakatātā ʻa Alessia Girasole