Ko e Kau Paionia ʻi he Fonua Kotoa Pē
‘Oku Ma‘u ‘e Tinisi ha Tali
Naʻé longoaʻa ʻa e fakamōlū ʻo e mohengá ʻi he teka atu ʻa Tinisí. Kuó ne mafulifuli holo ʻi he poó kakato. Ka naʻe ʻikai pē ke lava ia ʻo mohe!
Fēfē kapau naʻe hala ʻa e ongo faifekaú? Ko e fakakaukau ia ʻa Tainisí. Fēfē kapau ʻoku ʻikai ko e siasi moʻoní ʻeni ia? Fēfē kapau ʻoku ou ʻi he hala ʻoku ʻikai totonú? Naʻe kei fakahohaʻasi pē ia ʻe he ngaahi fehuʻí.
Ne kau e fāmili ʻo Tinisí ki he Siasí ʻi he taʻu ʻe ua kimuʻá, ʻi hono taʻu 10. ʻI hono fuofua akoʻi kinautolu ʻe he kau faifekaú, ne ongoʻi ʻe Tinisi ʻi he taimi pē ko iá ʻoku moʻoni e meʻa naʻa nau akoʻí. Naʻe kau ʻa Tinisi mo hono fāmilí ki he niʻihi ne fuofua kau ki he Siasí ʻi Potukalí. Ko ha paionia ʻa Tinisi!
Ka kimuí ni maí, ne kamata ke ne hohaʻa. Fēfē kapau naʻe ʻikai ko e fili totonú ʻa e papitaisó?
Naʻe ʻikai tala ʻe Tinisi ki ha taha naʻá ne hohaʻa. Naʻé ʻikai ke ne tala ia ki hono ongo tokouá pe tuofefiné. ʻO aʻu pē ki heʻene ongomātuʻá. Ka ʻi he poó ni, ko e meʻa pē ia naʻá ne fakakaukau ki aí.
Naʻe māpuhoi ʻa Tinisi. Naʻá ne fakasio hifo he tafaʻaki ʻo e mohengá. Kuo ʻosi maʻumohe hono ngaahi tokouá ʻi he mohenga ʻi laló. Naʻe tokotaha pē ʻa Tinisi.
Naʻá ne ʻiloʻi naʻe fie maʻu ke ne fehuʻi ki he ʻOtuá pe ʻoku moʻoni ʻa e Siasí. Naʻá ne tūʻulutui ʻi he lotomālie ʻo hono mohengá. Naʻe punou hifo hono ʻulú pea kamata ke ne lotu.
ʻI he kiʻi leʻosiʻi, ne pehē hake ʻa Tinisi, “Fakamolemole, ʻOtua. ʻAi ke u ʻiloʻi pe naʻe mamata moʻoni koā ʻa Siosefa Sāmita kiate koe mo Sīsū.”
Ne ʻosi tā tuʻo lahi ha lotu ʻa Tinisi kimuʻa. Ka naʻe kehe e taimi ia ko ʻení. Naʻe fie maʻu moʻoni ʻe Tinisi ke ne ʻilo. Naʻá ne lotu mālohi ange ʻi ha toe taimi ki ha tokoni.
Naʻá ne fanafana hake, “ʻOku ʻikai ke u fie maʻu hala.” ʻOku ou fie ʻilo pē ʻa e meʻa ʻoku totonú.”
Ne ongoʻi leva ʻe Tinisi ha meʻa. Naʻe mālohi pea fakamāfana ʻa e ongo ko iá. Naʻe tupulaki ia kae ʻoua kuó ne ongoʻi kotoa ʻi hono sinó. Naʻe taʻe-hano-tatau ʻene fiefiá!
Naʻe ʻiloʻi ʻe Tinisi ko e ongo ko iá ko e Laumālie Māʻoniʻoní ia. Kuo tali ʻe he ʻOtuá ʻene lotú! Naʻe moʻoni ʻa e ongo faifekaú. Ne hoko moʻoni pē ʻa Siosefa Sāmita ko ha palōfita. Pea naʻe ʻikai ko ha fili lelei pē ʻa e papitaisó. Ko e fili lelei tahá ia.
Naʻe tokoto foʻohake pē ʻa Tainisi ʻo siofi e ʻató. Ne mole atu ʻene ngaahi hohaʻá. Naʻá ne fusi hake hono kafú. Kimuʻa peá ne ʻiloʻi iá, naʻá ne mohe.
ʻI he fakaʻau ke matuʻotuʻa ange ʻa Tinisí, naʻá ne manatuʻi maʻu pē ʻa e pō naʻá ne lotu ai ʻi hono mohengá. Naʻá ne ʻiloʻi naʻá ne ʻi he hala totonú ʻi heʻene hoko ko ha mēmipa ʻo e Siasi ʻo Sīsū Kalaisí. Pea naʻá ne ʻiloʻi ʻe fanongo maʻu pē ʻa e Tamai Hēvaní ki heʻene ngaahi lotú.
Ko Potukalí ko ha fonua ia ʻi he fakahihifo ʻo ʻIulopé.
ʻOku ʻi ai ha temipale ʻe taha ʻi Potukali. Naʻe fakatapui ia ʻi he 2019.
ʻOku maʻu ʻe Potukali ʻa e fale fakatauʻanga tohi motuʻa taha ʻi he māmaní.
Naʻe papitaiso ʻa Tinisi ʻi ha vai kaukau ʻi he ʻapi fakamisioná.
Naʻá ne ngāue fakafaifekau ʻi he ʻotu motu ʻoku kiʻi mavahe atu mei he matāfanga ʻo Sipeiní, Potukali, mo ʻAfiliká.
Naʻe ngāue fakafaifekau ʻa Tinisi mo e toko tolu kotoa ʻo hono ongo tokouá mo e tuofefiné ʻi he taimi tatau pē!
Ngaahi tā fakatātā ʻa Sammie Francis