Mga Bisikleta ug mga Saad
“Ma, tingali kana nga batang lalaki nahagbong sa iyang bisikleta!” Miingon si Annie. Ang batang lalaki naglingkod diha sa daplin sa dalan sa unahan. Ang iyang bisikleta diha sa yuta, ug siya naghilak. Ang usa ka mas magulang nga batang lalaki naglingkod tupad niya.
“Nasakitan ka ba?” Nangutana si Annie samtang siya ug si Mama nagkaduol.
“Ang akong igsoon nahagbong ug gisakitan sa iyang tuhod, miingon ang mas magulang nga batang lalaki. “Kinahanglan nako siya nga dad-on sa pagpauli sa balay. Apan basin dili ko makatulod sa bisikleta ug motabang kaniya sa paglakaw sa samang higayon.”
“Makatabang kami!” Miingon si Annie.
Mitando si Mama. “Makatabang kami nimo nga makauli sa balay.”
Ang mas manghod nga batang lalaki nagpahid og mga luha. Ang iyang igsoon mitabang kaniya nga makabarog. Si Mama ug si Annie midala sa mga bisikleta. Hinay sila nga milakaw sa karsada.
Sa wala madugay miabot na sila sa balay sa mga batang lalaki. Migawas ang usa ka babaye nga nanighawak. “Unsay nahitabo?” nangutana siya.
“Ang imong anak nga lalaki nahagbong sa iyang bisikleta ug nasakitan ang iyang tuhod,” miingon si Mama. “Miagi kami. Mao nga mihunong kami aron sa pagtabang.”
Ang babaye mitan-aw kanila. Apan wala siyay gisulti. Iyang gigunitan ang kamot sa batang lalaki. “Dali sa sulod. Akong hugasan ang imong tuhod. Si Jason, mibutang sa mga bisikleta sa garahe.”
Ang mas magulang nga batang lalaki mitulod sa mga bisikleta palayo. Ang babaye misira sa pultahan sa atubangan.
Si Mama ug ako misugod sa pagpanglakaw.
Nagmug-ot si Annie. “Wala man lang gani sila magpasalamat kanato!”
“Wala, wala nila buhata,” miingon si Mama. “Apan mitabang ba kita sa mga tawo aron lang sila mopasalamat kanato?”
Naghunahuna si Annie sa makadiyot. “Dili man. Motabang kita kanila tungod kay sila nagkinahanglan sa atong tabang. Sa dihang ako gibunyagan, misaad ko sa pagtabang sa ubang mga tawo.”
“Husto ka,” miingon si Mama. “Mao kana ang unsay ato gayod nga gisaad.”
Si Annie naghunahuna pa og dugang. “Ang mga tawo dili kanunayng nagpasalamat ni Jesus sa mga maayong butang nga Iyang gibuhat. Apan kana wala makapugong Kaniya. Busa ako dili motugot niini nga makapugong usab kanako.”
“Ug hinumdomi nga ang Langitnong Amahan malipayon sa dihang kita motabang usab,” miingon si Mama.
Mipahiyom si Annie. “Kana igo nga pasalamat alang kanako!”
Paghulagway pinaagi ni Mark Robison